उपमुख्यमंत्री एकनाथ शिंदे यांच्या नेतृत्वाखालील शिवसेनेत लवकरच ‘मेगा इन्कमिंग’ पाहायला मिळणार आहे, असा अत्यंत मोठा दावा राज्याचे उद्योगमंत्री उदय सामंत यांनी केला आहे. केवळ नाशिक महानगरपालिकाच नाही, तर संपूर्ण महाराष्ट्रातील अनेक नगरपालिका, नगरपंचायती आणि महानगरपालिकांमधील विद्यमान आणि माजी नगरसेवक लवकरच शिवसेनेत प्रवेश करणार असल्याचे सामंत यांनी म्हटले आहे. याचवेळी, राज्याच्या राजकारणात सध्या चर्चेचा विषय ठरलेल्या राष्ट्रवादीचे (शरद पवार गट) नेते एकनाथ खडसे आणि भाजपचे नेते विनोद तावडे यांच्या भेटीवरही सामंत यांनी आपली स्पष्ट प्रतिक्रिया नोंदवली आहे. शिंदेंच्या शिवसेनेत ‘मेगा इन्कमिंग’ची शक्यता सत्ताधारी शिवसेनेत सध्या इतर पक्षांतील नेत्यांचा ओढा वाढत असल्याचे चित्र आहे. याबाबत बोलताना मंत्री उदय सामंत यांनी अत्यंत आत्मविश्वासाने मोठा दावा केला. ते म्हणाले की, “उपमुख्यमंत्री एकनाथ शिंदे यांच्या विकासकामांवर आणि नेतृत्वावर लोकांचा विश्वास वाढत आहे. त्यामुळे केवळ नाशिक महानगरपालिकेपुरते हे मर्यादित नाही, तर आगामी काळात संपूर्ण महाराष्ट्रातील अनेक नगरपालिका, नगरपंचायती आणि महानगरपालिकांमधील नगरसेवक मोठ्या संख्येने एकनाथ शिंदे यांच्या शिवसेनेत प्रवेश करणार आहेत. याची प्रचिती तुम्हाला येत्या काही दिवसांतच येईल,” असा सूचक इशारा सामंत यांनी दिला. त्यांच्या या दाव्यामुळे राज्यातील विरोधी पक्षांच्या गोटात अस्वस्थता वाढण्याची शक्यता आहे. खडसे-तावडे भेटीवर सामंतांचे स्पष्टीकरण गेल्या काही दिवसांपासून ज्येष्ठ नेते एकनाथ खडसे हे पुन्हा स्वगृही म्हणजेच भारतीय जनता पक्षामध्ये प्रवेश करणार असल्याच्या जोरदार चर्चा राजकीय वर्तुळात सुरू आहेत. या चर्चांना तेव्हा अधिक बळ मिळाले, जेव्हा भाजपचे विनोद तावडे आणि एकनाथ खडसे यांची नुकतीच एक भेट झाली. या भेटीमुळे महाराष्ट्राच्या राजकारणात विविध तर्कवितर्क लावले जात आहेत. या राजकीय चर्चेवर उदय सामंत यांना विचारले असता, त्यांनी या भेटीचे राजकीय महत्त्व फेटाळून लावले. सामंत म्हणाले, “एकनाथ खडसे आणि विनोद तावडे हे अनेक वर्षे एकत्र राहिले आहेत. त्यांचे एकमेकांशी अत्यंत जुने आणि घनिष्ठ संबंध आहेत. त्यामुळे दोन जुने सहकारी किंवा नेते जेव्हा भेटतात, तेव्हा त्या प्रत्येक भेटीचा राजकीय अर्थ काढणे योग्य नाही. या भेटीकडे केवळ सदिच्छा भेट म्हणूनच पाहायला हवे.” हेही वाचा.. एकनाथ खडसे-विनोद तावडे भेटीने राजकीय चर्चांना उधाण:भाजप घरवापसीच्या चर्चांवर नाथाभाऊंचे स्पष्टीकरण
मुंबईत भाजपचे राष्ट्रीय सरचिटणीस विनोद तावडे आणि राष्ट्रवादी काँग्रेस (शरदचंद्र पवार) पक्षाचे ज्येष्ठ नेते एकनाथ खडसे यांची झालेली भेट राज्याच्या राजकारणात चर्चेचा विषय ठरली आहे. या भेटीनंतर खडसे पुन्हा भाजपमध्ये प्रवेश करणार का, अशा चर्चांना वेग आला. विशेषतः उत्तर महाराष्ट्रातील राजकीय समीकरणांच्या पार्श्वभूमीवर या भेटीचे विविध अर्थ लावले जात आहेत. मात्र, एकनाथ खडसे यांनी या सर्व चर्चांवर स्पष्ट भूमिका घेत ही केवळ सदिच्छा भेट असल्याचे सांगितले आहे. सविस्तर वाचा
Source link
नाशिकच नाही, संपूर्ण राज्यातील अनेक नगरसेवक शिंदेंच्या शिवसेनेत येणार:उदय सामंतांचा मोठा दावा, खडसे-तावडे भेटीवरही केले भाष्य
