'माधुरी' हत्तीणीला परत आणण्यासाठी उद्या हजारो नागरिकांचे उपोषण:राजू शेट्टी यांचा 13 सप्टेंबरचा सरकारला अल्टिमेटम, तीव्र जनआंदोलनाचा इशारा

शिरोळ तालुक्यातील नांदणी मठाची लाडकी ‘माधुरी’ (महादेवी) हत्तीण परत आणण्याच्या मागणीने आता पुन्हा एकदा पेट घेतला आहे. माजी खासदार आणि स्वाभिमानी शेतकरी संघटनेचे नेते राजू शेट्टी यांनी प्रशासनाला 13 सप्टेंबरचा ‘अल्टिमेटम’ दिला असून माधुरीला परत न आणल्यास गेल्या वर्षीपेक्षा मोठे जनआंदोलन उभारण्याचा थेट इशारा दिला आहे. या मागणीसाठी उद्या हजारो नागरिक नांदणी मठाच्या परिसरात लाक्षणिक उपोषण करणार आहेत. राजू शेट्टींचा सरकारला स्पष्ट इशारा माध्यमांशी बोलताना राजू शेट्टी यांनी राज्य सरकार, सर्वोच्च न्यायालयाने नेमलेली उच्चाधिकार समिती आणि सर्व प्रशासकीय यंत्रणांना ठणकावून सांगितले आहे. शेट्टी म्हणाले, “नांदणी मठाच्या परिसरात उद्या हजारो नागरिक उपोषण करणार आहेत. आमची एकच मागणी आहे की, 13 सप्टेंबरच्या आत माधुरी हत्तीण नांदणी मठामध्ये आलीच पाहिजे. केवळ ‘तारीख पे तारीख’ देऊन चालणार नाही, आमची माधुरी परत कधी येणार? जर 13 सप्टेंबरच्या आत तिला परत पाठवले नाही, तर गेल्या वर्षी जे जनआंदोलन झाले, त्यापेक्षाही मोठे आंदोलन झाल्याशिवाय राहणार नाही.” नेमके काय आहे ‘माधुरी’ हत्तीणीचे प्रकरण? ‘माधुरी’ ही कोल्हापूर जिल्ह्यातील नांदणी येथील स्वस्तिश्री जिनसेन भट्टारक पट्टाचार्य महास्वामी संस्थान (जैन मठ) येथील हत्तीण आहे. ती अनेक दशकांपासून मठात असल्याने स्थानिक नागरिक आणि जैन धर्मीयांच्या तिच्याशी तीव्र भावनिक व धार्मिक आस्था जोडलेल्या आहेत. मात्र, ‘पेटा’ (PETA) या प्राणिमित्र संघटनेने तिच्या आरोग्याविषयी, एकटेपणाविषयी आणि मठातील देखभालीविषयी सर्वोच्च न्यायालयात तक्रार केली होती. त्यानंतर सर्वोच्च न्यायालयाच्या आदेशानुसार, माधुरीवर विशेष वैद्यकीय उपचार करण्यासाठी तिला जुलै 2024 मध्ये गुजरातच्या जामनगर येथील ‘वनतारा’ प्राणी संवर्धन केंद्रात स्थलांतरित करण्यात आले होते. माधुरीला मठातून हलवल्यामुळे कोल्हापूर जिल्ह्यात संतापाची लाट उसळली होती आणि तेव्हापासूनच तिला पुन्हा मठात आणण्यासाठी राजू शेट्टी आणि ग्रामस्थांनी मोठा कायदेशीर व रस्त्यावरचा लढा उभारला आहे. काय आहेत लोकांच्या प्रमुख मागण्या? स्थानिक नागरिक आणि भाविकांची मुख्य मागणी माधुरीला वनतारातून पुन्हा नांदणी मठात कायमस्वरूपी आणण्याची आहे. मठाने माधुरीच्या देखभालीसाठी आणि उपचारांसाठी 6 एकर जागा देण्याची आणि तिथे ‘वनतारा’च्या सहकार्याने सुसज्ज पुनर्वसन केंद्र उभारण्याची तयारी कायदेशीर सुनावणीत दर्शवली आहे, तरीही तिच्या परतीला उशीर होत आहे. सर्वोच्च न्यायालयाची उच्चाधिकार समिती (HPC), राज्य सरकार आणि वनतारा यांच्यात सकारात्मक चर्चा होऊनही प्रशासकीय आणि कायदेशीर पातळीवर सतत दिरंगाई केली जात आहे. याच प्रशासकीय ‘तारीख पे तारीख’चा निषेध करण्यासाठी हे उपोषण पुकारण्यात आले आहे. मठाचे अनेक ऐतिहासिक आणि धार्मिक सोहळे माधुरीच्या उपस्थितीतच पार पडतात. जैन समाजाच्या अस्मितेचा आणि श्रद्धेचा हा प्रश्न असल्याने, प्रशासनाने तातडीने पावले उचलून १३ सप्टेंबरच्या आत तिची रवानगी पुन्हा कोल्हापुरात करावी, अशी आग्रही मागणी राजू शेट्टी आणि उपोषणकर्त्यांनी केली आहे. हेही वाचा.. NEETनंतर MPSC औषध निरीक्षक भरतीही वादाच्या भोवऱ्यात:पेपरफुटीचे आरोप, उमेदवारांकडून चौकशीची मागणी नीट परीक्षेतील पेपरफुटीच्या वादानंतर आता महाराष्ट्र लोकसेवा आयोगाच्या (MPSC) औषध निरीक्षक भरती प्रक्रियेवरही प्रश्न उपस्थित करण्यात आले आहेत. परीक्षेपूर्वी प्रश्नपत्रिकेतील काही प्रश्न सोशल मीडियावर फिरल्याचा दावा करत दोन उमेदवारांनी महाराष्ट्र लोकसेवा आयोग (MPSC) आणि अन्न व औषध प्रशासनाकडे (FDA) लेखी तक्रार दाखल केली आहे. या प्रकरणाची स्वतंत्र आणि निष्पक्ष चौकशी करून सत्य समोर आणण्याची मागणी त्यांनी केली आहे. दरम्यान, या आरोपांवर पेपरफुटी झाल्याची अधिकृत पुष्टी झालेली नसून, तक्रारीतील आरोपांची छाननी सुरू असल्याचे महाराष्ट्र लोकसेवा आयोगाने म्हणणे आहे. सविस्तर वाचा



Source link