रमाई आवास योजनेच्या पहिल्या हप्त्यात वाढ:लाभार्थ्यांना आता मिळणार 50 हजार रुपये; पालकमंत्री संजय शिरसाट यांची घोषणा

छत्रपती संभाजीनगर येथे रमाई आवास योजनेच्या लाभार्थ्यांसाठी आयोजित लाभ वितरण समारंभात एक महत्त्वाची घोषणा करण्यात आली. या योजनेअंतर्गत घरबांधणीसाठी दिला जाणारा पहिला हप्ता २५ हजार रुपयांवरून ५० हजार रुपये करण्यात येणार आहे, अशी माहिती जिल्ह्याचे पालकमंत्री संजय शिरसाट यांनी दिली. सामाजिक न्याय व विशेष सहाय्य विभाग आणि छत्रपती संभाजीनगर महानगरपालिका यांच्या संयुक्त विद्यमाने हा कार्यक्रम पार पडला. राज्याचे गृहनिर्माण मंत्री अतुल सावे आणि पालकमंत्री संजय शिरसाट यांच्या हस्ते लाभांचे वितरण करण्यात आले. केवळ २५ हजार रुपयांमध्ये घरबांधणी सुरू करणे लाभार्थ्यांसाठी कठीण असल्याने हा निर्णय घेण्यात आल्याचे शिरसाट यांनी स्पष्ट केले. योजनेतील काही अडचणींमुळे लाभार्थ्यांमध्ये निर्माण झालेला संभ्रम दूर करण्यासाठी लाभार्थ्यांची यादी सभागृहाबाहेर लावण्याचे निर्देश देण्यात आले होते, ज्याची अंमलबजावणी प्रशासनाने केली आहे. योजनेच्या कामाला गती देण्यासाठी दर महिन्याच्या १ तारखेला लाभार्थ्यांची अद्ययावत यादी प्रसिद्ध करण्याचे निर्देशही प्रशासनाला देण्यात आले आहेत. समाजकल्याण विभागाचे अधिकारी यापुढे महानगरपालिकेशी समन्वय साधून काम करतील, असेही शिरसाट यांनी नमूद केले. गृहनिर्माण मंत्री अतुल सावे यांनी यावेळी बोलताना सांगितले की, प्रत्येक नागरिकाला स्वतःचे घर मिळावे हे पंतप्रधान नरेंद्र मोदी यांचे स्वप्न आहे. छत्रपती संभाजीनगर कोणत्याही घरकुल योजनेत मागे राहणार नाही, याची दक्षता घेतली जाईल. रमाई आवास योजनेच्या प्रभावी अंमलबजावणीबद्दल त्यांनी महापौर, पदाधिकारी आणि आयुक्तांचे अभिनंदन केले. महापौर समीर राजूरकर यांनी लाभार्थ्यांना मार्गदर्शन करण्यासाठी स्वतंत्र समन्वय समिती स्थापन करण्याची गरज व्यक्त केली. ही समिती कागदपत्रे, योजनेचे टप्पे आणि प्रक्रियेबाबत मार्गदर्शन करेल. घरबांधणीचे काम सुरू होताच दुसरा हप्ता तातडीने मिळावा, अशी अपेक्षाही त्यांनी व्यक्त केली. योजनेची प्रक्रिया ऑनलाइन आणि पारदर्शक पद्धतीने राबविल्याबद्दल त्यांनी प्रशासनाचे कौतुक केले. मनपा आयुक्त अमोल येडगे यांनी प्रास्ताविकात सांगितले की, प्रत्येक पात्र लाभार्थ्याला पारदर्शक आणि न्याय्य पद्धतीने लाभ मिळवून देण्यासाठी महानगरपालिका व प्रशासन कटिबद्ध आहे. त्यांनी योजनेची कार्यपद्धती आणि विविध टप्प्यांची सविस्तर माहिती दिली. या कार्यक्रमाला उपमहापौर राजेंद्र जंजाळ, स्थायी समिती सभापती अनिल मकरिये, गलिच्छ वस्ती निर्मूलन समितीचे सभापती जालिंदर शेंडगे, नगरसेवक त्र्यंबक तुपे, नगरसेविका हर्षदा शिरसाट, कीर्ती शिंदे, अतिरिक्त आयुक्त रणजीत पाटील व कल्पिता पिंपळे, माजी महापौर नंदकुमार घोडेले यांच्यासह महानगरपालिकेचे अधिकारी, कर्मचारी आणि मोठ्या संख्येने लाभार्थी उपस्थित होते.



Source link