बडनेरा मतदारसंघात 47,890 मतदारांचे पत्ते गायब:नावे वगळण्याची भीती, निवडणूक आयोगासमोर मोठा पेच

केंद्रीय निवडणूक आयोगाच्या निर्देशानुसार जिल्ह्यात सुरू असलेल्या मतदार पुनरिक्षण मोहिमेदरम्यान बडनेरा विधानसभा मतदारसंघात एक मोठा पेच निर्माण झाला आहे. या मतदारसंघात तब्बल ४७,८९० मतदारांचे पत्ते गायब झाले आहेत. आयोगाने निश्चित केलेली मुदत संपायला अवघे सात दिवस उरले असल्याने, या मतदारांची नावे मतदार यादीतून वगळली जाण्याची भीती व्यक्त होत आहे. यासंदर्भात राजकीय पक्षांच्या प्रतिनिधींची संयुक्त बैठक घेऊन त्यांनाही माहिती देण्यात आली आहे. या मतदारसंघाचे मतदार नोंदणी अधिकारी, उपजिल्हाधिकारी विवेक जाधव यांच्या मते, मतदार यादीतील पत्ते आणि मतदारांचा प्रत्यक्ष वावर यात तफावत असल्याने ही परिस्थिती उद्भवली आहे. सरकारी यंत्रणेतील बीएलओ (बूथ लेव्हल ऑफिसर) आणि विविध राजकीय पक्षांनी नेमलेले बीएलए (बूथ लेव्हल एजंट) यांच्यामार्फत संबंधित मतदारांचा पत्ता शोधण्याचे काम सुरू आहे. मात्र, गृहभेटी आणि इतर संपर्क माध्यमांचा वापर करूनही ४७,८९० मतदारांशी संपर्क होऊ शकला नाही. त्यामुळे त्यांचे गणना अर्ज अद्याप यंत्रणेपर्यंत पोहोचलेले नाहीत. मतदार यादीच्या सखोल पुनरिक्षण कार्यक्रमात प्रत्येक मतदाराचा गणना अर्ज, त्यांच्या स्वतःच्या किंवा कुटुंबप्रमुखाच्या स्वाक्षरीने प्राप्त होणे आवश्यक आहे. जोपर्यंत ही प्रक्रिया पूर्ण होत नाही, तोपर्यंत त्यांची नावे मतदार यादीत समाविष्ट करता येणार नाहीत. त्यामुळे ज्यांनी अद्याप आपला गणना अर्ज भरून दिलेला नाही, त्यांनी बीएलए किंवा बीएलओमार्फत यंत्रणेशी संपर्क साधून तो त्वरित भरून द्यावा, असे आवाहन जाधव यांनी केले आहे. या मोहिमेअंतर्गत घरोघरी सर्वेक्षण करण्याचा कालावधी ३० जून ते ८ ऑगस्ट २०२६ असा होता. यंत्रणेने प्रत्येक घरापर्यंत पोहोचून संबंधित मतदारांचा शोध घेण्याचा प्रयत्न केला, परंतु मतदार यादीत नोंद असलेल्या पत्त्यावर ते आढळून आले नाहीत. ज्यांनी आपले गणना प्रपत्र भरून दिले आहेत, ती प्रपत्रे डिजिटाईज करण्याची प्रक्रिया सध्या सुरू आहे. त्यानंतर तयार होणारी प्रारूप मतदार यादी आगामी १७ ऑगस्ट रोजी प्रसिद्ध करण्यात येणार आहे. यात बडनेरा विधानसभा मतदारसंघातील ३४५ गावे आणि अमरावती महानगराचा काही शहरी भाग समाविष्ट आहे. यंत्रणेच्या मते, बीएलएंनी मतदार यादीतील नावांबद्दल आपल्या परिसरातील मतदान केंद्रस्तरीय अधिकारी यांच्याशी संपर्क साधून ‘असंग्रहित’ दर्शविलेल्या नावांची पडताळणी करून घ्यावी. जर एखादा पात्र मतदार चुकून ‘असंग्रहित’ म्हणून दर्शविला गेला असेल, तर त्याचे नाव तात्काळ निवडणूक विभागात किंवा संबंधित बीएलओकडे कळवावे. जेणेकरून कोणताही पात्र मतदार वगळला जाणार नाही, असे आवाहनही जाधव यांनी केले आहे.



Source link