राष्ट्रवादी काँग्रेस पक्षाने आपल्या संघटनात्मक बांधणीला बळ देण्यासाठी महिला आणि युवक आघाडीच्या प्रदेशाध्यक्षपदी नवीन नियुक्त्या जाहीर केल्या आहेत. पक्षाच्या राष्ट्रीय अध्यक्षा तथा राज्याच्या उपमुख्यमंत्री सुनेत्रा पवार यांच्या हस्ते या पदाधिकाऱ्यांना नियुक्तीपत्र प्रदान करण्यात आले. या नियुक्त्यांनुसार, वैशाली नागवडे यांची महिला प्रदेशाध्यक्षपदी, तर निखिल ठाकरे यांची युवक प्रदेशाध्यक्षपदी निवड करण्यात आली आहे. या दोन्ही नियुक्त्यांमुळे राज्यभरातील महिला व युवक संघटनांना अधिक सक्षम नेतृत्व मिळणार असल्याचे पक्षाने म्हटले आहे. आगामी स्थानिक स्वराज्य संस्था निवडणुका आणि पक्ष विस्ताराच्या दृष्टीने या नियुक्त्यांना महत्त्वाचे मानले जात आहे. पक्षाची संघटनात्मक ताकद वाढवण्यासाठी हे बदल महत्त्वपूर्ण ठरतील, अशी अपेक्षा व्यक्त केली जात आहे. महिला प्रदेशाध्यक्ष म्हणून नियुक्ती झाल्यानंतर वैशाली नागवडे यांनी पक्ष नेतृत्वाने दाखवलेल्या विश्वासाबद्दल कृतज्ञता व्यक्त केली. राज्यातील महिला कार्यकर्त्यांना संघटित करून पक्षाचे विचार प्रभावीपणे जनतेपर्यंत पोहोचवण्यासाठी आपण कटिबद्ध असल्याचे त्यांनी सांगितले. महिलांचे प्रश्न, सक्षमीकरण आणि संघटन विस्तार यावर विशेष भर देणार असल्याचेही त्यांनी नमूद केले. युवक प्रदेशाध्यक्षपदी नियुक्ती झाल्यानंतर निखिल ठाकरे यांनीही पक्ष नेतृत्वाचे आभार मानले. युवकांना पक्षाशी जोडण्यासाठी राज्यभर व्यापक जनसंपर्क अभियान राबवणार असल्याचे त्यांनी सांगितले. युवकांच्या सहभागातून पक्षाची संघटनात्मक ताकद अधिक वाढवण्यासाठी प्रयत्न करण्यात येतील, असा विश्वास त्यांनी व्यक्त केला. यावेळी पक्षातील वरिष्ठ पदाधिकारी, लोकप्रतिनिधी आणि कार्यकर्ते उपस्थित होते. नव्या पदाधिकाऱ्यांचे अभिनंदन करताना त्यांच्याकडून राज्यभर पक्ष संघटना अधिक मजबूत होईल, असा विश्वास व्यक्त करण्यात आला. या नियुक्त्यांमुळे महिला व युवक आघाडीच्या माध्यमातून राष्ट्रवादी काँग्रेस पक्षाची राज्यातील संघटनात्मक घडी अधिक मजबूत होण्यास मदत होईल, अशी प्रतिक्रिया पक्षाच्या कार्यकर्त्यांकडून व्यक्त करण्यात आली. हेही वाचा.. सुनेत्रा पवारांवरील टीकेचे राज्यभर पडसाद: नाशिक-नागपुरात राष्ट्रवादीचे जोरदार आंदोलन, नाशकात काँग्रेस-राष्ट्रवादीचे कार्यकर्ते आमनेसामने
उपमुख्यमंत्री सुनेत्रा पवार यांच्यावर काँग्रेसने केलेल्या ‘गुंगी गुडिया’ या टीकेचे आता राज्यभर तीव्र पडसाद उमटू लागले आहेत. मुंबई आणि पुण्यापाठोपाठ नाशिक व नागपूरमध्येही राष्ट्रवादी काँग्रेसचे कार्यकर्ते आक्रमक झाले आहेत. नाशिकमध्ये काँग्रेस आणि राष्ट्रवादीचे कार्यकर्ते थेट आमनेसामने आल्याने मोठा तणाव निर्माण झाला होता. यावेळी राष्ट्रवादीकडून काँग्रेस प्रदेशाध्यक्ष हर्षवर्धन सपकाळ यांच्या विरोधात ‘चप्पल मारो’ आंदोलन करण्यात आले. सविस्तर वाचा
Source link
राष्ट्रवादी काँग्रेसच्या महिला, युवक प्रदेशाध्यक्ष जाहीर:वैशाली नागवडे, निखिल ठाकरे यांच्यावर पक्ष विस्ताराची जबाबदारी
