अभिनेत्री आणि लेखिका सोहा अली खान ‘All About Her’च्या माध्यमातून अर्थपूर्ण संवादांचे व्यासपीठ सातत्याने उभारत आहे, जे प्रेक्षकांना आत्मपरीक्षण आणि कृती करण्याची प्रेरणा देते. या मालिकेच्या ताज्या भागात खासदार सुप्रिया सुळे यांनी ज्येष्ठ नेते शरद पवार
.
या संवादादरम्यान सुप्रिया सुळे म्हणाल्या, “माझ्या बाबतीत बोलायचे झाले, तर मला स्त्री असल्यामुळे कोणत्याही प्रकारची विशेष सवलत किंवा आरक्षण मिळावे, असे मला वाटत नाही. कारण माझ्या बाबतीत परिस्थिती अगदी वेगळी होती. माझ्या कुटुंबात किंवा ज्या कुटुंबात माझे लग्न झाले, तिथेही मला कधीही असे सांगण्यात आले नाही. पारंपरिक घरात ज्या प्रकारे वातावरण असते, त्याच्या अगदी उलट माझा अनुभव होता. माझ्या माहेरच्या कुटुंबातील किंवा सिद्धार्थच्या कुटुंबातील, मी पाहिलेल्या सर्व महिला स्वतः निर्णय घेणाऱ्या होत्या. त्यामुळे माझ्या आजूबाजूला नेहमीच खंबीर आणि स्वतंत्र विचारांच्या महिला होत्या. त्यामुळे मला कधीही त्यांच्याकडून कमी लेखले गेल्यासारखे वाटले नाही. आम्ही लहानाचे मोठे होत असताना माझ्या दोन्ही आजी अत्यंत खंबीर होत्या.
आपण नेहमी पुरुषांना कमी लेखत राहू नये
पुढे बोलताना सुप्रिया सुळे म्हणाल्या, मला वाटते की निर्णय घेण्यामागे लिंग हे कारण असता कामा नये. तुम्ही जितक्या उंचावर पोहोचता, तितकाच लिंगभेदाचा मुद्दा कमी महत्त्वाचा ठरला पाहिजे. तुम्ही पुरुष आहात की महिला, याने काय फरक पडतो? तुम्ही तुमची जबाबदारी किती चांगल्या प्रकारे पार पाडता, हे महत्त्वाचे आहे. आणि एक गोष्ट अशी आहे जी अनेकांना माझे म्हणणे आवडत नाही, पण मी ती नेहमी सांगते, आपण नेहमी पुरुषांना कमी लेखत राहू नये. कारण माझ्या आयुष्यातील प्रत्येक महत्त्वाचा निर्णय असा होता, ज्याला एका पुरुषाने पाठिंबा दिला किंवा तो निर्णय घेताना महिलांचा आदर केला. आणि त्याचा माझ्या समानतेकडे पाहण्याच्या दृष्टिकोनावर मोठा प्रभाव पडला आहे.
माझ्या महत्त्वाच्या निर्णयांमध्ये पुरुषांची मोठी भूमिका
सुप्रिया सुळे म्हणाल्या, या देशातील महिलांच्या हक्कांशी आणि माझ्या आयुष्याला आकार देणाऱ्या अनेक महत्त्वाच्या निर्णयांमध्ये पुरुषांचीही मोठी भूमिका राहिली आहे. डॉ. बाबासाहेब आंबेडकर यांनी आपल्याला संविधान दिले, महात्मा ज्योतिबा फुले यांनी महिलांच्या शिक्षणासाठी मोठे काम केले आणि माझ्या स्वतःच्या आयुष्यात माझ्या वडिलांनी असे निर्णय घेतले, ज्यामुळे मला मुलगी असल्यामुळे कधीही कोणत्याही मर्यादेचा अनुभव आला नाही. मी आयुष्याकडे कधीही पुरुषांशी स्पर्धा म्हणून पाहिले नाही. माझ्या आयुष्यात अशा पुरुषांचा सहवास लाभला, ज्यांनी महिलांना पाठिंबा दिला आणि त्यांचा आदर केला. समानतेकडे पाहण्याचा माझा दृष्टिकोन घडवण्यात त्याचा मोठा वाटा आहे.
त्यांच्या या दृष्टिकोनाशी सहमत होत सोहा अली खान यांनी संवादाचा समारोप करताना म्हटले, तुम्ही अगदी बरोबर म्हणत आहात. सर्व पुरुष वाईट नसतात. या शोचे नाव ‘All About Her’ आहे, पण हा शो महिला आणि पुरुष दोघांसाठी आहे. महिलांशी संबंधित विषयांवर होणाऱ्या चर्चांमध्ये प्रत्येकाने सहभागी व्हावे, असा आमचा विश्वास आहे.
राजकारणापलीकडेही हा भाग एका सार्वजनिक व्यक्तिमत्त्वामागील स्त्रीची दुर्मीळ झलक दाखवतो. नृत्यावरील सुप्रिया सुळे यांचे प्रेम, मुलीच्या लग्नाबाबतचे तिचे विचार, सोशल मीडियाबद्दलची तिची मते, फिटनेस, शिस्त आणि नेतृत्व यांसारख्या विविध विषयांवर बोलताना सुप्रिया सुळे यांनी त्यांना वैयक्तिक आणि व्यावसायिकदृष्ट्या घडवणाऱ्या अनुभवांवर प्रकाश टाकला. हा भाग लवचिकता, सार्वजनिक सेवा, महिलांचे नेतृत्व आणि राजकारणातील मानवी बाजू यांवर आधारित एक प्रामाणिक संवाद आहे, जो प्रेक्षकांना राजकारण्यामागील व्यक्तीला अधिक जवळून समजून घेण्याची विचारशील संधी देतो.
