सूस-म्हाळुंगे रस्त्यावरील खड्ड्यांमुळे झालेल्या अपघातात एका दहा वर्षांच्या मुलाचा मृत्यू झाला होता. या मुलाच्या कुटुंबाला तातडीने सहा लाख रुपये नुकसानभरपाई द्यावी, अशी सूचना पुणे महानगरपालिकेच्या स्थायी समितीचे अध्यक्ष श्रीनाथ भिमाले यांनी महापालिका आयुक्त नवल किशोर राम यांना केली आहे. उच्च न्यायालयाच्या आदेशाची अंमलबजावणी करत, महापालिकेने स्वतःहून हे प्रकरण संबंधित समितीसमोर मांडावे आणि नुकसानभरपाईची प्रक्रिया त्वरित सुरू करावी, असे भिमाले यांनी आयुक्तांना लिहिलेल्या पत्रात नमूद केले आहे. सूस-म्हाळुंगे रस्त्यावरील खड्ड्यांमुळे दुचाकी घसरून झालेल्या या दुर्घटनेत दहा वर्षांच्या मुलाचा मृत्यू झाला होता. या घटनेमुळे शहरातील रस्त्यांवरील खड्ड्यांचा प्रश्न पुन्हा एकदा ऐरणीवर आला आहे. याच पार्श्वभूमीवर भिमाले यांनी आयुक्तांना पत्र पाठवून मृत मुलाच्या कुटुंबाला न्यायालयाच्या आदेशानुसार नुकसानभरपाई देण्याची सूचना केली. मुंबई उच्च न्यायालयाने १३ ऑक्टोबर २०२५ रोजी दिलेल्या आदेशानुसार, खड्डे किंवा उघड्या गटारांमुळे मृत्यू झाल्यास संबंधित व्यक्तीच्या कायदेशीर वारसांना सहा लाख रुपये नुकसानभरपाई देण्याचे निर्देश आहेत. तसेच, अपघातात जखमी झालेल्यांनाही दुखापतीच्या स्वरूपानुसार नुकसानभरपाई देण्याची तरतूद असल्याचे भिमाले यांनी पत्रात स्पष्ट केले आहे. न्यायालयाच्या आदेशानुसार, संबंधित स्थानिक स्वराज्य संस्थेने प्रथम नुकसानभरपाई द्यायची असते. त्यानंतर चौकशीत दोषी आढळलेल्या अधिकारी, अभियंता किंवा कंत्राटदाराकडून ही रक्कम वसूल करण्याची कार्यवाही करता येते. अशा प्रकरणांवर महापालिका आयुक्त आणि जिल्हा विधी सेवा प्राधिकरणाच्या सचिवांचा समावेश असलेली समिती निर्णय घेते. सूस-म्हाळुंगे येथील दुर्घटनेतील मुलाचा मृत्यू खड्ड्यांमुळे झाल्याचे प्रथमदर्शनी स्पष्ट होत असल्यास, महापालिकेने तक्रारीची वाट न पाहता स्वतःहून हे प्रकरण समितीसमोर दाखल करावे आणि सहा लाख रुपये नुकसानभरपाई देण्याची कार्यवाही तातडीने सुरू करावी, असे भिमाले यांनी पत्रात म्हटले आहे.
Source link
खड्ड्यांमुळे मृत मुलाच्या कुटुंबाला 6 लाखांची भरपाई द्या:स्थायी समिती अध्यक्ष श्रीनाथ भिमाले यांची आयुक्तांना सूचना
