पुण्यात पाचव्या आंतरराष्ट्रीय पर्यटन लघुपट महोत्सवाचे आयोजन करण्यात आले आहे. २६ आणि २७ सप्टेंबर रोजी बाणेर येथील यशदाच्या लेझीम हॉलमध्ये हा महोत्सव होईल. पर्यटन स्थळे, सांस्कृतिक परंपरा आणि ऐतिहासिक वारसा चित्रपटांच्या माध्यमातून जगभरातील प्रेक्षकांपर्यंत पोहोचवणे, हा या महोत्सवाचा मुख्य उद्देश आहे. जागतिक पर्यटन दिनानिमित्त परभन्ना फाउंडेशन, महाराष्ट्र पर्यटन विभाग, दादासाहेब फाळके चित्रनगरी आणि अखिल भारतीय मराठी चित्रपट महामंडळ यांनी मिळून याचे आयोजन केले आहे. या महोत्सवात लघुपट दाखवण्यासोबतच मुलाखती, चर्चासत्रे, गटचर्चा आणि मार्गदर्शनपर सत्रे आयोजित केली आहेत. चित्रपट उद्योग आणि पर्यटन क्षेत्रातील संबंध अधिक मजबूत करणे, तसेच चित्रपट विद्यार्थी, शिक्षणतज्ज्ञ, पर्यटन व्यावसायिक, प्रवासविषयक सामग्री बनवणारे आणि व्लॉगर्स यांना एकाच व्यासपीठावर आणण्याचा प्रयत्न यातून केला जाईल. या पत्रकार परिषदेला महोत्सवाचे प्रमुख गणेश चप्पलवार, सल्लागार समिती सदस्य डॉ. राजीव घोडे, जीवराज चोले, समन्वय समिती सदस्य पवन घटकांबळे, अजित मांदळे, साहिल भोसले आणि भावना संचेती उपस्थित होते. परभन्ना फाउंडेशनचे अध्यक्ष गणेश चप्पलवार यांनी सांगितले की, ‘चित्रपटांच्या माध्यमातून पर्यटनाचा प्रचार’ ही महोत्सवाची मुख्य संकल्पना आहे. महाराष्ट्रातील पर्यटन स्थळे, लोकपरंपरा, संस्कृती आणि समृद्ध वारसा प्रभावीपणे दाखवण्यासाठी चित्रपट हे एक महत्त्वाचे माध्यम आहे. त्यामुळे पर्यटनविषयक चांगल्या कथांना प्रोत्साहन देणे आणि नवीन तसेच अनुभवी चित्रपट निर्मात्यांना आंतरराष्ट्रीय व्यासपीठ मिळवून देणे, हा महोत्सवाचा उद्देश आहे. या वर्षीच्या महोत्सवासाठी लघुपट, माहितीपट, व्लॉग आणि विद्यार्थी चित्रपट या विभागांतून एकूण ७८ अर्ज आले आहेत. त्यापैकी अंतिम निवड झालेले २५ हून अधिक चित्रपट दाखवले जातील. प्रवासवर्णन स्पर्धेसाठी २३, तर छायाचित्रण विभागासाठी १०६ अर्ज मिळाले आहेत. यामुळे पर्यटन आणि दृक्-माध्यमांच्या एकत्र येण्याने नवीन कल्पनांना व्यासपीठ मिळेल. या महोत्सवात सर्वोत्कृष्ट लघुपट, उपविजेता, विशेष परीक्षक उल्लेख, सर्वोत्कृष्ट दिग्दर्शक, माहितीपट आणि व्लॉग विभागातील पुरस्कार दिले जातील. विद्यार्थी विभागातही अनेक पुरस्कारांसह प्रवासवर्णन स्पर्धेतील पहिल्या, दुसऱ्या आणि तिसऱ्या क्रमांकाच्या विजेत्यांचा सत्कार केला जाईल. महाराष्ट्र पर्यटन आणि वारी पर्यटनासाठी विशेष सन्मान पुरस्कारही दिले जातील. या महोत्सवाला मुंबई, ठाणे, छत्रपती संभाजीनगर, सातारा, कोल्हापूर, चंद्रपूर आणि नागपूर येथून प्रेक्षक आणि प्रतिनिधी येतील. चित्रपट निर्माते, कलाकार, लेखक, छायाचित्रण दिग्दर्शक, विद्यार्थी, पर्यटन व्यावसायिक आणि पर्यटनप्रेमींसाठी हा महोत्सव महत्त्वाचा ठरेल.
Source link
पुण्यात आंतरराष्ट्रीय पर्यटन लघुपट महोत्सव:26-27 सप्टेंबरला यशदामध्ये 25 हून अधिक लघुपट दाखवले जातील; पर्यटनाला प्रोत्साहन मिळेल
