किशोर आवारे खून खटल्यात साक्षीदारांवर दबाव आणल्याचा आरोप:साक्ष बदलण्यासाठी धमक्या, 20 लाखांचा व्यवहार आणि बंदुकीचा धाक दाखवल्याचा दावा

तळेगाव दाभाडे येथील जनसेवा विकास समितीचे अध्यक्ष किशोर आवारे यांच्या खून खटल्यात साक्षीदारांवर दबाव आणला जात असल्याचा आरोप आहे. साक्ष बदलण्यासाठी धमकी, बंदुकीचा धाक, मध्यरात्री घरी जाऊन धमकावणे तसेच पोलिस संरक्षण काढून घेण्यात आल्याचे दावे साक्षीदारांनी पिंपरीतील पत्रकार परिषदेत केले. आवारे यांच्या हत्येसाठी २० लाख रुपयांचा व्यवहार झाल्याचा दावाही यावेळी केला. किशोर आवारे यांची १२ मे २०२३ रोजी तळेगाव नगरपरिषदेसमोर गोळ्या झाडून हत्या झाली. या प्रकरणाचा सत्र खटला क्रमांक ५४/२०२३ वडगाव मावळ येथील अतिरिक्त सत्र न्यायालयात सुरू आहे. तपासातील इलेक्ट्रॉनिक पुरावे आणि प्रत्यक्षदर्शी साक्षीदारांचे जबाब महत्त्वाचे असल्याचे प्रसिद्धीपत्रकात म्हटले आहे. साक्षीदार मोहसीन मुलाणी यांनी हत्येपूर्वी कटाची माहिती मिळाल्याचा आणि आवारे यांना सावध केल्याचा दावा केला. सुधाकर शेळके यांनी आपल्यासमोर आवारे यांच्या हत्येसाठी २० लाख रुपये दिल्याचा दावा मुलाणी यांनी केल्याचे म्हटले आहे. जबाब बदलण्यासाठी आपल्यावर दबाव आणल्याचाही त्यांचा आरोप आहे. प्रत्यक्षदर्शी साक्षीदार आकाश जगताप यांनी घटनेचे मोबाईलमध्ये चित्रीकरण केल्याचा दावा केला आहे. संदीप गराडे यांनी डोक्याला बंदूक लावून साक्ष देऊ नये, अशी धमकी दिल्याचा आरोप जगताप यांनी केला आहे. अनिल पवार यांनी पोलिस संरक्षण काढून घेतल्याचा, तसेच राजकीय पदाचा गैरवापर करून आपल्यावर मोक्का कारवाई केल्याचा दावा केला. संदीप गराडे यांनी फोनवरून धमकी दिल्याचाही आरोप त्यांनी केला. दत्तात्रय पारगे यांनी जानेवारी २०२६ मध्ये खोटी साक्ष देण्यासाठी दबाव आणल्याचा, तर ३० मार्चला मध्यरात्री घरी येऊन धमकावल्याचा दावा केला. मिलिंद अच्युत यांनीही धमकी मिळाल्याचे न्यायालयाच्या निदर्शनास आणून दिल्याचे म्हटले आहे. त्यानंतर काही साक्षीदारांना पोलिस संरक्षण देण्यात आले. साक्षीदारांना धमक्या देणाऱ्यांवर कारवाई करून महत्त्वाच्या साक्षीदारांना सातत्याने संरक्षण द्यावे, अशी मागणी पत्रकार परिषदेत करण्यात आली. दरम्यान, २० लाखांच्या व्यवहाराचा दावा, धमक्यांचे आरोप, पोलिस संरक्षण आणि मोक्का कारवाईबाबतचे दावे संबंधित व्यक्तींनी केले आहेत. त्यांची स्वतंत्र न्यायालयीन पडताळणी होणे बाकी आहे. या प्रकरणाची उच्च न्यायालयातील पुढील सुनावणी २४ सप्टेंबर, तर वडगाव मावळ सत्र न्यायालयातील सुनावणी १ ऑक्टोबर २०२६ रोजी होणार असल्याचे म्हटले आहे.



Source link