पुणे शहरात विवाह संकेतस्थळावर ओळखीतून एका तरुणीची २८ लाख रुपयांची फसवणूक झाली आहे. आरोपीने विवाहाचे आमिष दाखवून पैसे उकळले. या प्रकरणी फसवणूक आणि माहिती-तंत्रज्ञान कायद्यान्वये गुन्हा दाखल करण्यात आला आहे. ही तरुणी उच्चशिक्षित असून, तिने विवाहविषयक संकेतस्थळावर नोंदणी केली होती. पोलिसांनी दिलेल्या माहितीनुसार, आरोपीने तिच्याशी संपर्क साधला आणि तुर्कीतील एका कंपनीत उच्चपदस्थ अधिकारी असल्याचे सांगितले. आरोपीने विवाहासाठी उत्सुक असल्याचे भासवून तरुणीला जाळ्यात ओढले. त्याने आपले तुर्कीतील बँक खाते काही कारणास्तव गोठवले असल्याचे सांगून तातडीने पैशांची गरज असल्याचे सांगितले. तरुणीने गेल्या पाच ते सहा महिन्यांत आरोपीच्या बँक खात्यात वेळोवेळी २७ लाख ९४ हजार रुपये पाठवले. पैसे मिळाल्यानंतर आरोपीने आपला मोबाइल क्रमांक बंद केला. फसवणूक झाल्याचे लक्षात आल्यावर तरुणीने विश्रांतवाडी पोलीस ठाण्यात तक्रार दिली. पोलीस उपनिरीक्षक एस. रेवले या प्रकरणाचा तपास करत आहेत. दरम्यान, शेअर बाजारात गुंतवणुकीचे आमिष दाखवून एका ज्येष्ठ नागरिकाची १८ लाख ६० हजार रुपयांची फसवणूक झाल्याचा आणखी एक प्रकार समोर आला आहे. कोथरूड भागात राहणारे ६० वर्षीय सेवानिवृत्त ज्येष्ठ नागरिक यांनी जून महिन्यात समाज माध्यमांवर शेअर बाजारातील गुंतवणुकीची जाहिरात पाहिली होती. जाहिरातीत चांगल्या परताव्याचे आमिष दाखवले होते. त्यांनी सायबर चोरट्याच्या मोबाइल क्रमांकावर संपर्क साधला. चोरट्याने त्यांना शेअर बाजारात गुंतवणूक केल्यास चांगला परतावा मिळेल असे सांगून १८ लाख ६० हजार रुपये गुंतवण्यास सांगितले. पैसे गुंतवल्यानंतर त्यांना कोणताही परतावा मिळाला नाही, तसेच गुंतवलेली रक्कमही परत मिळाली नाही. या प्रकरणी ज्येष्ठ नागरिकांनी अलंकार पोलीस ठाण्यात फिर्याद दिली आहे. गुन्हे शाखेचे पोलीस निरीक्षक एन. पाटील तपास करत आहेत.
Source link
विवाह संकेतस्थळावर ओळखीतून तरुणीची 28 लाखांची फसवणूक:आरोपीने तुर्कीतील अधिकारी असल्याचे भासवून पैसे उकळले; गुन्हा दाखल
