मुंबईच्या टिळक नगर येथील आर. एस. मणी कॅफेजवळील रोड क्रमांक 13 वर असलेल्या एका 15 मजली इमारतीला आग लागण्याची घटना घडली आहे. अग्निशामक दलाने तात्काळ बचावकार्य करत इमारतीत अडकलेल्या 33 रहिवाशांची सुखरूप सुटका केल्याने मोठी दुर्घटना टळली आहे. या घटनेत कोणतीही जीवितहानी झालेली नाही. ही दुर्घटना तळ अधिक 15 मजले असलेल्या इमारत क्रमांक 110 (‘बी’ विंग) मध्ये घडली. इमारतीच्या चौथ्या मजल्यावरील फ्लॅट क्रमांक 402 मध्ये अचानक आगीचा भडका उडाला. या आगीमध्ये घरातील विद्युत वायरिंग, वीज उपकरणे, फॉल्स सिलिंग, लाकडी फर्निचर आणि महत्त्वाची कागदपत्रे जळून खाक झाली आहेत. तातडीने बचावकार्य आणि आगीवर नियंत्रण आगीची माहिती मिळताच महापालिकेचे अग्निशामक दल, स्थानिक पोलीस, महापालिका वॉर्ड व बी अँड एफ कर्मचारी, वीज वितरण कंपनी आणि 108 रुग्णवाहिका पथक तातडीने घटनास्थळी दाखल झाले. अग्निशामक दलाच्या जवानांनी तात्काळ कारवाई करत इमारतीत अडकलेल्या एकूण 33 रहिवाशांची सुरक्षित सुटका केली आणि त्यांना इमारतीच्या गच्चीवर हलवले. श्वासोच्छ्वास उपकरणे (BA Sets) परिधान केलेल्या अग्निशामक दलाच्या दोन जवानांनी एका छोट्या होज लाईनच्या साहाय्याने अथक प्रयत्नांनंतर या आगीवर पूर्णपणे नियंत्रण मिळवले. या संपूर्ण आगीच्या घटनेत सुदैवाने कोणतीही जीवितहानी अथवा कोणीही जखमी झालेले नाही.
Source link
टिळक नगरमध्ये 15 मजली इमारतीला आग:अग्निशामक दलाने 33 रहिवाशांना सुरक्षित बाहेर काढले, मोठी जीवितहानी टळली
