दगडूशेठ गणपती मंडपात श्री मोरया गोसावी पालखी सोहळ्याचे स्वागत:श्रीमंत दगडूशेठ हलवाई ट्रस्टतर्फे उत्सवाच्या 134 व्या वर्षी स्वागत व आरती

श्री मोरया गोसावी यांची पालखी परंपरा दरवर्षी भाद्रपद महिन्यात मोरगाव येथून परत येताना श्रीमंत दगडूशेठ हलवाई गणपती उत्सव मंडपात येते. यावर्षीही पायी पालखी सोहळा उत्सव मंडपात पोहोचला. दगडूशेठ गणपती ट्रस्टच्या विश्वस्त आणि पदाधिकाऱ्यांनी पालखीचे स्वागत करून आरती केली. चिंचवड देवस्थानच्या विश्वस्तांनीही श्री दगडूशेठ गणपतीची आरती केली. श्रीमंत दगडूशेठ हलवाई सार्वजनिक गणपती ट्रस्ट आणि सुवर्णयुग तरुण मंडळाने उत्सवाच्या १३४ व्या वर्षी चिंचवड देवस्थान ट्रस्टच्या पालखीचे स्वागत केले. यावेळी चिंचवड देवस्थान ट्रस्टचे मुख्य विश्वस्त मंदार महाराज देव, दगडूशेठ गणपती ट्रस्टचे अध्यक्ष सुनील रासने, कोषाध्यक्ष महेश सूर्यवंशी, सहचिटणीस अमोल केदारी उपस्थित होते. सुवर्णयुग तरुण मंडळाचे सौरभ रायकर, मंगेश सूर्यवंशी, विनायक रासने, सचिन आखाडे यांच्यासह इतर विश्वस्त, पदाधिकारी आणि कार्यकर्तेही उपस्थित होते. श्री मोरया गोसावी विनायकी चतुर्थीला मोरगावला जात असत. एकदा त्यांना मयुरेश्वराने दृष्टांत दिला की, ते आता वृद्ध झाले आहेत आणि त्यांचे कष्ट पाहवत नाहीत, त्यामुळे मयुरेश्वर स्वतः त्यांच्या घरी येतील. या दृष्टांतानुसार, चिंचवडमधील गणेश कुंडात कऱ्हा नदीच्या काठी मयुरेश्वराची मूर्ती सापडली. श्री मोरया गोसावी यांनी ती मूर्ती चिंचवडमधील मंगलमूर्ती वाड्यात स्थापन केली. तेव्हापासून दर माघ आणि भाद्रपद महिन्यात श्री मंगलमूर्ती (प्रति मयुरेश्वर) पालखीतून मोरगावला श्री मयुरेश्वराच्या भेटीला जाते. माघ महिन्यात ही पालखी रथातून चिंचवड ते मोरगाव प्रवास करते, तर भाद्रपद महिन्यात युवा कार्यकर्ते पालखी खांद्यावर घेऊन जातात. या दोन्ही वेळी मोरगावमध्ये दिवाळीसारखे वातावरण असते. दर तृतीयेला पालखी मोरगावला पोहोचते. चतुर्थीला पूजा, आवर्तने, छबिना आणि पंचमीला अन्नदान असे कार्यक्रम होतात. त्यानंतर षष्ठीला पालखी परतीच्या प्रवासाला निघते. पुण्यात श्री दगडूशेठ गणपती मंडपात आल्यावर दगडूशेठ गणपती ट्रस्टचे विश्वस्त आणि व्यवस्थापनामार्फत पालखीचे स्वागत व आरती केली जाते. चिंचवड देवस्थान ट्रस्टचे मुख्य विश्वस्त मंदार महाराज देव हे श्री दगडूशेठ गणपतीची आरती करतात. मोरगावला जाताना श्री कसबा गणपतीलाही पालखीचे स्वागत होते आणि परतीच्या प्रवासात शेवटी दगडूशेठ गणपतीला पालखी येते.



Source link