चार महिन्यांपूर्वी कोयत्याच्या प्राणघातक हल्ल्यातून बचावले:आता घरातच घेतला गळफास; शिवसेनेचे माजी तालुकाप्रमुख शिवाजीराव शिंदेंच्या आत्महत्येने बीड हादरले

शिवसेना (शिंदे गट) चे माजी तालुकाप्रमुख तथा दादाहरी वडगावचे माजी सरपंच शिवाजीराव शिंदे यांनी आपल्या राहत्या घरी गळफास घेऊन आत्महत्या केल्याची धक्कादायक घटना समोर आली आहे. अवघ्या चार महिन्यांपूर्वी परळीतील स्वतःच्या हॉटेलमध्ये झालेल्या भीषण कोयता हल्ल्यातून ते कसेबसे बचावले होते; मात्र आता त्यांनी अचानक टोकाचे पाऊल उचलत जीवन संपवल्यामुळे बीड जिल्ह्यासह संपूर्ण महाराष्ट्राच्या राजकीय वर्तुळात प्रचंड खळबळ उडाली आहे. घटनेची माहिती मिळताच पोलिसांनी घटनास्थळी धाव घेऊन पंचनामा केला असून, मृतदेह शवविच्छेदनासाठी उपजिल्हा रुग्णालयात पाठवला आहे. त्यांच्या या अकस्मात जाण्याने दादाहरी वडगाव परिसरावर शोककळा पसरली असून राजकीय क्षेत्रातून तीव्र हळहळ व्यक्त केली जात आहे. नेमकी काय आहे घटना? मिळालेल्या प्राथमिक माहितीनुसार, शिवाजीराव शिंदे यांनी बीड जिल्ह्यातील दादाहरी वडगाव येथील आपल्या राहत्या घरात गळफास लावून घेतला. कुटुंबीयांच्या ही बाब लक्षात येताच एकच आक्रोश झाला. घटनेची माहिती मिळताच बीड ग्रामीण पोलिसांनी तातडीने घटनास्थळी पोहोचून पंचनामा केला आणि मृतदेह ताब्यात घेतला. त्यांनी नेमक्या कोणत्या विवंचनेतून किंवा दबावातून हे टोकाचे पाऊल उचलले, याचे अधिकृत कारण अद्याप स्पष्ट झालेले नाही. घटनास्थळी कोणतीही चिठ्ठी (सुसाईड नोट) सापडली आहे का, याचाही पोलीस कसून शोध घेत आहेत. चार महिन्यांपूर्वीच परळीत झाला होता जीवघेणा कोयता हल्ला शिवाजीराव शिंदे हे चार महिन्यांपूर्वी परळी शहरात भरदिवसा झालेल्या एका रक्तरंजित हल्ल्यामुळे राज्यभरात चर्चेत आले होते. 26 मे रोजी दुपारी साडेतीन वाजेच्या सुमारास शिवाजीराव शिंदे हे परळीतील मोंढा भागातील त्यांच्या ‘रिद्धी-सिद्धी’ हॉटेलवर पत्नीसह थांबलेले असताना, काही तरुणांनी अचानक हॉटेलमध्ये घुसून त्यांच्यावर कोयता व इतर धारदार शस्त्रांनी सपासप वार केले होते. डोक्यात होणारा वार हातावर झेलल्यामुळे शिंदे यांच्या हाताची बोटे निकामी झाली होती, तसेच हात आणि पायावर गंभीर जखमा झाल्या होत्या. त्यांना वाचवण्यासाठी धावून आलेल्या त्यांच्या पत्नीलाही हल्लेखोरांनी बेदम मारहाण केली होती आणि गल्ल्यातील रोख रक्कम लुटून नेली होती. रक्ताच्या थारोळ्यात पडलेल्या शिंदे यांच्यावर अंबाजोगाई येथील स्वामी रामानंद तीर्थ रुग्णालयात दीर्घकाळ उपचार सुरू होते. मुलाच्या वादातून हल्ल्याची झाली होती कुरापत या हल्ल्यानंतर खुद्द शिवाजीराव शिंदे यांनी माध्यमांसमोर आपबीती कथन केली होती. सुरवसे नावाच्या मुलाचा आणि त्यांच्या मुलाचा वाद झाला होता. त्या वादातून त्या मुलाने गावात येऊन शिवीगाळ केली होती; मात्र शिंदे यांनी समजूत काढून त्याला पाठवले होते. तरीही दुसऱ्या दिवशी कट रचून साथीदारांसह हॉटेलवर हल्ला करण्यात आला होता. या हल्ल्यामुळे त्यांच्या कुटुंबावर प्रचंड मानसिक ताण निर्माण झाला होता. हल्ल्याच्या धक्क्यातून उचलले पाऊल? पोलिसांकडून सखोल तपास सुरू चार महिन्यांपूर्वी झालेल्या हल्ल्यातील शारीरिक आणि मानसिक आघातातून ते पूर्णपणे सावरले नव्हते. त्या जुन्या वादाची किंवा हल्लेखोरांच्या दहशतीची या आत्महत्येमागे काही पार्श्वभूमी आहे का? की इतर काही कौटुंबिक, आर्थिक अथवा राजकीय कारणांमुळे त्यांनी हे टोकाचे पाऊल उचलले? याचा सखोल तपास बीड पोलीस करत आहेत. शिवाजीराव शिंदे हे आक्रमक आणि जनसंपर्क असलेले नेते म्हणून ओळखले जात होते. त्यांच्या पार्थिवावर शासकीय नियमांनुसार उत्तरीय तपासणी पूर्ण झाल्यानंतर दादाहरी वडगाव येथे शोकाकुल वातावरणात अंत्यसंस्कार करण्यात येणार आहेत. एका लढाऊ नेत्याच्या अशा अनपेक्षित आणि वेदनादायी एक्झिटमुळे परळी व बीड परिसरातील कार्यकर्त्यांमध्ये मोठी शोकभावना व्यक्त होत आहे. ———————– हेही वाचा… देवघराखाली गुप्तधनाची थाप : ‘पैशांचा पाऊस पाडतो अन् आजार पळवतो’ म्हणत 4 लाखांसह सोने लंपास; उल्हासनगरात भोंदूबाबासह 5 जणांवर गुन्हा घरातील गंभीर आजारपण चुटकीसरशी बरे करण्याचे आणि देवघराखाली गाडलेले कोट्यवधींचे गुप्तधन काढून देण्याचे आमिष दाखवून एका महिलेला तब्बल 4 लाख रुपयांची रोकड आणि मौल्यवान सोन्याच्या दागिन्यांचा गंडा घातल्याचा धक्कादायक प्रकार उल्हासनगरमध्ये उघडकीस आला आहे. भोंदूबाबांनी घरातच मांडलेल्या अघोरी पूजेचा आणि फसवणुकीचा संपूर्ण थरार घरातील सीसीटीव्ही (CCTV) कॅमेऱ्यात कैद झाला आहे. हा व्हिडिओ समोर आल्यानंतर उल्हासनगरच्या हिल लाईन पोलीस ठाण्यात बब्बू गुरू, पम्मी गुरूसह एकूण 5 जणांविरोधात जादूटोणाविरोधी कायद्यासह फसवणूक व धमकी दिल्याप्रकरणी गुन्हा दाखल करण्यात आला आहे. येथे वाचा संपूर्ण बातमी



Source link