राज्य शासनाने ‘ट्रिगर-१’च्या निकषांनुसार राज्यातील २६५ तालुके दुष्काळग्रस्त जाहीर केले आहेत. मात्र सातारा जिल्ह्यातील जावली, पाटण, वाई, कराड आणि कोरेगाव हे पाच तालुके या यादीतून बाहेर राहिले आहेत. त्यामुळे या तालुक्यांतील शेतकऱ्यांमध्ये चिंता निर्माण झाली आहे. या पार्श्वभूमीवर सार्वजनिक बांधकाम मंत्री शिवेंद्रसिंहराजे भोसले यांनी महसूल मंत्री चंद्रशेखर बावनकुळे यांच्याशी चर्चा झाल्याचे सांगत ‘ट्रिगर-२’च्या निकषांमध्ये योग्य निर्णय होईल, अशी ग्वाही दिली आहे. ‘ट्रिगर-१’मध्ये अपेक्षित पावसाच्या तुलनेतील तूट आणि संबंधित निकषांच्या आधारे दुष्काळग्रस्त तालुक्यांची घोषणा करण्यात आली. मात्र सातारा जिल्ह्यातील पाच तालुक्यांचा पहिल्या यादीत समावेश झालेला नाही. त्यामुळे या भागातील दुष्काळसदृश परिस्थिती तसेच शेतकऱ्यांच्या अडचणींचा मुद्दा पुढे आला आहे. या पार्श्वभूमीवर शिवेंद्रसिंहराजे भोसले यांनी महसूल मंत्री चंद्रशेखर बावनकुळे यांच्याशी सविस्तर आणि सकारात्मक चर्चा झाल्याचे स्पष्ट केले. विशेषतः जावली तालुक्याबाबत ‘ट्रिगर-२’च्या निकषांनुसार निर्णय होईल, असे त्यांनी सांगितले. जावलीसह इतर तालुक्यांतील शेतकऱ्यांनी चिंता करू नये आणि हवालदिल होऊ नये, असे आवाहनही त्यांनी केले. ‘येत्या काही दिवसांत योग्य निर्णय व्हावा यासाठी पाठपुरावा सुरू आहे,’ असे शिवेंद्रसिंहराजे भोसले यांनी स्पष्ट केले. त्यामुळे ‘ट्रिगर-१’च्या यादीत नाव नसले तरी पुढील प्रक्रियेत साताऱ्यातील या पाच तालुक्यांबाबत निर्णय होण्याची शक्यता आहे. मात्र प्रत्यक्षात दुष्काळग्रस्त तालुका म्हणून समावेश होतो का आणि त्यानुसार शेतकऱ्यांना सवलती मिळतात का, यासाठी शासनाच्या पुढील निर्णयाची प्रतीक्षा आहे. दरम्यान, दुष्काळाच्या मुद्द्यावरून विरोधकांकडून होत असलेल्या टीकेवरही शिवेंद्रसिंहराजे भोसले यांनी प्रतिक्रिया दिली. दुष्काळाचा मुद्दा पुढे करून करण्यात येणारे आरोप बिनबुडाचे असल्याचे त्यांनी म्हटले. विरोधकांकडे केवळ टीका करण्याशिवाय काही उरलेले नाही, असा टोलाही त्यांनी लगावला. राज्यातील २६५ तालुक्यांची ‘ट्रिगर-१’ची यादी जाहीर झाल्यानंतर आता सातारा जिल्ह्याचे लक्ष ‘ट्रिगर-२’च्या निर्णयाकडे लागले आहे. जावली, पाटण, वाई, कराड आणि कोरेगाव या पाच तालुक्यांचा पुढील निर्णयात समावेश होतो का, तसेच तेथील शेतकऱ्यांना दुष्काळी सवलती मिळतात का, याकडे जिल्ह्याचे लक्ष लागले आहे. हेही वाचा… निवडणुका जिंकण्यासाठी कोणाला मदत करत होते?:पृथ्वीराज चव्हाण यांचा सवाल, ज्ञानेश कुमार यांना हटवण्याची केली मागणी मुख्य निवडणूक आयुक्तांकडून अधिकाराचा उघड गैरवापर झाला आहे. ते कोणाला निवडणुका जिंकण्यास मदत करत होते? असा सवाल कॉंग्रेसचे ज्येष्ठ नेते, माजी मुख्यमंत्री पृथ्वीराज चव्हाण यांनी केला आहे. हा विषय अत्यंत गंभीर असून निवडणुका मॅनेज केल्या तर लोकशाहीला काही अर्थच उरणार नाही. त्यामुळे मुख्य निवडणूक आयुक्त ज्ञानेश कुमार यांना पदावरून हटविण्याची मागणी त्यांनी केली आहे.
Source link
साताऱ्याचे पाच तालुके दुष्काळाच्या यादीत नाहीत:‘ट्रिगर-२’मध्ये न्याय मिळेल, शिवेंद्रराजेंची ग्वाही
