महाराष्ट्र लोकसेवा आयोगाच्या (MPSC) परीक्षांमधील कथित गैरप्रकार आणि गोंधळाचा मुद्दा पुन्हा एकदा चांगलाच तापला आहे. परीक्षांमध्ये पारदर्शकता राहिलेली नसल्याचा आरोप करत विद्यार्थी आंदोलन करत असताना आता सत्ताधारी पक्षातील आमदारानेच सरकारसमोर गंभीर प्रश्
.
MPSCच्या परीक्षांमध्ये कथित गैरप्रकार होत असल्याच्या आरोपांवरून राज्यातील स्पर्धा परीक्षा देणाऱ्या विद्यार्थ्यांमध्ये नाराजीचे वातावरण आहे. विविध मागण्यांसाठी पुण्यात विद्यार्थ्यांचे आंदोलन सुरू असून, या पार्श्वभूमीवर विद्यार्थ्यांच्या शिष्टमंडळाने राष्ट्रवादी काँग्रेस (शरदचंद्र पवार) पक्षाचे अध्यक्ष शरद पवार यांचीही भेट घेतली. विद्यार्थ्यांच्या मागण्यांवर सरकारने तातडीने तोडगा काढावा, अशी मागणी होत असतानाच आता सत्ताधारी आमदार संजय गायकवाड यांनी आयोगाच्या कामकाजावरच प्रश्नचिन्ह उपस्थित केले आहे.
‘संपूर्ण MPSC मंडळ बरखास्त करा’
पत्रकार परिषदेत बोलताना संजय गायकवाड यांनी MPSCच्या कामकाजाबाबत अनेक गंभीर आरोप केले. परीक्षांच्या पेपर तपासणीपासून ते भरती प्रक्रियेपर्यंत अनेक ठिकाणी गैरप्रकार होत असल्याचा दावा त्यांनी केला. त्यामुळे केवळ एखाद्या व्यक्तीचा राजीनामा घेण्याऐवजी संपूर्ण आयोगाच्या कामकाजाची चौकशी करून मंडळच बरखास्त करण्याची गरज आहे, असे गायकवाड यांनी म्हटले.
राज्यातील अनेक विद्यार्थी आणि संघटनांकडून MPSC अध्यक्षांच्या राजीनाम्याची मागणी होत असल्याचा उल्लेखही त्यांनी केला. मात्र, या प्रकरणाची व्याप्ती केवळ अध्यक्षांच्या राजीन्यापुरती मर्यादित ठेवता कामा नये, अशी भूमिका त्यांनी मांडली.
‘2018 पासूनच्या प्रकरणांची चौकशी करा’
MPSCच्या कामकाजाबाबत 2018 पासून अनेक प्रश्न उपस्थित होत असल्याचा दावा गायकवाड यांनी केला. छत्रपती संभाजीनगरशी संबंधित काही व्यक्तींची नावे आणि माहिती आपल्याकडे असल्याचे त्यांनी सांगितले. या व्यक्तींच्या मालमत्तेत झालेल्या कथित वाढीची चौकशी करण्याची मागणी त्यांनी केली.
गायकवाड यांनी म्हटले की, आयोगाशी संबंधित व्यक्तींच्या संपत्तीचीही तपासणी झाली पाहिजे. त्यांच्या मालमत्तेत एवढी वाढ कशी झाली, याचा तपास संबंधित यंत्रणांनी करावा. यासाठी आपल्याकडे असलेली कागदपत्रे आणि पुरावे मुख्यमंत्री फडणवीस यांच्याकडे पाठवणार असल्याचे त्यांनी स्पष्ट केले.
फॉरेन्सिक भरती परीक्षेचाही मुद्दा उपस्थित
MPSCच्या परीक्षांपुरताच हा प्रश्न मर्यादित नसल्याचे सांगताना गायकवाड यांनी फॉरेन्सिक विभागाच्या भरती परीक्षेतील कथित गैरप्रकाराचाही उल्लेख केला. भरती परीक्षांच्या प्रक्रियेवर विद्यार्थ्यांचा विश्वास कायम राहण्यासाठी पारदर्शक चौकशी होणे आवश्यक असल्याचे त्यांनी सांगितले.
‘पैसे घेऊन कोणाला पास केले, याचीही चौकशी करा’
परीक्षांमध्ये पैसे घेऊन उमेदवारांना पास केले गेले का, याची चौकशी करण्याची मागणीही गायकवाड यांनी केली. गुणवंत विद्यार्थ्यांना आपल्या गुणवत्तेच्या जोरावर यश मिळायला हवे; मात्र पात्र उमेदवारांना डावलून ओळखीच्या किंवा मर्जीतील व्यक्तींना संधी दिली जात असल्याचा गंभीर आरोप त्यांनी केला.
आयोगाच्या विविध समित्यांवर काम करणाऱ्या व्यक्तींच्या भूमिकेचीही चौकशी करण्याची मागणी त्यांनी केली. कोणत्याही एका सरकारच्या काळातील प्रकरण म्हणून या मुद्द्याकडे न पाहता, यापूर्वीच्या काळात गैरप्रकार झाले असतील तर त्यांचीही चौकशी झाली पाहिजे, अशी भूमिका त्यांनी घेतली.
चार अधिकाऱ्यांच्या संपत्तीची चौकशी करण्याची मागणी
यावेळी गायकवाड यांनी देवानंद शिंदे, शैलेंद्र देवळाणकर, सतीश देशपांडे आणि अभय वाघ या नावांचा उल्लेख करत त्यांच्या संपत्तीची चौकशी करण्याची मागणी केली. या व्यक्तींकडे एवढी संपत्ती कशी आली, याचा तपास झाला पाहिजे, असे ते म्हणाले.
मात्र, गायकवाड यांनी केलेले हे आरोप आणि व्यक्तींविषयी उपस्थित केलेले प्रश्न त्यांच्या दाव्यांच्या स्वरूपात आहेत; त्यांची स्वतंत्र अधिकृत पुष्टी झालेली नाही. त्यामुळे या आरोपांची चौकशी झाल्यानंतरच वस्तुस्थिती स्पष्ट होणार आहे.
मुख्यमंत्र्यांकडे पुरावे देणार
आपल्याकडे या प्रकरणासंदर्भात पत्र आणि काही पुरावे असल्याचा दावा करत गायकवाड यांनी ते मुख्यमंत्री देवेंद्र फडणवीस यांच्याकडे पाठवणार असल्याचे सांगितले. त्यामुळे आता सरकार या आरोपांची दखल घेते का आणि त्यावर कोणती चौकशी सुरू केली जाते, याकडे विद्यार्थ्यांसह संपूर्ण राज्याचे लक्ष लागले आहे.
एकीकडे MPSCच्या परीक्षा प्रक्रियेतील कथित गैरप्रकारांविरोधात विद्यार्थी आंदोलन करत आहेत, तर दुसरीकडे सत्ताधारी आमदारानेच आयोगाच्या कार्यपद्धतीवर गंभीर प्रश्न उपस्थित केल्याने सरकारसमोरील अडचण वाढण्याची शक्यता आहे. त्यामुळे आगामी काळात MPSCचा मुद्दा आणखी चिघळण्याची शक्यता असून, सरकार यावर कोणती भूमिका घेते हे पाहणे महत्त्वाचे ठरणार आहे.
हेही वाचा…..
पुण्यातील MPSC विद्यार्थ्यांच्या आंदोलनाची शरद पवारांनी घेतली दखल:फडणवीसांना फोन, विद्यार्थ्यांशी चर्चेचे आवाहन
महाराष्ट्र लोकसेवा आयोगाच्या (MPSC) परीक्षांशी संबंधित विविध प्रश्नांवरून पुण्यात सुरू असलेल्या विद्यार्थ्यांच्या आंदोलनाची राष्ट्रवादी काँग्रेस (शरद पवार) पक्षाचे अध्यक्ष शरद पवार यांनी दखल घेतली आहे. आंदोलन करणाऱ्या विद्यार्थ्यांच्या प्रतिनिधींनी शरद पवार यांची भेट घेतल्यानंतर पवार यांनी मुख्यमंत्री देवेंद्र फडणवीस यांच्याशी थेट फोनवरून संवाद साधला. विद्यार्थ्यांच्या मागण्यांवर तातडीने चर्चा करून मार्ग काढण्याची विनंती त्यांनी मुख्यमंत्र्यांना केली. सविस्तर वाचा….
