राज्यातील राजकारणात सत्ताधारी आणि विरोधक एकमेकांवर कुरघोडी करण्याची एकही संधी सोडत नसताना, चंद्रपूरमध्ये मात्र दोन कट्टर राजकीय प्रतिस्पर्ध्यांमधील अत्यंत रंजक आणि तितकाच अर्थपूर्ण संवाद कॅमेऱ्यात कैद झाला आहे. काँग्रेसचे ज्येष्ठ नेते तथा विरोधी पक्षनेते विजय वडेट्टीवार आणि भाजपचे ज्येष्ठ नेते सुधीर मुनगंटीवार हे चंद्रपुरात समोरासमोर आले असता, वडेट्टीवारांनी थेट मुख्यमंत्रीपदाचाच विषय छेडला. “आपण दोघेही ‘वार’ आहोत (वडेट्टीवार आणि मुनगंटीवार)… आपल्यापैकी एक ‘वार’ तरी राज्याचा मुख्यमंत्री झालाच पाहिजे!” असे वडेट्टीवारांनी भर गर्दीत मुनगंटीवारांचा हात हातात घेऊन हसतमुखाने सांगितले. विशेष म्हणजे, मुनगंटीवारांनीही यावर दिलखुलास हसत दाद दिली. या अनपेक्षित आणि स्फोटक संवादाचा व्हिडिओ सोशल मीडियावर वाऱ्यासारखा व्हायरल झाला असून, विदर्भातील या दोन मातब्बर नेत्यांच्या मनात नेमकी कोणती खलबते शिजत आहेत, यावर आता राजकीय वर्तुळात जोरदार चर्चा रंगू लागली आहे. रयतवारी कॉलनीतील ‘बथुकम्मा महोत्सवात’ अचानक भेट चंद्रपूर शहरातील रयतवारी कॉलनी परिसरात तेलुगू भाषिक बांधवांच्या वतीने पारंपरिक ‘बथुकम्मा महोत्सवा’चे आयोजन करण्यात आले होते. भाजप नेते सुधीर मुनगंटीवार या कार्यक्रमाला हजेरी लावून बाहेर पडत होते, तर त्याच क्षणी विरोधी पक्षनेते विजय वडेट्टीवार कार्यक्रमाच्या ठिकाणी दाखल झाले. हस्तांदोलन आणि मुख्यमंत्रिपदाची चर्चा दोन्ही पक्षांचे शेकडो कार्यकर्ते आजूबाजूला असताना वडेट्टीवार यांनी पुढे होत मुनगंटीवारांशी अत्यंत आपुलकीने हस्तांदोलन केले. त्यानंतर लगेचच त्यांनी, “आपण दोघेही ‘वार’ आहोत… आपल्यापैकी एक ‘वार’ मुख्यमंत्री झाला पाहिजे,” अशी थेट इच्छा व्यक्त केली. या वक्तव्यावर मुनगंटीवार यांनीही कोणतीही राजकीय कटुता न दाखवता अत्यंत दिलखुलासपणे हसत मान डोलावली. हा संपूर्ण प्रसंग उपस्थितांच्या मोबाईल कॅमेऱ्यात कैद झाला आणि काही मिनिटांतच तो राज्यभरात चर्चेचा विषय ठरला. सुधीर मुनगंटीवारांची अंतर्गत नाराजी आणि राजकीय पार्श्वभूमी राज्यात जेव्हा महायुतीचे सरकार स्थापन झाले, तेव्हा ज्येष्ठतेनुसार सुधीर मुनगंटीवार यांना अत्यंत महत्त्वाचे खाते किंवा उपमुख्यमंत्रिपद मिळेल अशी मोठी चर्चा होती. प्रत्यक्ष मंत्रिमंडळ स्थापनेच्या वेळी मुनगंटीवार यांना महत्त्वाच्या जबाबदाऱ्यांपासून लांब ठेवण्यात आल्याची चर्चा रंगली होती. त्यातून त्यांची अंतर्गत खदखद आणि नाराजी अनेकदा जाहीर विधानांमधून आणि सरकारला आरसा दाखवणाऱ्या वक्तव्यांतून समोर आली होती. पक्षनिष्ठेचा पुनरुच्चार जरी मुनगंटीवार यांनी ‘मी भाजप सोडणार नाही’ असे वेळोवेळी स्पष्ट केले असले, तरी अंतर्गत गटबाजीत त्यांना डावलले जात असल्याची भावना त्यांच्या समर्थकांमध्ये आहे. अशा संवेदनशील काळात विरोधी पक्षातील नेत्याने जाहीर ठिकाणी दिलेली मुख्यमंत्रिपदाची ही ‘ऑफर’ किंवा शुभेच्छा महायुतीमधील संबंधांवर प्रश्नचिन्ह उपस्थित करणारी ठरली आहे. टायगर श्रॉफवरील हल्ल्यावरून वडेट्टीवारांचा सरकारवर घणाघात- हे गृहखात्याचे संपूर्ण अपयश! या अनौपचारिक संवादानंतर पत्रकारांशी बोलताना विजय वडेट्टीवार यांनी कायदा व सुव्यवस्थेच्या मुद्द्यावरून मुख्यमंत्री तथा गृहमंत्री देवेंद्र फडणवीस यांच्यावर तोफ डागली. “मुंबईत अभिनेता टायगर श्रॉफच्या गाडीवर लॉरेन्स बिश्नोई टोळीकडून झालेला गोळीबार हा अत्यंत गंभीर प्रकार आहे. यापूर्वी बाबा सिद्दीकींची हत्या, सलमान खानवर हल्ला आणि आता टायगर श्रॉफ; या सर्व घटनांची जबाबदारी बिश्नोई गँग उघडपणे स्वीकारत आहे. याचा अर्थ दाऊद इब्राहिमनंतर आता बिश्नोई टोळी महाराष्ट्रावर कब्जा करत आहे.” सरकारचे दुर्लक्ष की आशीर्वाद? “मुंबईसारख्या आंतरराष्ट्रीय शहरात दिवसाढवळ्या 7 ते 10 राऊंड गोळ्या झाडल्या जात असतील, तर गृहखात्याचा धाक शिल्लक कुठे आहे? या गुन्हेगारी टोळ्यांच्या साम्राज्यामागे सरकारचेच आशीर्वाद आहेत का, याचा खुलासा गृहमंत्र्यांनी केला पाहिजे,” असा सवाल वडेट्टीवार यांनी उपस्थित केला. —————————————————————— हेही वाचा… महाराष्ट्रात गुंडशाही सरकारपोषित तर नाही ना?: टायगर श्रॉफवरील गोळीबारानंतर नाना पटोलेंचा थेट हल्लाबोल, म्हणाले- महाभ्रष्टयुती सरकार 56% कमिशनखोरीत मग्न “राज्याची राजधानी आणि देशाची आर्थिक राजधानी असलेल्या मुंबईमध्ये दिवसाढवळ्या गोळीबाराचे सत्र सुरू आहे. नेते आणि सेलिब्रिटींवर राजरोसपणे हल्ले होत असताना सामान्य जनतेने कुणाच्या भरवशावर जगायचे? सत्तेत बसलेले महाभ्रष्टयुती सरकार केवळ 56% कमिशनखोरीमध्ये व्यस्त असून, त्यांना राज्याच्या ढासळलेल्या कायदा व सुव्यवस्थेशी काडीचेही देणेघेणे उरलेले नाही. महाराष्ट्रात फोफावलेली ही गुंडशाही सरकारपोषित तर नाही ना, अशी शंका आता निर्माण झाली आहे. देवेंद्र फडणवीस हे महाराष्ट्राच्या इतिहासातील सर्वात अकार्यक्षम गृहमंत्री ठरले असून त्यांनी राज्याच्या कायदा-सुव्यवस्थेचा केलेला बट्ट्याबोळ महाराष्ट्र कधीही विसरणार नाही,” असा घणाघात काँग्रेसचे ज्येष्ठ नेते नाना पटोले यांनी केला आहे.
Source link
आपण दोघेही 'वार' आहोत, आपल्यापैकी एका 'वारा'ने मुख्यमंत्री झालंच पाहिजे!:वडेट्टीवार-मुनगंटीवारांचा चंद्रपुरात दिलखुलास संवाद, 'मन की बात' व्हायरल
