हिवरखेड नगरपालिकेत भाजपकडून शिंदेसेनेला धक्का:4 नगरसेवकांच्या अपात्रतेचा ठराव 15 विरुद्ध 5 मतांनी मंजूर

राज्यात महायुतीच्या माध्यमातून भाजप आणि शिवसेना (शिंदे गट) एकत्र सत्तेत असले, तरी स्थानिक पातळीवर दोन्ही पक्षांमधील मतभेद वारंवार समोर येत आहेत. आता अकोला जिल्ह्यातील हिवरखेड नगरपरिषदेतही या राजकीय संघर्षाची चर्चा सुरू झाली आहे. शिवसेना शिंदे गटाच्या 4 नगरसेवकांना अपात्र ठरवण्यासंदर्भातील प्रस्ताव नगरपरिषदेच्या विशेष सभेत 15 विरुद्ध 5 अशा बहुमताने मंजूर करण्यात आला. विशेष म्हणजे, या प्रस्तावाच्या बाजूने भाजपच्या नगरसेवकांनी मतदान केल्याने महायुतीतील दोन्ही पक्षांमधील स्थानिक राजकीय समीकरणांवर पुन्हा प्रश्न उपस्थित झाले आहेत. हिवरखेड नगरपरिषदेत शिवसेना शिंदे गटाचे एकूण 5 नगरसेवक निवडून आले आहेत. त्यापैकी रवी घुंगड, ऋषिकेश पंचबुद्धे, रामेश्वर हागे आणि श्यामशील भोपळे या 4 नगरसेवकांविरोधात भाजपच्या 12 नगरसेवकांनी अपात्रतेचा प्रस्ताव दाखल केला होता. या प्रस्तावावर निर्णय घेण्यासाठी बुधवारी (4 नोव्हेंबर) नगरपरिषदेत विशेष सभेचे आयोजन करण्यात आले होते. नगराध्यक्ष सुलभा रमेश दुतोंडे यांच्या अध्यक्षतेखाली दुपारी 1 वाजता सभेला सुरुवात झाली. सभेदरम्यान हात वर करून मतदान घेण्यात आले. यामध्ये प्रस्तावाच्या समर्थनार्थ 15 मते, तर विरोधात 5 मते पडली. त्यामुळे चारही नगरसेवकांविरोधातील अपात्रतेचा प्रस्ताव बहुमताने मंजूर झाला. नेमके कोणते आरोप करण्यात आले? या चार नगरसेवकांविरोधात नगरपरिषदेच्या कामकाजाशी संबंधित काही गंभीर आरोप करण्यात आले आहेत. नगरपरिषदेच्या सभागृहात पूर्वपरवानगी न घेता व्हिडिओ शूटिंग करणे आणि छायाचित्रे काढणे, नगरपरिषदेची प्रतिमा मलिन करण्याचा प्रयत्न करणे, तसेच नागरिकांना मालमत्ता कर आणि पाणीपट्टी न भरण्याचे आवाहन सोशल मीडियाच्या माध्यमातून करणे, असे आरोप प्रस्तावात करण्यात आले होते. या आरोपांच्या आधारे भाजपच्या 12 नगरसेवकांनी 8 सप्टेंबर रोजी नगराध्यक्षांकडे लेखी अर्ज सादर केला होता. संबंधित नगरसेवकांच्या कथित वर्तनामुळे नगरपरिषदेच्या कामकाजावर आणि प्रतिष्ठेवर परिणाम होत असल्याचा मुद्दा अर्जात उपस्थित करण्यात आला होता. तसेच या प्रकरणावर चर्चा करून निर्णय घेण्यासाठी विशेष सभा बोलावण्याची मागणी करण्यात आली होती. महाराष्ट्र नगरपरिषद कायद्यातील कलम 42 (1) आणि 42 (3) अंतर्गत Misconduct आणि Disgraceful Conduct या तरतुदींचा आधार घेत संबंधित नगरसेवकांना अपात्र ठरवण्याचा प्रस्ताव मांडण्यात आला. त्यानंतर विशेष सभेत या प्रस्तावावर मतदान घेण्यात आले. भाजपच्या नगरसेवकांसह इतर सदस्यांनीही प्रस्तावाच्या बाजूने मतदान केल्याने तो मंजूर झाला. मात्र, प्रस्ताव मंजूर होणे आणि संबंधित नगरसेवकांची अपात्रता अंतिम होणे या स्वतंत्र प्रक्रिया आहेत. त्यामुळे पुढील कायदेशीर आणि प्रशासकीय प्रक्रियेकडे लक्ष लागले आहे. महायुतीत स्थानिक पातळीवर मतभेद कायम? हिवरखेडमधील या घडामोडीमुळे भाजप आणि शिवसेना शिंदे गटातील स्थानिक संबंध पुन्हा चर्चेत आले आहेत. राज्यात दोन्ही पक्ष महायुतीचा भाग असले, तरी स्थानिक स्वराज्य संस्थांमधील राजकारणात अनेकदा स्वतंत्र भूमिका घेतल्या जात असल्याचे दिसते. हिवरखेडमध्ये भाजप नगरसेवकांनीच शिंदेसेनेच्या चार नगरसेवकांविरोधातील प्रस्तावाला पाठिंबा दिल्याने या राजकीय संघर्षाची चर्चा सुरू झाली आहे. यापूर्वीही विधानपरिषद आणि जिल्हा बँकेच्या निवडणुकांवरून महायुतीतील घटक पक्षांमध्ये मतभेद समोर आल्याचे चित्र होते. सातारा जिल्हा बँकेच्या निवडणुकीनंतरही स्थानिक नेत्यांमध्ये वादाची चर्चा झाली होती. त्यामुळे हिवरखेड नगरपरिषदेतील ताज्या निर्णयाकडे केवळ नगरपरिषदेपुरते मर्यादित न पाहता स्थानिक राजकीय समीकरणांच्या दृष्टीनेही पाहिले जात आहे. भाजपच्या उमेदवाराला काँग्रेस आणि एमआयएमची साथ हिवरखेड नगरपरिषदेत यापूर्वी झालेल्या पदाधिकाऱ्यांच्या निवडीदरम्यानही वेगवेगळ्या पक्षांतील नगरसेवकांच्या भूमिकेमुळे राजकीय चर्चा रंगली होती. भाजपच्या उपसभापती पदाच्या उमेदवाराला काँग्रेस आणि एमआयएमच्या नगरसेवकांनी नामनिर्देशन प्रक्रियेत साथ दिली होती. बालकल्याण समितीच्या उपसभापती पदासाठी भाजपच्या अनिता वाकोडे यांनी उमेदवारी अर्ज दाखल केला होता. या अर्जावर काँग्रेसच्या नगरसेविका रुबिजा अब्दुल सलमान यांनी सूचक म्हणून, तर एमआयएमचे नगरसेवक आजम खान सुभेदार खान यांनी अनुमोदक म्हणून स्वाक्षरी केली होती. त्यामुळे स्थानिक राजकारणात पक्षीय भूमिकांपेक्षा विशिष्ट पदांच्या निवडणुकांमध्ये वेगळी समीकरणे तयार होत असल्याचे दिसून आले होते. हिवरखेड नगरपरिषदेतील पक्षीय बलाबल हिवरखेड नगरपरिषदेत एकूण 20 सदस्य असून नगराध्यक्षपदी भाजपच्या सुलभा दुतोंडे विजयी झाल्या आहेत. नगरपरिषदेतील पक्षीय बलाबल पुढीलप्रमाणे आहे. भाजप : 11 नगरसेवक शिवसेना (शिंदे गट) : 5 नगरसेवक काँग्रेस : 2 नगरसेवक वंचित बहुजन आघाडी : 1 नगरसेवक एमआयएम : 1 नगरसेवक एकूण 20 जागांच्या या नगरपरिषदेत भाजपचे 11 नगरसेवक आहेत. आता शिंदेसेनेच्या चार नगरसेवकांविरोधातील अपात्रतेचा प्रस्ताव मंजूर झाल्याने स्थानिक राजकारणात नव्या घडामोडींना सुरुवात झाली आहे. या प्रस्तावानंतर संबंधित नगरसेवकांकडून काय भूमिका घेतली जाते आणि अपात्रतेच्या प्रक्रियेत पुढे काय निर्णय होतो, याकडे लक्ष लागले आहे. तसेच या प्रकरणाचे पडसाद महायुतीच्या स्थानिक राजकारणात उमटतात का, हे पाहणे महत्त्वाचे ठरणार आहे. हेही वाचा…. नाशिक महापालिकेत भाजपच्या 6 स्वीकृत नगरसेवकांची वर्णी:नऊ महिन्यांपासून रखडलेल्या नियुक्ती प्रक्रियेला अखेर मुहूर्त; पाहा कोणाची झाली निवड एकीकडे नाशिकमध्ये महाकुंभमेळ्याचा उत्साह पाहायला मिळत असून देशभरातील भाविकांची मोठी गर्दी शहरात उसळली आहे. या पार्श्वभूमीवर संपूर्ण प्रशासकीय यंत्रणा कुंभमेळ्याच्या तयारीत व्यस्त असतानाच, नाशिक महानगरपालिकेतील एका महत्त्वाच्या राजकीय घडामोडीला वेग आला. भारतीय जनता पार्टीकडून महापालिकेसाठी आपल्या कोट्यातील सहा स्वीकृत नगरसेवकांची नावे आज अधिकृतरीत्या जाहीर करण्यात आली आहेत. सविस्तर वाचा….



Source link