राष्ट्रवादीच्या विलीनीकरणातून तिसरा गट तयार होणार? संजय शिरसाटांचा नवा दावा:अंतर्गत वादावरही भाष्य

राज्याच्या राजकारणात दोन्ही राष्ट्रवादी काँग्रेसच्या विलीनीकरणाचा मुद्दा पुन्हा एकदा चर्चेच्या केंद्रस्थानी आला आहे. राष्ट्रवादी काँग्रेसचे ज्येष्ठ नेते शरद पवार आणि उपमुख्यमंत्री अजित पवार यांच्या नेतृत्वाखालील दोन्ही गट एकत्र येणार का, याबाबत राजकीय वर्तुळात वेगवेगळे तर्कवितर्क लढवले जात आहेत. अशातच शिवसेना (शिंदे गट) चे मंत्री संजय शिरसाट यांनी या विलीनीकरणाच्या चर्चेवरून एक वेगळीच शक्यता व्यक्त केली आहे. दोन्ही राष्ट्रवादीच्या एकत्र येण्याऐवजी पक्षात तिसरा स्वतंत्र गट निर्माण होऊ शकतो, असा दावा त्यांनी केला आहे. त्यामुळे आधीच चर्चेत असलेल्या राष्ट्रवादीच्या राजकीय समीकरणांना नवे वळण मिळण्याची शक्यता आहे. माध्यमांशी बोलताना संजय शिरसाट यांनी दोन्ही राष्ट्रवादीतील सध्याच्या राजकीय घडामोडींवर भाष्य केले. शरद पवार गट आणि अजित पवार गट यांच्यात विलीनीकरणाबाबत चर्चा सुरू असल्याचे बोलले जात असले, तरी दोन्ही बाजूंकडून एकमेकांवर होणारी टीका आणि अंतर्गत मतभेद पाहता हे एकत्रीकरण प्रत्यक्षात येईल का, याबाबत त्यांनी शंका उपस्थित केली. सकाळी विलीनीकरणाची चर्चा, दुपारी एकमेकांवर टीका संजय शिरसाट म्हणाले की, दोन्ही राष्ट्रवादी काँग्रेसमध्ये सध्या अंतर्गत संघर्ष सुरू असल्याचे चित्र आहे. एका बाजूला विलीनीकरणाबाबत चर्चा केली जाते, तर दुसरीकडे दोन्ही गटांचे नेते एकमेकांच्या विरोधात भूमिका मांडताना दिसतात. सकाळी विलीनीकरणाबाबत बोलायचे आणि दुपारी एकमेकांवर टीका करायची, असे सुरू राहिल्यास दोन्ही पक्षांचे एकत्रीकरण होणे कठीण आहे. दोन्ही गटांमध्ये सुरुवातीपासूनच एकमेकांवर आरोप-प्रत्यारोप होत असतील आणि एकमेकांची उणीदुणी काढली जात असतील, तर अशा परिस्थितीत विलीनीकरणाला काय अर्थ उरतो, असा सवालही त्यांनी उपस्थित केला. या सगळ्या घडामोडींमुळे दोन्ही राष्ट्रवादी एकत्र येण्याऐवजी त्यातून एखादा तिसरा गट तयार होतोय का, अशी शंका निर्माण होत असल्याचे शिरसाट यांनी म्हटले. अजितदादांच्या निधनानंतर विलीनीकरणाच्या चर्चेला पुन्हा महत्त्व दरम्यान, अजित पवार यांच्या निधनानंतर दोन्ही राष्ट्रवादी काँग्रेसच्या विलीनीकरणाचा विषय पुन्हा चर्चेत आला आहे. अजित पवार हयात असताना दोन्ही पक्षांच्या एकत्रीकरणाबाबत चर्चा झाल्याचे दावे करण्यात आले होते. मात्र, या चर्चेवरून दोन्ही बाजूंकडून वेगवेगळ्या भूमिका मांडण्यात आल्या होत्या. काही नेत्यांनी विलीनीकरणाच्या चर्चेचा उल्लेख केला, तर काहींनी अशा प्रकारची कोणतीही चर्चा झाली नसल्याचे सांगितले होते. या पार्श्वभूमीवर माजी मंत्री राजेश टोपे यांनीही विलीनीकरणाच्या मुद्द्यावर आपली भूमिका स्पष्ट केली आहे. विलीनीकरणासारखा महत्त्वाचा निर्णय पक्षाचे नेतृत्व घेत असते. नेतृत्वाने जो निर्णय घेतला, तो आम्हाला मान्य असेल, असे टोपे यांनी सांगितले. विलीनीकरणाचा निर्णय नेतृत्वच घेणार : राजेश टोपे राजेश टोपे म्हणाले की, अजित पवार हयात असताना दोन्ही राष्ट्रवादी काँग्रेसच्या विलीनीकरणाबाबत चर्चा झाल्या होत्या. त्यावेळी नेमकी काय चर्चा झाली होती, याची माहितीही आम्ही दिली होती. मात्र, त्यानंतर दुसऱ्या बाजूच्या नेत्यांनी अशी कोणतीही चर्चा झाली नसल्याचे सांगत हा दावा फेटाळला होता. त्यामुळे त्यावेळी आम्ही या विषयावर अधिक भाष्य करणे टाळले. मात्र, आता पुन्हा एकदा दोन्ही राष्ट्रवादीच्या विलीनीकरणाची चर्चा सुरू झाली असेल, तर त्याबाबतचा अंतिम निर्णय पक्षाचे नेतृत्व घेईल. नेतृत्व जो निर्णय घेईल, तो आम्हाला मान्य असेल, अशी भूमिका राजेश टोपे यांनी मांडली. एकीकडे विलीनीकरणाच्या चर्चेला वेग येत असताना दुसरीकडे दोन्ही राष्ट्रवादीतील नेत्यांच्या परस्परविरोधी विधानांमुळे संभ्रम वाढत आहे. अशा परिस्थितीत दोन्ही पक्षांचे एकत्रीकरण होणार की राष्ट्रवादीत नवा तिसरा गट आकाराला येणार, याकडे आता राज्यातील राजकीय वर्तुळाचे लक्ष लागले आहे. हेही वाचा…. ‘मुख्यमंत्र्यांनी मनात आणले तर एका दिवसात साम्राज्य उद्ध्वस्त होईल’:चंद्रकांत पाटलांचा सतेज पाटलांना इशारा कोल्हापूर जिल्हा सहकारी दूध उत्पादक संघ अर्थात गोकुळच्या अध्यक्षपदाच्या निवडीवरून जिल्ह्यातील राजकीय वातावरण चांगलेच तापले आहे. या निवडणुकीच्या निमित्ताने महायुती आणि महाविकास आघाडीच्या नेत्यांमध्ये आरोप-प्रत्यारोपांच्या फैरी झडत आहेत. काँग्रेसचे आमदार सतेज उर्फ बंटी पाटील यांनी गोकुळच्या अध्यक्षपदाच्या निवडीवरून महायुतीच्या नेत्यांना लक्ष्य केले असताना, आता भाजप नेते आणि मंत्री चंद्रकांत पाटील यांनी त्यांच्यावर गंभीर आरोप केले आहेत. 2019 मध्ये राज्यात सरकार स्थापनेच्या हालचाली सुरू असताना बंटी पाटील यांनी काँग्रेसच्या तत्कालीन अध्यक्षा सोनिया गांधी यांना फोनवरून धमकावल्याचा दावा चंद्रकांत पाटील यांनी केला. यासंदर्भात आपल्याकडे कॉल रेकॉर्डिंग आणि व्हिडिओ असल्याचेही त्यांनी सांगितले. याशिवाय सतेज पाटील यांच्या संपत्तीबाबत प्रश्न उपस्थित करत तिची चौकशी करण्याची मागणीही त्यांनी केली. सविस्तर वाचा…..



Source link