अमरावती येथील पठाण चौक परिसरात एका बंद रुग्णालयाच्या पाण्याच्या टाकीत अज्ञात व्यक्तीचा मृतदेह आढळला. बुधवारी, १३ मे रोजी सकाळी ही घटना उघडकीस आली, ज्यामुळे परिसरात खळबळ उडाली. मृतदेहाची अवस्था अत्यंत खराब असल्याने त्याची ओळख अद्याप पटलेली नाही. पोलिसांनी दिलेल्या माहितीनुसार, डॉ. वजीर पटेल यांच्या संस्थेद्वारे चालवले जाणारे हे रुग्णालय अनेक दिवसांपासून बंद होते. गेल्या काही दिवसांपासून परिसरात तीव्र दुर्गंधी येत असल्याने स्थानिक नागरिकांना संशय आला. नगरसेवक राशीद अली आणि सामाजिक कार्यकर्ते वाहिद खान यांनी नागपुरी गेट पोलिसांना याची माहिती दिली. पोलिसांनी घटनास्थळी पोहोचून छतावरील पाण्याच्या टाक्यांची पाहणी केली असता, एका टाकीत अज्ञात व्यक्तीचा सडलेल्या अवस्थेतील मृतदेह तरंगताना आढळला. तत्काळ फॉरेन्सिक पथक आणि श्वान पथकाला पाचारण करण्यात आले. पंचनामा करून मृतदेह शवविच्छेदनासाठी पाठवण्यात आला आहे. रुग्णालय कुलूपबंद असताना हा व्यक्ती तेथे कसा पोहोचला, तो नेमका कोण आहे, त्याचा मृत्यू तेथेच झाला की पुरावा लपवण्यासाठी मृतदेह टाकीत टाकण्यात आला, असे अनेक प्रश्न यानिमित्ताने उपस्थित झाले आहेत. हा आत्महत्येचा प्रकार असू शकतो, असाही काही जणांचा अंदाज आहे. या पार्श्वभूमीवर परिसरातील सीसीटीव्ही फुटेज तपासण्याचे काम सुरू असून, नागपुरी गेट पोलीस सर्व बाजूंनी तपास करत आहेत.
Source link
बंद रुग्णालयाच्या पाण्याच्या टाकीत मृतदेह आढळला:हत्या की आत्महत्या? पोलीस तपास सुरू
