नवी मुंबईतील सीबीडी बेलापूर येथील पारसिक हिल परिसरात गुरुवारी दुपारी अंगावर काटा आणणारा अत्यंत भीषण आणि विचित्र अपघात घडला. पारसिक हिलच्या उंचावरील डोंगरावरून चालकाचे नियंत्रण सुटल्याने एक भरधाव कार थेट शेकडो फूट खाली असलेल्या पनवेल-उरण रेल्वे रुळावर
.
नेमका कसा घडला अपघात?
मिळालेल्या प्राथमिक माहितीनुसार, गुरुवारी दुपारी 3 ते 3.30 वाजेच्या सुमारास हा थरार घडला. बेलापूर रेल्वे स्थानकानजीक असलेल्या पारसिक हिलच्या बोगद्यापुढील डोंगराळ भागातील रस्त्यावरून एक चारचाकी जात होती. वळणावर चालकाचे वाहनावरील नियंत्रण सुटले आणि ही कार थेट दरीसारख्या उतारावरून हवेत उडत थेट खाली असलेल्या रेल्वे ट्रॅकवर कोसळली.
प्रचंड उंचीवरून पडल्यामुळे झालेल्या जोरदार आवाजाने आजूबाजूच्या परिसरात एकच खळबळ उडाली. या अपघातात कारचे पत्रे, इंजिन आणि काचांचा चुराडा झाला. कारमध्ये असलेला १७ वर्षीय चालक तरुण रक्ताच्या थारोळ्यात अडकला होता. त्याला स्थानिक नागरिक, पोलीस आणि अग्निशमन दलाच्या मदतीने तातडीने बाहेर काढून जवळच्या रुग्णालयात दाखल करण्यात आले असून त्याची प्रकृती चिंताजनक असल्याचे सांगण्यात येत आहे.
पाहा थरारक घटनेची दृश्ये…
लोकल ट्रेन नव्हती म्हणून मोठा अनर्थ टळला!
ज्या ठिकाणी ही कार कोसळली, तो मार्ग पनवेल ते उरण दरम्यान धावणाऱ्या लोकल गाड्यांचा आहे. या मार्गावर सतत उपनगरीय गाड्यांची ये-जा असते. ज्या क्षणी कार वरून रुळावर कोसळली, सुदैवाने त्या क्षणी त्या ट्रॅकवरून कोणतीही लोकल ट्रेन जात नव्हती. जर काही सेकंदांच्या अंतराने लोकल तिथे आली असती, तर मोठा रेल्वे अपघात घडून शेकडो प्रवाशांचा जीव धोक्यात आला असता. त्यामुळे एक मोठी दुर्घटना टळल्याची भावना व्यक्त केली जात आहे.
रेल्वे वाहतूक ठप्प; ओव्हरहेड वायर व ट्रॅकची तपासणी सुरू
कार रेल्वे रुळावर पडल्यामुळे पनवेल-उरण अप आणि डाऊन मार्गावरील लोकल सेवा तत्काळ खबरदारीचा उपाय म्हणून थांबवण्यात आली. कार डोंगरावरून पडताना रेल्वेच्या उच्च दाबाच्या ओव्हरहेड वायर किंवा विजेच्या खांबांना (OHE Poles) धक्का लागला आहे का, तसेच रुळांना काही तडे गेले आहेत का, याची तपासणी रेल्वेचे तांत्रिक पथक युद्धपातळीवर करत आहे.
क्रेनच्या साहाय्याने कार हटवण्याचे काम
रेल्वे पोलीस, स्थानिक सीबीडी बेलापूर पोलीस आणि अग्निशमन दलाच्या जवानांनी तात्काळ घटनास्थळी धाव घेतली. रुळावर पडलेली चक्काचूर झालेली कार क्रेनच्या साहाय्याने ट्रॅकवरून बाजूला करण्याचे काम युद्धपातळीवर हाती घेण्यात आले आहे.
कार नेमकी कशी कोसळली? पोलिसांकडून सखोल तपास
17 वर्षीय अल्पवयीन मुलाच्या हातात कार कशी आली? त्याला वाहन चालवण्याचा परवाना होता का? गाडीचा ब्रेक फेल झाला की स्टंटबाजी अथवा अतिवेगामुळे गाडी दरीत कोसळली? याबाबत नवी मुंबई पोलीस आणि रेल्वे सुरक्षा दल (RPF) सखोल चौकशी करत आहेत. अपघातामुळे हार्बर मार्गावरील प्रवाशांची मात्र चांगलीच गैरसोय झाली असून, ट्रॅक सुरक्षित असल्याचे घोषित झाल्यानंतरच या मार्गावरील वाहतूक पूर्ववत केली जाणार असल्याचे रेल्वे प्रशासनाकडून सांगण्यात आले.
————–
हेही वाचा….
मुंबई-पुणे एक्स्प्रेसवेवर ‘बर्निंग बस’चा थरार : पनवेलजवळ चालत्या ट्रॅव्हल्सला भीषण आग, सर्व प्रवासी सुरक्षित
मुंबई-पुणे एक्स्प्रेसवेवर गुरुवारी सकाळी ‘बर्निंग बस’चा थरार पाहायला मिळाला. पनवेलजवळ किलोमीटर १६ च्या आसपास पुण्याच्या दिशेने जाणाऱ्या एका भरधाव प्रवासी बसला अचानक भीषण आग लागली. आगीने काही क्षणांतच रौद्ररूप धारण केल्याने एक्स्प्रेसवेवर काही काळ घबराटीचे वातावरण निर्माण झाले होते. मात्र, सुदैवाने सर्व प्रवाशांना वेळेतच बसमधून सुखरूप बाहेर काढण्यात आल्याने एक मोठा अनर्थ टळला आहे. येथे वाचा संपूर्ण बातमी
