प्रतिनिधी | अंजनगाव सूर्जी शेतीकडे केवळ पारंपरिक व्यवसाय म्हणून न पाहता, योग्य नियोजन आणि आधुनिक तंत्रज्ञानाची जोड दिली तर शेतीतूनही भरघोस उत्पन्न मिळू शकते, हे येथील प्रगतीशिल युवा शेतकरी दर्शन बऱ्हाणपुरे यांनी सिद्ध करून दाखवले आहे. आपल्या केवळ २ एकर क्षेत्रात तब्बल १० क्विंटल उन्हाळी मुगाचे विक्रमी उत्पादन घेत त्यांनी परिसरातील तरुण शेतकऱ्यांसमोर एक नवा आदर्श ठेवला आहे. पारंपरिक शेतीला आधुनिकतेची जोड देत बऱ्हाणपूरे या युवा शेतकऱ्याने एक नवीच किमया घडवून दाखवली, त्यामुळे त्यांची शेती पाहण्यासाठी तालुक्यातील अनेक शेतकरी गर्दी करीत आहे. विशेष म्हणजे दर्शन बऱ्हाणपुरेदेखील या प्रयोगमागची कल्पना व त्या कल्पनेला मिळालेले फळ यासंबंधीचा प्रवास त्यांच्यासमोर उलगडत आहेत. आजच्या काळात अनेक तरुण शेतीपासून दूर जात असताना, दर्शन यांनी मात्र शेतीतच आपले भविष्य शोधले. पारंपरिक पिकांना फाटा देत त्यांनी उन्हाळी मुगाची निवड केली. हवामानाचा अंदाज, जमिनीचा पोत आणि पाण्याची उपलब्धता या सर्वांचा अचूक ताळमेळ घालत त्यांनी या पिकाचे नियोजन केले होते. दर्शन बऱ्हाणपुरे यांचे हे यश कौतुकास्पद असून, त्यांनी घेतलेला हा धाडसी निर्णय इतर शेतकऱ्यांसाठी दिशादर्शक ठरणारा आहे. “कष्टाला नियोजनाची जोड दिली तर शेती कधीच तोट्यात जात नाही,” असा विश्वास दर्शन यांनी यावेळी व्यक्त केला. त्यांच्या या यशाबद्दल परिसरातून त्यांचे कौतुक होत असून, अनेक युवा शेतकरीसुद्धा या प्रयोगाची माहिती घेण्यासाठी त्यांच्या शेताला भेट देत आहेत. नियोजन, कष्टाचे फळ उन्हाळी हंगामात मुगाचे पीक घेणे हे तसे आव्हानात्मकच असते. मात्र दर्शन यांनी योग्य वेळी पेरणी, खतांचे व्यवस्थापन आणि पीक संरक्षणाकडे विशेष लक्ष दिले. त्यांच्या कष्टाला यशाची जोड मिळाली आणि केवळ २ एकरात १० क्विंटल मुगाचे उत्पादन झाले. बाजारभाव आणि उत्पादनाचा खर्च पाहता, हा प्रयोग अत्यंत किफायतशीर ठरला असा त्यांचा अनुभव आहे.
Source link
अंजनगावात उन्हाळी मुगाचा प्रयोग यशस्वी:युवा शेतकरी बऱ्हाणपुरे यांच्या कष्टांना मिळाले फळ
