आयुर्वेद ही भारताने जगाला दिलेली आणि जगनमान्य उपचारपद्धती असुन, राज्यात आयुष चिकित्सापद्धती अधिक सक्षम करणार असल्याचे प्रतिपादन सार्वजनिक आरोग्य व कुटुंब कल्याण मंत्री प्रकाश आबिटकर यांनी केले. राष्ट्रीय आयुष अभियानाच्या वतीने “आयुर्वेद दिन व सेवा संकल्प अभियाना” च्या अंतर्गत आरोग्य सेवा आयुक्तालय, मुंबई येथे आयोजित कार्यक्रमात ते बोलत होते. या वेळी सार्वजनिक आरोग्य व कुटुंब कल्याण राज्यमंत्री मेघना साकोरे-बोर्डीकर उपस्थित होत्या. कार्यक्रमात मान्यवरांच्या हस्ते ‘पारंपरिक खाद्य पाककृती’, तसेच ‘भविष्यासाठी आयुर्वेद’ आणि ‘वार्धक्य काळात आयुर्वेदाची साथ’ या हस्तपुस्तिकांचे प्रकाशन करण्यात आले. आजार झाल्यानंतर उपचार करण्याबरोबरच आजार होऊ नये यासाठी आयुर्वेद, संतुलित आहार आणि योगाचा अंगीकार करणे आवश्यक आहे. राज्यशासन शहरी तसेच ग्रामीण भागात आयुष चिकित्सा अधिक सक्षम करण्यावर भर देणार असुन राज्यात राष्ट्रीय आयुष अभियानांतर्गत २६१ आरोग्य संस्थांमध्ये आयुष सेवा दिली जात आहे. तसेच ३९० ठिकाणी आयुष्मान आरोग्य मंदिरांच्या माध्यमातून आयुष चिकित्सा उपलब्ध करून देण्यात आली आहे. आयुष ग्राम, आयुष्मान आरोग्य मंदिर आणि योग दिनाच्या माध्यमातून आयुष चिकित्सा व निरोगी जीवनशैलीचा प्रसार करण्यात येत असून, आगामी काळात आयुष संस्थांचे अधिक बळकटीकरण करण्यात येणार असल्याचे आबिटकर यांनी सांगितले. पंतप्रधान नरेंद्र मोदी यांच्या वाढदिवसानिमित्त ‘सेवा सप्ताह’ तसेच आयुर्वेद दिनाच्या निमित्ताने निरोगी जीवनशैली, संतुलित आहार, योग आणि आयुर्वेदाशी संबंधित विविध उपक्रम राबविले जात आहेत. ‘निरोगी उद्यासाठी आयुर्वेद’ (Ayurveda for a Healthier Tomorrow) हे यावर्षीचे ब्रीदवाक्य असुन, आयुर्वेदाचा केवळ प्रचार-प्रसार न करता त्याचा प्रभावीपणे जनतेपर्यंत विस्तार करण्याचा संकल्प करण्याचे आवाहन आरोग्यमंत्र्यांनी केले. आयुष चिकित्सा पद्धती व उपचार पद्धतीबद्दल जनतेमध्ये विश्वास निर्माण करण्याची गरज आहे. आधुनिक आरोग्य व्यवस्थेसोबत आयुष चिकित्सा पद्धतीचा प्रभावी समन्वय साधून नागरिकांना अधिक व्यापक आरोग्यसेवा उपलब्ध करून देण्याचा प्रयत्न असल्याचेही आरोग्यमंत्री आबिटकर यांनी सांगितले. कार्यक्रमास सार्वजनिक आरोग्य विभागाचे सचिव डॉ. निपुण विनायक, सचिव ई. रवींद्रन, आरोग्य सेवा आयुक्त संजय काटकर, शहरी आरोग्य सेवा आयुक्त डॉ. सुनील भोकरे, आयुष अभियान संचालक वैद्य रामन घुंगराळेकर, संचालक आरोग्य सेवा डॉ. नितीन अंबाडेकर, संचालक डॉ. विजय कंदेवाड, सहसंचालक डॉ. अर्चना भोसले यांच्यासह राज्यातील प्रमुख वैद्यकीय अधिकारी, योग प्रशिक्षक व अधिकारी दूरदृश्य प्रणालीद्वारे उपस्थित होते. हेही वाचा… दिशा सालियान प्रकरणात आदित्य ठाकरेंचे 500 कोटींच्या नोटिशीला उत्तर:सर्व आरोप फेटाळले, म्हणाले ‘तथ्यहीन आरोप’ दिशा सालियान मृत्यूप्रकरणावरून महाराष्ट्रातील राजकीय वातावरण पुन्हा एकदा तापले आहे. दिशा सालियानचे वडील सतीश सालियान यांनी शिवसेना ठाकरे गटाचे नेते आदित्य ठाकरे यांना पाठवलेल्या 500 कोटी रुपयांच्या मानहानीच्या कायदेशीर नोटिशीला अखेर उत्तर देण्यात आले आहे. आदित्य ठाकरे यांच्या वकिलांनी 26 पानी उत्तर देत नोटिशीतील आरोप फेटाळून लावले आहेत. सविस्तर वाचा…
Source link
आयुर्वेद ही भारताने जगाला दिलेली उपचारपद्धती:राज्यात आयुष चिकित्सापद्धती अधिक सक्षम करणार आरोग्यमंत्री प्रकाश आबिटकर
