कर्जाचा वाढता बोजा, शासनाकडे 2.50 कोटींचे बिल रखडले:अमरावतीत कंत्राटदाराने जीवन संपवले

जिल्ह्यातील जरुड येथील 42 वर्षीय कंत्राटदार सुनील वागद्रे यांनी आपल्या शेतातील आंब्याच्या झाडाला गळफास घेऊन जीवन संपवल्याची घटना समोर आली आहे. त्यांच्या मृत्यूमागे आर्थिक अडचणी आणि शासनाकडे अनेक वर्षांपासून प्रलंबित असलेली मोठी देयके कारणीभूत असल्याचा दावा अमरावती जिल्हा कंत्राटदार संघटनेने केला आहे. मिळालेल्या माहितीनुसार, सुनील वागद्रे हे बांधकाम क्षेत्रातील कंत्राटदार होते. त्यांच्या कामाचे शासनाकडे सुमारे 2 कोटी 50 लाख रुपयांचे बिल मागील 4 वर्षांपासून प्रलंबित असल्याचे सांगण्यात येत आहे. या थकीत रकमेचा पाठपुरावा करण्यासाठी ते मागील वर्षभरापासून मंत्रालयात चकरा मारत होते. मात्र, वारंवार पाठपुरावा करूनही बिलाची रक्कम मिळाली नसल्याचा दावा कंत्राटदार संघटनेने केला आहे. कर्जाचा वाढता ताण दरम्यान, वागद्रे यांच्यावर मोठ्या प्रमाणात कर्ज असल्याची माहिती समोर आली आहे. त्यांच्यावर एका खासगी बँकेचे सुमारे 30 लाख रुपयांचे कर्ज, बँकेची 30 लाख रुपयांची कॅश क्रेडिट (CC) तसेच बांधकामासाठी उसने घेतलेले सुमारे 50 लाख रुपये असे एकूण मोठे आर्थिक दायित्व होते. एकीकडे कर्जाचा ताण आणि दुसरीकडे शासनाकडून मिळणे अपेक्षित असलेली कोट्यवधी रुपयांची थकीत रक्कम, अशा परिस्थितीत ते अडचणीत सापडले होते, असा दावा करण्यात आला आहे. वर्षभर मंत्रालयात पाठपुरावा कंत्राटदार संघटनेच्या माहितीनुसार, वागद्रे यांनी आपल्या प्रलंबित बिलासाठी मागील वर्षभर मंत्रालयात सातत्याने पाठपुरावा केला. संबंधित विभागांकडे बिल मंजूर करून रक्कम मिळावी, यासाठी त्यांनी अनेकदा प्रयत्न केल्याचे सांगण्यात येते. मात्र, चार वर्षांपासून बिल प्रलंबित राहिल्याने त्यांच्यावर आर्थिक दबाव वाढत गेला. या पार्श्वभूमीवरच त्यांनी हे टोकाचे पाऊल उचलल्याची चर्चा सुरू आहे. मात्र, त्यांच्या मृत्यूचे नेमके कारण तपासानंतरच स्पष्ट होणार आहे. कंत्राटदार संघटनेचा शासनाच्या निधी वाटपावर आरोप सुनील वागद्रे यांच्या मृत्यूनंतर अमरावती जिल्हा कंत्राटदार संघटनेने शासनाकडे गंभीर मागण्या केल्या आहेत. शासनाच्या चुकीच्या आणि असमान निधी वाटपाच्या धोरणामुळे कंत्राटदार आर्थिक अडचणीत येत असल्याचा आरोप संघटनेने केला आहे. थकीत देयके वेळेत मिळत नसल्याने कंत्राटदारांना बँकांचे कर्ज, व्याज आणि इतर आर्थिक जबाबदाऱ्या सांभाळणे कठीण होत असल्याचेही संघटनेचे म्हणणे आहे. संघटनेने मुख्यमंत्री देवेंद्र फडणवीस यांना पत्र पाठवून वागद्रे यांच्या प्रलंबित देयकांची रक्कम तातडीने अदा करण्याची मागणी केली आहे. तसेच त्यांच्या कुटुंबावर आलेले आर्थिक संकट लक्षात घेऊन शासनाने त्यांच्या सर्व थकीत देयकांचा तातडीने निपटारा करावा, अशी मागणी करण्यात आली आहे. कुटुंबाला आर्थिक मदतीची मागणी वागद्रे यांच्या मृत्यूनंतर त्यांच्या कुटुंबावर आर्थिक संकट कोसळले आहे. त्यामुळे शासनाने केवळ प्रलंबित बिलाचा प्रश्न सोडवू नये, तर त्यांच्या कुटुंबाला आवश्यक ती आर्थिक मदत द्यावी, अशी मागणी कंत्राटदार संघटनेने केली आहे. कंत्राटदारांना वेळेवर देयके मिळावीत, प्रलंबित बिलांचा निपटारा करण्यासाठी प्रभावी यंत्रणा उभी करावी आणि निधीअभावी कामे व देयके रखडू नयेत, अशी मागणीही संघटनेने केली आहे. या घटनेमुळे शासनाकडून कंत्राटदारांची थकीत बिले वेळेत देण्याचा मुद्दा पुन्हा चर्चेत आला आहे. दरम्यान, सुनील वागद्रे यांच्या मृत्यूची अधिकृत कारणमीमांसा तपासानंतर स्पष्ट होणार असून, पोलिसांकडून या प्रकरणाचा तपास सुरू आहे. हेही वाचा… मुलुंड पूर्वेत कामगारांच्या संक्रमण शिबिराला भीषण आग:7 ते 8 सिलिंडरचे स्फोट, सुदैवाने जीवितहानी टळली मुलुंड पूर्वेकडील नवघर परिसरात बांधकाम कामगारांसाठी उभारण्यात आलेल्या संक्रमण शिबिराला गुरुवारी दुपारी भीषण आग लागल्याने परिसरात मोठी खळबळ उडाली. आगीदरम्यान एका सिलिंडरचा स्फोट झाल्यानंतर शिबिरातील इतर सिलिंडरही स्फोट होऊन आगीने काही वेळातच रौद्ररूप धारण केले. या घटनेत सुदैवाने कोणतीही जीवितहानी झाली नसून, सर्व कामगारांना वेळीच सुरक्षितपणे बाहेर काढण्यात आले. सविस्तर वाचा…



Source link