काइनेटिक समूहाकडून ऐतिहासिक कॉफी टेबल पुस्तकाचे प्रकाशन:कंपनीच्या 5 दशकांचा प्रवास 'काइनेटिक एनर्जी'मधून उलगडला

काइनेटिक समूहाच्या ‘काइनेटिक एनर्जी – इंडियाज ओरिजिनल पीपल मूव्हर्स’ या कॉफी टेबल पुस्तकाचे प्रकाशन नुकतेच पुण्यात झाले. कंपनीचे संस्थापक अरुण फिरोदिया, अध्यक्ष अजिंक्य फिरोदिया आणि ज्येष्ठ वाहन उद्योग इतिहासकार आदिल जल दरुखानावाला यांच्या उपस्थितीत हा सोहळा पार पडला. हे पुस्तक काइनेटिक समूहाच्या पाच दशकांहून अधिक काळाच्या प्रवासाचा वेध घेते. काइनेटिकने भारताच्या गतिशीलता क्षेत्रात मोठे योगदान दिले आहे. ‘लूना’सारख्या परवडणाऱ्या वैयक्तिक प्रवासाच्या साधनांपासून ते शहरी वाहतुकीला दिशा देणाऱ्या ‘काइनेटिक डीएक्स’पर्यंत, कंपनीने भारतीयांच्या प्रवासपद्धतीत क्रांती घडवली. आता हीच परंपरा विद्युत वाहनांच्या नव्या युगात काइनेटिक इलेक्ट्रिक एनर्जीच्या माध्यमातून पुढे नेली जात आहे. या प्रकाशन सोहळ्यासोबतच ‘आय ॲम काइनेटिक’ या समुदाय उपक्रमाचीही सुरुवात करण्यात आली. सुमारे १८० पानांच्या या पुस्तकात शेकडो दुर्मिळ छायाचित्रे, ऐतिहासिक कागदपत्रे आणि प्रत्यक्ष अनुभवांचा समावेश आहे. वाहन उद्योगाचे अभ्यासक व पत्रकार आदिल जल दरुखानावाला यांनी हे पुस्तक लिहिले आहे. काइनेटिकसोबतच्या त्यांच्या चार दशकांहून अधिक काळाच्या संबंधामुळे पुस्तकाला ऐतिहासिक संदर्भांची समृद्ध जोड मिळाली आहे. दरुखानावाला यांनी १९८० च्या दशकापासून कंपनीच्या वाटचालीचे जवळून निरीक्षण केले आहे. त्यांच्या संशोधनावर आणि दुर्मिळ अभिलेखांवर आधारित हे पुस्तक काइनेटिकचा प्रवास सविस्तरपणे उलगडते. काइनेटिक इंजिनिअरिंग लिमिटेडचे उपाध्यक्ष व व्यवस्थापकीय संचालक अजिंक्य फिरोदिया यांनी यावेळी सांगितले की, “हे पुस्तक गेल्या पाच दशकांतील आमची दूरदृष्टी, नवकल्पना आणि काइनेटिकचा वारसा घडवणाऱ्या प्रत्येक व्यक्तीला वाहिलेली आदरांजली आहे. आमची उत्पादने, भागीदारी आणि मूल्यांचा गौरव करणारे हे पुस्तक भविष्यातील उद्योजक, संशोधक आणि वाहनप्रेमींसाठी प्रेरणादायी ठरेल.” फिरोदिया पुढे म्हणाले, “विद्युत गतिशीलतेच्या नव्या पर्वात प्रवेश करताना ‘आय ॲम काइनेटिक’ समुदायाच्या माध्यमातून हा वारसा पुढील पिढीपर्यंत पोहोचवण्याचा आम्हाला अभिमान आहे.” पुस्तकाचे लेखक आदिल जल दरुखानावाला म्हणाले, “काइनेटिकची कहाणी ही केवळ एका वाहननिर्मिती कंपनीची नाही, तर भारताच्या गतिशीलतेच्या इतिहासातील महत्त्वाचा अध्याय आहे. या पुस्तकाद्वारे लाखो भारतीयांच्या दैनंदिन प्रवासात परिवर्तन घडवणाऱ्या कंपनीचा समृद्ध वारसा जतन करण्याचा प्रयत्न केला आहे.” काइनेटिक समूह सध्या विद्युत वाहन क्षेत्रात आपली उपस्थिती मजबूत करत आहे. नव्या विद्युत काइनेटिक डीएक्सच्या माध्यमातून ते नव्या पिढीतील ग्राहकांशी पुन्हा नाते जोडत आहेत.



Source link