जिल्हास्तरीय रेड रन स्पर्धेला उत्स्फूर्त प्रतिसाद:विजेत्यांची राज्यस्तर स्पर्धेसाठी निवड, एचआयव्ही,एड्स प्रतिबंधाबाबत युवकांत जनजागृती‎

.

जिल्हा शल्य चिकित्सक डॉ. विनोद पवार, आरडीआयके महाविद्यालयाचे प्राचार्य डॉ. देशमुख, प्रा. अतुल पाटील, जिल्हा कार्यक्रम अधिकारी अजय साखरे, प्रा. नकुल देशमुख, प्रा. प्रिती देशमुख आणि जिल्हा पर्यवेक्षक प्रकाश शेगोकार यांच्या उपस्थितीत हिरवी झेंडी दाखवून स्पर्धेचा प्रारंभ करण्यात आला. या वेळी मार्गदर्शन करताना डॉ. पवार यांनी एचआयव्ही संक्रमणाची तीव्रता कमी करण्यासाठी युवकांची भूमिका अत्यंत महत्त्वाची असल्याचे सांगितले. जनजागृतीच्या माध्यमातून समाजात सकारात्मक बदल घडवून आणण्यासाठी युवकांनी पुढाकार घेण्याचे आवाहन त्यांनी केले. तसेच राज्यस्तरीय स्पर्धेसाठी निवड झालेल्या स्पर्धकांना शुभेच्छा दिल्या. स्पर्धेत जिल्ह्यातील विविध महाविद्यालयांतील रेड रिबन क्लब सदस्यांसह विद्यार्थ्यांनी सहभाग घेतला. स्पर्धेचे नियम, मार्ग आणि आयोजनाबाबत प्रा.अतुल पाटील यांनी मार्गदर्शन केले.पुरुष गटात श्यामा प्रसाद मुखर्जी महाविद्यालय, शेंदुरजना घाटचा पीयुष मसाने प्रथम, प्रज्वल हटले द्वितीय, तक्षशिला महाविद्यालयाचा शंकर नांदे तृतीय आला. महिला गटात आरडीआयके महाविद्यालयाची वैष्णवी वानखडे प्रथम, नाथे विद्यालयाची मीनाक्षी खारपाटे द्वितीय आणि महिला महाविद्यालयाची निशा जगताप तृतीय ठरली. कार्यक्रमाचे संचालन अजय खेडकर यांनी केले. तर स्पर्धेसाठी एच आई व्ही साठी कार्यरत संस्था समर्पण ट्रस्ट, राष्ट्रसंत तुकडोजी महाराज शिक्षण व आरोग्य मंडळ मोझरी, श्री शिवाजी शिक्षण संस्था, भाग्योदय शिक्षण व संस्था, श्री सत्यदेव बाबा महिला मंडळ मोझरी, लोकेश पवार, दामोदर गायकवाड, नरेश मंथापुरवार, चंद्रकांत हिरोडे, विशाल भोंबे, किशोर पाथरे, प्रवीण म्हसाळ यांनी सहकार्य केले.

जिल्हास्तरीय रेड रन स्पर्धेतील प्रथम आणि द्वितीय क्रमांकाच्या स्पर्धकांची राज्यस्तरीय स्पर्धेसाठी निवड करण्यात आली आहे. पुरुष गटातून पियुष मसाने व प्रज्वल हटले, तर महिला गटातून वैष्णवी वानखडे व मीनाक्षी खारपाटे हे राज्यस्तरावर अमरावती जिल्ह्याचे प्रतिनिधित्व करणार आहेत. युवकांमध्ये एचआयव्ही, एड्सविषयी जागरूकता वाढविण्याच्या उद्देशाने आयोजित या स्पर्धेमुळे जनजागृतीसोबतच युवकांना क्रीडा स्पर्धांद्वारे सामाजिक संदेश देण्याचे व्यासपीठ उपलब्ध झाले आहे.