सेनगाव पोलिस ठाण्याच्या हद्दीत येणाऱ्या एका गावातील एका 26 वर्षीय तरुणीचा विनयभंग करून तिला आणि तिच्या कुटुंबीयांना बेदम मारहाण करुन जिवे मारण्याची धमकी दिल्याची घटना घडली आहे. या प्रकरणी पीडित तरुणीने दिलेल्या फिर्यादीवरून सेनगाव पोलिसांनी चार जणांविरुद्ध गुरुवारी ता. 18 रात्री उशिरा गुन्हा दाखल केला आहे. पोलिसांनी दिलेल्या माहितीनुसार, सेनगाव पोलिस ठाण्याच्या हद्दीत असलेलया एका गावातील तरुणी तिच्या घरासमोर उभी होती. यावेळी गावातील राहुल जाधव हा तरुणीच्या घरा समोर आला. तू माझ्याशी का बोलत नाहीस असे विचारले. त्यावर तरुणीने तुझ्यामुळे माझे लग्न मोडले आहे, त्यामुळे मी तुझ्याशी बोलणार नाही, असे सांगितले. याचा राग येऊन त्याने तरुणीचा तिचा हात पकडून तिची छेड काढली अन विनयभंग केला. अचानक झालेल्या या प्रकारामुळे घाबरलेल्या तरुणीने आरडाओरडा केला, तेव्हा तिचे वडील आणि भाऊ मदतीला धावून आले. यावेळी चौघांनी त्या तरुणीला तसेच तिच्या कुटुंबाला शिवीगाळ करून मारहाण केली. तसेच जिवे मारण्याची धमकीही दिली. या गोंधळात एका महिलेने दगडफेक केली, ज्यातील एक दगड राहुल जाधव यालाच लागला यामध्ये तो जखमी झाला. या प्रकरणी त्या तरुणीने गुरुवारी ता. 18 रात्री सेनगाव पोलिस ठाण्यात तक्रार दाखल केली. यावरून पोलिसांनी राहुल जाधव, त्र्यंबक जाधव, आदित्य जाधव अन एका महिले विरुध्द गुन्हा दाखल केला आहे. सहाय्यक पोलिस निरीक्षक संग्राम जाधव, जमादार जिवन मस्के, सुभाष चव्हाण यांच्या पथकाने घटनास्थळी भेट देऊन पाहणी केली. जमादार मस्के पुढील तपास करीत आहेत.
Source link
तरुणीचा विनयभंग करून कुटुंबाला बेदम मारहाण:चौघांवर सेनगाव पोलिस ठाण्यात गुन्हा दाखल
