पोलिओ हा गंभीर आजार असून सुरक्षित लसीकरणाद्वारे त्याचा संपूर्ण प्रतिबंध करता येतो. जगभरातून पोलिओचे संपूर्ण उच्चाटन होईपर्यंत सतर्कता बाळगणे गरजेचे असून, “एकही बालक लसीकरणापासून वंचित राहू नये, हीच पोलिओ निर्मूलनाची खरी गुरुकिल्ली आहे, असे प्रतिपादन महापौर ज्योती गाडे यांनी केले. राष्ट्रीय पल्स पोलिओ लसीकरण मोहिमेच्या पार्श्वभूमीवर मनपा आणि रोटरी क्लब यांच्या संयुक्त विद्यमाने शहरात जनजागृतीपर सायकल रॅलीचे आयोजन करण्यात आले होते. रविवारी, २८ जून रोजी होणाऱ्या पोलिओ मोहिमेच्या जनजागृतीसाठी काढण्यात आलेल्या या रॅलीला नागरिकांचा प्रतिसाद लाभला. या रॅलीचे उद्घाटन महापौर गाडे आणि उपमहापौर ॲड. धनंजय जाधव यांच्या हस्ते करण्यात आले. उपमहापौर ॲड. धनंजय जाधव यांनी सायकल चालवत रॅलीमध्ये सहभाग घेतला. या रॅलीप्रसंगी महापालिका आयुक्त यशवंत डांगे, महिला व बालकल्याण समिती सभापती दीपाली बारस्कर, आरोग्य अधिकारी डॉ. सतीश राजुरकर, डॉ. साहिल शेख, डॉ. वृषाली आरु, डॉ. दिलीप बागल, रोटरी क्लबचे अध्यक्ष सुनील कटारिया, सायकल असोसिएशनचे चंद्रशेखर मुळे, डॉ. धनंजय कुलकर्णी, सचिन सातपुते यांच्यासह आशा सेविका, आरोग्य कर्मचारी व सायकलस्वार मोठ्या संख्येने उपस्थित होते. आरोग्य अधिकारी डॉ. सतीश राजुरकर यांनी राष्ट्रीय पल्स पोलिओ मोहिमेची सविस्तर माहिती देत नागरिकांनी प्रशासनाला सहकार्य करण्याचे आवाहन केले. या रॅलीत उपमहापौर ॲड. जाधव यांनी स्वतः सायकल चालवत रॅलीत सहभाग घेतला. त्यांनी नागरिकांमध्ये पल्स पोलिओ लसीकरणाबाबत जनजागृती करत प्रत्येक पालकापर्यंत पोलिओमुक्त भारताचा संदेश पोहोचविण्याचा प्रयत्न केला. संपूर्ण रॅलीदरम्यान “एकही बालक सुटू नये” या घोषवाक्याने परिसर दुमदुमून गेला आणि पोलिओ निर्मूलनाबाबत जनजागृतीचा प्रभावी संदेश शहरातील नागरिकांपर्यंत पोहोचला.
Source link
पोलिओ हा गंभीर आजार, सुरक्षित लसीकरणाद्वारे प्रतिबंध करता येतो:पल्स पोलिओ मोहिमेच्या पूर्वसंध्येला सायकल रॅली
