राज्यात पुढील 4 दिवस वादळी पावसाचा इशारा:मुंबई-पुण्यासह अनेक जिल्ह्यांना 'यलो अलर्ट'; 15 सप्टेंबरपासून पुन्हा मान्सूनचा जोर वाढण्याची शक्यता

सप्टेंबरचा दुसरा आठवडा सुरू झाला असला तरी महाराष्ट्रातून मान्सूनच्या परतीचे संकेत अद्याप स्पष्ट झालेले नाहीत. उलट, राज्यातील अनेक भागांत पुढील चार दिवस पावसाचा जोर वाढण्याची शक्यता आहे. भारतीय हवामान विभागाने (IMD) 11 ते 14 सप्टेंबरदरम्यान राज्यातील विविध जिल्ह्यांसाठी वादळी वाऱ्यासह पाऊस आणि विजांच्या कडकडाटाचा अंदाज व्यक्त केला आहे. काही जिल्ह्यांना ‘यलो अलर्ट’ देण्यात आला असून, मुंबई, ठाणे, रायगड, पुणे, नाशिक, छत्रपती संभाजीनगरसह अनेक भागांना पावसाचा इशारा देण्यात आला आहे. देशातील मान्सूनच्या स्थितीवर नजर टाकली असता यंदा मान्सूनचा परतीचा प्रवास लांबण्याची शक्यता निर्माण झाली आहे. साधारणपणे सप्टेंबरच्या मध्यापासून देशाच्या उत्तर-पश्चिम भागातून मान्सूनच्या परतीला सुरुवात होते. मात्र, सध्या वातावरणातील बदल आणि विविध हवामान प्रणालींमुळे अनेक राज्यांमध्ये पावसाला पोषक स्थिती कायम आहे. त्यामुळे महाराष्ट्रातही पुढील काही दिवस पावसाचा मुक्काम कायम राहण्याची शक्यता आहे. 11 सप्टेंबरला या जिल्ह्यांना यलो अलर्ट हवामान विभागाच्या अंदाजानुसार, 11 सप्टेंबर रोजी नाशिक घाट परिसर, परभणी, हिंगोली, नांदेड, यवतमाळ, वर्धा, नागपूर, भंडारा, गोंदिया, चंद्रपूर आणि गडचिरोली या जिल्ह्यांत वादळी वाऱ्यासह पाऊस आणि विजांच्या कडकडाटाची शक्यता आहे. या पार्श्वभूमीवर संबंधित जिल्ह्यांसाठी ‘यलो अलर्ट’ जारी करण्यात आला आहे. विशेषतः विदर्भ आणि मराठवाड्यातील काही भागांत स्थानिक पातळीवर पावसाचा जोर वाढू शकतो. 12 सप्टेंबरला राज्याच्या मोठ्या भागात पावसाची शक्यता 12 सप्टेंबर रोजी पावसाचा प्रभाव आणखी व्यापक होण्याचा अंदाज आहे. धुळे, नाशिक घाट, नाशिक, पालघर, ठाणे, मुंबई, मुंबई उपनगर, रायगड, अहिल्यानगर, छत्रपती संभाजीनगर, जळगाव, बुलढाणा, जालना, बीड, धाराशिव, सोलापूर, लातूर, परभणी, नांदेड, हिंगोली, वाशिम, अकोला, अमरावती, यवतमाळ, वर्धा, नागपूर, भंडारा, गोंदिया, चंद्रपूर आणि गडचिरोली या भागांत वादळी वाऱ्यासह पाऊस होण्याची शक्यता आहे. या काळात काही ठिकाणी विजांचा कडकडाट आणि मेघगर्जनेसह पावसाच्या सरी कोसळू शकतात. त्यामुळे नागरिकांनी स्थानिक हवामानाचा अंदाज लक्षात घेऊनच प्रवासाचे नियोजन करण्याचे आवाहन करण्यात आले आहे. 13 सप्टेंबरला मुंबई-पुण्यासह अनेक जिल्ह्यांना यलो अलर्ट 13 सप्टेंबर रोजी कोकण, मध्य महाराष्ट्र आणि मराठवाड्यातील अनेक भागांत पावसाची शक्यता आहे. विशेष म्हणजे मुंबई आणि पुण्यासह अनेक महत्त्वाच्या शहरांना या दिवशी पावसाचा इशारा देण्यात आला आहे. पालघर, ठाणे, मुंबई, मुंबई उपनगर, रायगड, पुणे घाट, पुणे, सातारा घाट, सातारा, रत्नागिरी, नाशिक, अहिल्यानगर, छत्रपती संभाजीनगर, जळगाव, बुलढाणा, जालना, बीड, धाराशिव, परभणी, हिंगोली, वाशिम, अकोला, अमरावती, यवतमाळ आणि वर्धा या जिल्ह्यांसाठी ‘यलो अलर्ट’ जारी करण्यात आला आहे. मुंबई महानगर परिसरात पावसाच्या सरींसह काही ठिकाणी वादळी वारे आणि विजांचा कडकडाट होण्याची शक्यता आहे. पुणे आणि घाट परिसरातही पावसाचा जोर वाढण्याची शक्यता हवामान विभागाने व्यक्त केली आहे. 14 सप्टेंबरलाही पावसाचा जोर कायम राहणार 14 सप्टेंबर रोजी नाशिक घाट, पुणे घाट, पुणे, अहिल्यानगर आणि रत्नागिरी या भागांसाठी ‘यलो अलर्ट’ देण्यात आला आहे. या भागांत वादळी पाऊस आणि विजांच्या कडकडाटाची शक्यता आहे. त्यामुळे 11 ते 14 सप्टेंबर हा कालावधी राज्यातील अनेक भागांसाठी पावसाच्या दृष्टीने महत्त्वाचा ठरणार आहे. सलग चार दिवस वेगवेगळ्या भागांत पावसाचा प्रभाव दिसून येण्याची शक्यता आहे. मान्सूनचा परतीचा प्रवास लांबणार? सप्टेंबरच्या दुसऱ्या आठवड्यात सामान्यतः मान्सूनच्या परतीची चर्चा सुरू होते. मात्र, यंदा अनेक भागांत पावसासाठी पोषक वातावरण कायम असल्याने मान्सूनचा मुक्काम लांबण्याची शक्यता व्यक्त केली जात आहे. हवामान विभागाच्या अंदाजानुसार 12 आणि 13 सप्टेंबरला देशातील विविध भागांत पावसाचा जोर वाढू शकतो. 14 सप्टेंबरला काही प्रमाणात उघडीप मिळण्याची शक्यता असून, 15 सप्टेंबरपासून पुन्हा पावसाचा जोर वाढण्याची शक्यता आहे. यामुळे महाराष्ट्रासह देशातील अनेक भागांत मान्सूनची सक्रियता आणखी काही दिवस कायम राहण्याची शक्यता आहे. महाराष्ट्रातील हवामानावर कोणता परिणाम? राज्यात यापूर्वी अनेक भागांत पावसाने काही काळ उघडीप घेतली होती. मात्र, आता पुन्हा पावसासाठी पोषक स्थिती निर्माण होत असल्याचे दिसत आहे. कोकण आणि घाटमाथ्यावर पावसाच्या सरींचा जोर वाढू शकतो, तर मराठवाडा आणि विदर्भातील काही भागांत मेघगर्जनेसह वादळी पावसाची शक्यता आहे. शेतीच्या दृष्टीने हा पाऊस काही भागांत उपयुक्त ठरू शकतो. मात्र, अल्प कालावधीत जोरदार पाऊस झाल्यास सखल भागात पाणी साचणे, वाहतुकीवर परिणाम होणे तसेच नदी-नाल्यांच्या पाणीपातळीत वाढ होण्याची शक्यता नाकारता येत नाही. विजांच्या कडकडाटाच्या पार्श्वभूमीवर सावधानता वादळी वारे आणि विजांच्या कडकडाटाची शक्यता असल्याने नागरिकांनी विशेष खबरदारी घेणे आवश्यक आहे. वीज चमकत असताना शक्यतो घराबाहेर पडणे टाळावे. बाहेर असल्यास झाडाखाली, विजेच्या खांबाजवळ किंवा मोकळ्या आणि धोकादायक ठिकाणी थांबू नये. शेतकरी आणि ग्रामीण भागातील नागरिकांनीही वादळी वातावरण निर्माण झाल्यास सुरक्षित ठिकाणी आसरा घ्यावा. प्रशासन आणि हवामान विभागाकडून देण्यात येणाऱ्या स्थानिक सूचनांकडे लक्ष ठेवणे महत्त्वाचे ठरणार आहे. पुढील चार दिवसांचा थोडक्यात अंदाज एकूणच, महाराष्ट्रात पुढील चार दिवस पावसाचे ठरण्याची शक्यता असून, मुंबई-पुण्यासह अनेक भागांत मेघगर्जना आणि विजांच्या कडकडाटासह पावसाचा अंदाज आहे. मान्सूनच्या परतीला अद्याप सुरुवात न झाल्याने राज्यातील नागरिकांना आणखी काही दिवस पावसाचा सामना करावा लागू शकतो. हेही वाचा… भंडाऱ्यात भीषण अपघात: ट्रक-पिकअपच्या धडकेत 9 जणांचा मृत्यू, मृतांमध्ये तीन चिमुकल्यांचा समावेश भंडारा जिल्ह्यात पहाटेच्या सुमारास एक अत्यंत भीषण अपघाताची घटना समोर आली आहे. नागपूर-रायपूर राष्ट्रीय महामार्गावर पिंपळगाव सडक येथील एका ढाब्याजवळ ट्रक आणि पिकअप व्हॅनमध्ये जोरदार धडक झाली. या भीषण अपघातात तब्बल 9 जणांचा मृत्यू झाला असून, मृतांमध्ये तीन लहान बालकांचाही समावेश आहे. येथे वाचा संपूर्ण बातमी



Source link