गेल्या काही दिवसांपासून पावसाची प्रतीक्षा करणाऱ्या मराठवाड्यात गुरुवारी काही भागांत वादळी पावसाने हजेरी लावली. मात्र, या पावसासोबत आलेल्या वीजेच्या कडकडाटाने छत्रपती संभाजीनगर जिल्ह्यात दोन कुटुंबांवर मोठा आघात केला. सिल्लोड तालुक्यातील दहिगाव आणि कन्नड तालुक्यातील पिशोर-वाघुळखेडा परिसरात वीज पडण्याच्या दोन स्वतंत्र घटनांमध्ये पाच जणांचा मृत्यू झाला, तर चार जण गंभीर जखमी झाले आहेत. जखमींना उपचारासाठी छत्रपती संभाजीनगर येथील घाटी रुग्णालयात दाखल करण्यात आले आहे. दहिगावात पती-पत्नीचा दुर्दैवी मृत्यू सिल्लोड तालुक्यातील दहिगाव शिवारात गुरुवारी दुपारी वादळी वातावरण निर्माण झाले. पावसापासून बचाव करण्यासाठी शेतात असलेले मनोहर भिवसन दुधे (60) आणि त्यांच्या पत्नी पर्वताबाई मनोहर दुधे (57) यांनी आसरा घेतला होता. याचवेळी अचानक वीज कोसळल्याने दोघेही गंभीररीत्या भाजले. या दुर्घटनेत त्यांचा जागीच मृत्यू झाला. घटनेची माहिती मिळताच परिसरातील नागरिकांनी धाव घेतली आणि दोघांना रुग्णालयात नेण्यात आले. मात्र, डॉक्टरांनी त्यांना मृत घोषित केले. या घटनेने दहिगाव परिसरावर शोककळा पसरली आहे. या दुर्घटनेत कुटुंबातील आणखी एक सदस्य जखमी झाल्याची माहिती समोर आली आहे. वादळी पावसाच्या वेळी शेतात काम करणाऱ्या नागरिकांनी विशेष खबरदारी घेण्याची गरज या घटनेतून अधोरेखित झाली आहे. पिशोर-वाघुळखेड्यातही वीज कोसळली दुसरी घटना कन्नड तालुक्यातील पिशोर-वाघुळखेडा परिसरात घडली. शेतातील काम सुरू असताना अचानक वादळी पावसाला सुरुवात झाली. त्याचदरम्यान वीज कोसळल्याने काही जण त्याच्या तडाख्यात सापडले. या घटनेत तीन जणांचा मृत्यू झाला असून, अन्य तीन जण गंभीर जखमी झाले आहेत. मृतांमध्ये महिलांसह एका चिमुकलीचा समावेश असल्याची माहिती आहे. घटनेनंतर स्थानिक नागरिकांनी तातडीने मदतकार्य सुरू केले. जखमींना सुरुवातीला स्थानिक पातळीवर उपचार देण्यात आले. त्यानंतर त्यांची प्रकृती गंभीर असल्याने पुढील उपचारासाठी छत्रपती संभाजीनगर येथील घाटी रुग्णालयात हलविण्यात आले. प्रशासनाकडून घटनास्थळी पाहणी दोन्ही घटनांची माहिती मिळताच प्रशासन आणि पोलिसांनी तातडीने घटनास्थळी धाव घेतली. आमदार संजना जाधव, तहसीलदार सारिका भगत यांच्यासह संबंधित अधिकारी आणि पोलिसांनी घटनास्थळी पाहणी करून परिस्थितीचा आढावा घेतला. मृतांच्या कुटुंबीयांना आवश्यक मदत मिळवून देण्यासाठी प्रशासनाकडून प्रक्रिया सुरू करण्यात आली आहे. शहरात जोरदार पाऊस, ग्रामीण भागात मात्र प्रतीक्षाच दरम्यान, गुरुवारी छत्रपती संभाजीनगर शहरातील सिडको आणि टीव्ही सेंटर परिसरात अल्पावधीत जोरदार पाऊस झाला. अवघ्या काही मिनिटांच्या पावसामुळे अनेक ठिकाणी रस्त्यांवर पाणी साचले. मात्र, जिल्ह्यातील ग्रामीण भागातील अनेक गावांना अद्याप दमदार पावसाची प्रतीक्षा आहे. गेल्या काही आठवड्यांपासून पावसाचा खंड पडल्याने खरीप पिकांवर परिणाम झाला असून, शेतकरी अडचणीत सापडले आहेत. पावसाची प्रतीक्षा असतानाच वीज कोसळून झालेल्या या दुर्घटनांनी जिल्ह्यात हळहळ व्यक्त होत आहे. वादळी पाऊस आणि विजांचा कडकडाट सुरू असताना नागरिकांनी शक्यतो मोकळ्या शेतात, झाडाखाली किंवा उघड्या ठिकाणी थांबणे टाळावे, असे आवाहन प्रशासनाकडून करण्यात येत आहे. हेही वाचा… ‘नरकातला स्वर्ग’नंतर संजय राऊतांचं नवं पुस्तक:‘बोध कीर्तन’ची झलक समोर, वाचकांची उत्सुकता वाढली शिवसेना उद्धव बाळासाहेब ठाकरे पक्षाचे खासदार आणि ‘सामना’चे कार्यकारी संपादक संजय राऊत यांचं नवं पुस्तक लवकरच वाचकांच्या भेटीला येणार आहे. ‘बोध कीर्तन’ असं या पुस्तकाचं नाव असून, मेहता पब्लिशिंग हाऊसकडून हे पुस्तक प्रकाशित करण्यात येणार आहे. संजय राऊत यांनी सोशल मीडिया प्लॅटफॉर्म ‘एक्स’वर पोस्ट करत आपल्या नव्या पुस्तकाची झलक शेअर केली आहे. त्यामुळे या पुस्तकाबाबत वाचकांमध्ये उत्सुकता निर्माण झाली असून, राजकीय वर्तुळातही या पुस्तकाची चर्चा सुरू झाली आहे. सविस्तर वाचा…
Source link
संभाजीनगरमध्ये वीज कोसळून 5 जणांचा मृत्यू:4 जण गंभीर जखमी; शेतात काम करताना वीज कोसळली, दहिगाव आणि पिशोर-वाघुळखेड्यात दुर्घटना
