राष्ट्रीय स्वयंसेवक संघाच्या शताब्दी वर्षात (101 वे वर्ष) संघाने जागतिक स्तरावर संवाद वाढवण्याचा महत्त्वपूर्ण निर्णय घेतला आहे. याचाच एक भाग म्हणून सरसंघचालक डॉ. मोहन भागवत ऑगस्ट महिन्याच्या अखेरीस अमेरिका, कॅनडा आणि ब्रिटनच्या दौऱ्यावर जाणार आहेत. परदेशातील भारतीय वंशाच्या ‘झेन-जी’ आणि ‘अल्फा’ पिढीशी थेट संवाद साधणे हे या दौऱ्याचे मुख्य वैशिष्ट्य आहे. तब्बल तीन वर्षांनंतर होणाऱ्या या परदेश दौऱ्यात डॉ. भागवत 29 ऑगस्ट रोजी न्यू यॉर्कमधील मॅनहॅटन येथे आयोजित ‘एकात्मता उत्सव’ सोहळ्यात प्रमुख भाषण देतील. या भाषणात ते परस्परसंलग्नता, जागतिक समरसता आणि विश्वबंधुत्वाचा संदेश देणार आहेत. ते परदेशातील भारतीय तरुण, सामाजिक संस्था आणि शैक्षणिक संघटनांशीही संवाद साधतील. यापूर्वी त्यांनी 6 ऑगस्ट रोजी मुंबईत ‘झेन-जी’ विद्यार्थ्यांशी यशस्वी संवाद साधला होता. डॉ. मोहन भागवत यांचा 76 वा वाढदिवस 11 सप्टेंबर रोजी आहे. विशेष म्हणजे, याच दिवशी 1893 मध्ये स्वामी विवेकानंदांनी शिकागो येथील विश्व धर्मसंसदेत ऐतिहासिक भाषण केले होते. संघात हा दिवस ‘हिंदू दिग्विजय दिन’ म्हणून साजरा केला जातो. संघात व्यक्तिपूजेला स्थान नसले तरी, यंदा आंतरराष्ट्रीय स्तरावर संवाद वाढवण्यासाठी परदेशातील भारतीय तरुणांसमवेत हा दिवस साजरा करण्याचा विचार आहे. दरम्यान, पूर्वनियोजित वेळापत्रकानुसार डॉ. भागवत 11 सप्टेंबरपूर्वी भारतात परतल्यास, त्यादिवशी ते जगभरातील तरुणांशी ऑनलाइन संवाद साधतील. या संदर्भात 14 ते 17 ऑगस्ट दरम्यान निर्णय घेतला जाईल. यापूर्वी डॉ. भागवत यांनी 2016 मध्ये ब्रिटन, 2018 मध्ये शिकागो आणि 2023 मध्ये बँकॉकचा दौरा केला होता.
Source link
सरसंघचालक डॉ. मोहन भागवत अमेरिका, ब्रिटन दौऱ्यावर:शताब्दी वर्षात 'झेन-जी' पिढीशी साधणार संवाद
