अन्न व औषध प्रशासनाचे राज्य आयुक्त तुकाराम मुंडे यांच्या मार्गदर्शनाखाली संपूर्ण महाराष्ट्रात अन्न व औषध प्रशासनाने भेसळखोरांविरुद्ध धडाकेबाज मोहीम सुरू केली आहे. याच मोहिमेचा भाग म्हणून गुरुवारी सकाळी बोरगाव मंजू येथील खासगी दूध डेअरीमध्ये भेसळयुक्त दूध असल्याच्या माहितीवरून एफडीएच्या पथकाने धाड टाकून तपासणी केली. ‘एफडीए’चे पथक गावात दाखल होताच बोरगाव मंजू व परिसरातील भेसळयुक्त अन्नपदार्थ विक्री करणारे हॉटेल व्यावसायिक, पानटपऱ्या, गुटखा विक्रेते, स्वीट मार्ट व काही संशयास्पद मेडिकल व दवाखाने चालकांमध्ये घबराट पसरली. कारवाईच्या भीतीने अनेकांनी आपल्या दुकानांचे शटर बंद करत धूम ठोकली. दुसरीकडे, जे व्यावसायिक शासनाच्या नियमांचे पालन करून प्रामाणिकपणे व्यवसाय करतात, त्यांनी दुकाने निर्भयपणे सुरू ठेवली. यातून परिसरात भेसळयुक्त पदार्थांची विक्री होत असल्याचे स्पष्ट झाले. दुधात युरिया टाकत असल्यास सांगा कारवाईदरम्यान अन्न सुरक्षा अधिकारी किशोर बोरचाटे यांनी नागरिकांना सतर्कतेचे आवाहन केले. आपल्या परिसरात जर कोणी दुधात युरिया किंवा इतर खाद्यपदार्थांमध्ये आरोग्याला घातक वस्तूंची भेसळ करत असेल, तर त्याची माहिती ८८८८३६७६४२ या मोबाइल क्रमांकावर द्यावी, माहिती देणाऱ्याचे नाव गुप्त ठेवण्यात येईल, असे सांगितले. नागरिकांच्या सहकार्यानेच अन्न-भेसळ रोखता येईल, असेही ते म्हणाले.
Source link
बोरगाव मंजूत एफडीएची धाड; दूध डेअरीवर कारवाई:व्यावसायिक भितीने दुकाने बंद करून पळाले
