पुणे शहरात सध्या केवळ चार टीएमसी पाणीसाठा शिल्लक आहे. यामुळे पुणेकरांनी पाण्याचा जपून वापर करावा, असे आवाहन महापौर मंजुषा नागपुरे यांनी केले आहे. त्यांनी पत्रकार परिषदेत ही माहिती दिली.
.
एल निनोच्या प्रभावामुळे यंदा मान्सून लांबला आहे. या पार्श्वभूमीवर, शहरात गेल्या पाच दिवसांपासून एक दिवसाआड पाणी कपात लागू करण्यात आली आहे. मागील वर्षी याच कालावधीत शहरात सात टीएमसी पाणीसाठा उपलब्ध होता.
पाणीटंचाईमुळे यंदा पुण्यात पाणीपुरवठ्याबाबतच्या तक्रारींमध्ये वाढ झाली आहे. यावर्षी ४६७ नवीन तक्रारींची नोंद झाली आहे. पाण्याच्या टँकरची संख्याही १४४५ वरून १६६५ पर्यंत वाढली आहे, म्हणजेच २१५ टँकरची भर पडली आहे.
पाण्याच्या टँकरच्या दरात वाढ झाल्याच्या तक्रारी अद्याप आपल्याकडे आल्या नसल्याचे महापौर नागपुरे यांनी स्पष्ट केले. टँकरचे दर स्थिर ठेवण्याबाबत लवकरच चर्चा करून निर्णय घेतला जाईल, असेही त्यांनी सांगितले.
दरम्यान, आंतरराष्ट्रीय योग दिनानिमित्त २१ जून रोजी पुण्यातही ‘योग उत्साह’ कार्यक्रम साजरा केला जाणार आहे. पंतप्रधान नरेंद्र मोदी यांनी योगाला दैनंदिन जीवनशैलीचा भाग बनवण्याचे आवाहन केले आहे.
पुणे महानगरपालिकेतर्फे स. प. महाविद्यालय मैदानावर २१ जून रोजी सकाळी साडेसहा वाजता हा कार्यक्रम होईल. यामध्ये योग प्रशिक्षक नागरिकांना योगाचे धडे देतील. या उपक्रमात तीन ते पाच हजार नागरिक सहभागी होण्याची अपेक्षा आहे.
पुणे शहरातील विविध संघटना या कार्यक्रमात सहभागी होणार आहेत. मनपा नियमितपणे विविध योग शिबिरे आयोजित करत असली तरी, योग दिनानिमित्त मोठ्या प्रमाणावर तयारी करण्यात आली आहे. सहभागी नागरिकांना प्रमाणपत्रही दिले जाईल.
