कुलगाम हल्ला:दहशतवादाने दोघांचे वडील हिरावले; एक मजूर तर मूलही पाहू शकला नाही, जखमी दुसऱ्या कामगाराचाही मृत्यू, दोन कुटुंबे उद्ध्वस्त

कुलगाम दहशतवादी हल्ल्यात जखमी दुसऱ्या कामगाराने, भूपेंद्र भैनाने शनिवारी प्राण सोडले.यासोबतच छत्तीसगडमधील दोन घरांची आशा एकाच वेळी उद्ध्वस्त झाली. २४ वर्षांचा दीपक रात्रे आणि २८ वर्षांचा भूपेंद्र भैना तिप्पट कमाई करून कुटुंबाचे भविष्य सुधारण्यासाठी काश्मीरला गेले होते, परंतु आता दोघेही कधीच घरी परतणार नाहीत. दीपकचे दीड वर्षापूर्वी लग्न झाले होते. त्याचा मुलगा अवघ्या तीन महिन्यांचा आहे. दीपक आठ-नऊ महिन्यांपूर्वी काश्मीरला गेला होता. तो मुलाचा चेहराही पाहू शकला नाही.

भूपेंद्रला रोजच्या २६१ रुपयांच्या मजुरीतून गरजा पूर्ण होत नव्हत्या. याच कारणामुळे ते पत्नीसोबत ३ महिन्यांपूर्वी काश्मीरला गेले होते, जिथे रोज १००० रु. मिळण्याची आशा होती. गावात ३ वर्षांचा मुलगा मानस, आजी व आत्यासोबत आहे. कामगारांवर जम्मू-काश्मीरमध्येच अंत्यसंस्कार करण्यात आले.

लश्करचा दहशतवादी लतीफवर संशय

कुलगाममध्ये २ परप्रांतीय कामगारांच्या हत्येमागे लश्करचा दहशतवादी लतीफ भटचा हात असल्याचा संशय आहे. तो टीआरएफ-लश्करशी जोडलेला आहे. पहलगाम हल्ल्याच्या तपासातही त्याचे नाव समोर आले होते.

‘राज्याचा दर्जा मागताच असे हल्ले’

नॅशनल कॉन्फरन्सचे अध्यक्ष फारूक अब्दुल्ला यांनी मजुरांच्या हत्येची चौकशी करण्याची मागणी केली. हल्लेखोरांची ओळख पटली पाहिजे असे सांगून ते म्हणाले, राज्याचा दर्जा बहाल करण्याची मागणी तीव्र होताच अशा घटना का घडतात?

मृतांच्या नातेवाइकांना मदत

छत्तीसगड सरकारने मृत्युमुखी पडलेल्या राज्यातील दोन्ही मजुरांच्या कुटुंबांना २०-२० लाखांची मदत जाहीर केली. तर जम्मू-काश्मीरचे मुख्यमंत्री उमर अब्दुल्ला यांनी १०-१० लाख व जिल्हा प्रशासनाने ६-६ लाख जाहीर केले.