अमरावती: होमीओपॅथी डॉक्टरांना ॲलोपॅथी वैद्यकासारखी प्रॅक्टिस करण्याची संधी उपलब्ध करून देण्याच्या सरकारच्या निर्णयाविरोधात स्थानिक डॉक्टरांनी मंगळवारी, ४ ऑगस्ट रोजी ‘ओपीडी बंद’ आंदोलन केले. या आंदोलनामुळे जिल्ह्यातील बहुतांश दवाखान्यांमधील ओपीडी सेवा सकाळी ६ वाजेपासून बुधवार सकाळपर्यंत बंद ठेवण्यात आली. इंडियन मेडिकल असोसिएशन (IMA) च्या आवाहनानुसार, या ‘ओपीडी बंद’ आंदोलनात जिल्ह्याभरातील सुमारे ११०० डॉक्टरांनी सहभाग नोंदवला. अतितातडीची वैद्यकीय सेवा वगळता सर्वसाधारण सेवा दिवसभर बंद ठेवण्यात आली होती. राज्यभरात अशीच स्थिती असल्याने काही नागरिकांना गैरसोयीचा सामना करावा लागला. आयएमएचे अध्यक्ष डॉ. दिनेश वाघाडे यांनी सांगितले की, शासनाने घेतलेला हा निर्णय ॲलोपॅथी डॉक्टरांच्या मुळावर उठणारा आहे. होमीओपॅथी डॉक्टरांची नोंदणी करण्यासाठी महाराष्ट्र मेडिकल कौन्सिलप्रमाणेच स्वतंत्र होमीओपॅथी कौन्सिल अस्तित्वात आहे. मात्र, त्यांच्या सततच्या मागणीनुसार शासनाने त्यांना महाराष्ट्र मेडिकल कौन्सिलमध्येही नोंदणीची मुभा दिली आहे. या निर्णयामुळे भविष्यात होमीओपॅथी डॉक्टर दोन्ही पॅथींची प्रॅक्टिस करू शकतील, अशी भीती ॲलोपॅथी डॉक्टरांना आहे. याच कारणामुळे राज्यभरातील ॲलोपॅथी डॉक्टरांनी मंगळवारी २४ तासांचा संप पुकारला. शासनाने या आंदोलनाची दखल न घेतल्यास भविष्यात याहून तीव्र पावले उचलण्याची तयारी संघटनेने केली असल्याचे पदाधिकाऱ्यांनी सांगितले. आंदोलनादरम्यान, आयएमएच्या एका प्रतिनिधीमंडळाने जिल्हाधिकारी आशिष येरेकर यांची भेट घेऊन त्यांना आपल्या मागण्यांचे निवेदन सादर केले. दुपारी अप्पर जिल्हाधिकारी गोविंद दानेज यांनाही निवेदन देण्यात आले. यावेळी आयएमएचे केंद्रीय पदाधिकारी डॉ. वसंत लुंगे, जिल्हा सचिव डॉ. विक्रम वानखडे, जिल्हा कोषाध्यक्ष डॉ. रोहण बोबडे, जिल्हा उपाध्यक्ष डॉ. विक्रम देशमुख, डॉ. तृप्ती दानखडे, डॉ. भूपेश भोंड आणि माजी अध्यक्ष डॉ. अल्का कुथे यांच्यासह इतर पदाधिकारी उपस्थित होते. महाराष्ट्र मेडिकल कौन्सिलमध्ये होमीओपॅथ डॉक्टरांना नोंदणीची मुभा देण्याचा मुद्दा न्यायालयातही पोहोचला आहे. न्यायालयीन निर्णयाच्या अधीन राहूनही राज्य शासनाने नोंदणीची प्रक्रिया सुरूच ठेवल्यामुळे हा लढा संपाचे हत्यार उपसण्यापर्यंत पोहोचला आहे.
Source link
होमीओपॅथी डॉक्टरांना ॲलोपॅथी प्रॅक्टिसची संधी:याविरोधात डॉक्टरांनी 'ओपीडी बंद' आंदोलन केले
