'काही अधिकारी मराठा सरकारमध्ये जाणीवपूर्वक दरी निर्माण करत आहेत':नरेंद्र पाटलांचा खळबळजनक दावा

मराठा समाज आणि सरकार यांच्यात जाणीवपूर्वक अंतर निर्माण करण्याचे काम काही अधिकारी करत असल्याचा खळबळजनक दावा नरेंद्र पाटील यांनी धाराशिव येथे प्रसारमाध्यमांशी बोलताना केला. या गंभीर प्रकाराबाबत त्यांनी थेट मुख्यमंत्र्यांकडे कारवाईची मागणी केली असून, त्यांच्या या विधानामुळे आता मराठा समाज आणि सरकारमध्ये असंतोष पसरवण्याचे काम नक्की कोणते अधिकारी करत आहेत, असा मोठा प्रश्न उपस्थित झाला आहे. मराठा उपसमिती आणि मंत्री चांगल्या पद्धतीने काम करत असले, तरी मुख्यमंत्री देवेंद्र फडणवीस यांनी मराठा समाजाच्या प्रश्नावर स्वतः थेट लक्ष घातल्यास अधिक चांगले होईल, असे मत नरेंद्र पाटील यांनी व्यक्त केले. तसेच, काही अधिकारी जाणीवपूर्वक मराठा समाज आणि सरकार यांच्यात अंतर निर्माण करण्याचे काम करत असल्याचा खळबळजनक दावाही त्यांनी केला आहे. एकीकडे मनोज जरांगे हे कुणबी प्रमाणपत्राच्या मुद्द्यावरून मैदानात उतरले असताना, दुसरीकडे अण्णासाहेब पाटील आर्थिक विकास महामंडळाच्या कामकाजावर नरेंद्र पाटील यांनी तीव्र असमाधान व्यक्त केले आहे. सद्यस्थितीत महामंडळाच्या लाभार्थ्यांशी थेट संवाद साधण्यासाठी त्यांच्याकडून जिल्हानिहाय बैठकांचे सत्र सुरू असून, यादरम्यान त्यांनी प्रशासकीय कारभारावर कडक शब्दांत ताशेरे ओढले आहेत. महामंडळातील अधिकाऱ्यांचा मनमानी कारभार अण्णासाहेब पाटील आर्थिक विकास महामंडळात अधिकाऱ्यांच्या मनमानी कारभारामुळे मराठा समाजातील तरुणांची मोठ्या प्रमाणावर अडवणूक होत असल्याचे पाटील यांनी निदर्शनास आणून दिले. महामंडळाच्या व्यवस्थापकीय संचालकांकडून (एमडी) जाचक अटी आणि शर्ती लादल्या जात असल्याबद्दल त्यांनी तीव्र नाराजी व्यक्त केली. संबंधित अधिकारी स्वतः मराठा समाजाचे असूनही ते अशी अडवणूक का करत आहेत, असा संतप्त सवाल त्यांनी उपस्थित केला. जात प्रमाणपत्रांच्या प्रक्रियेत जाणीवपूर्वक खोडसाळपणा काही ‘अतिहुशार’ अधिकारी जात प्रमाणपत्र देताना जाणीवपूर्वक खोडसाळपणा करत असल्याचा गंभीर आरोप नरेंद्र पाटील यांनी केला आहे. प्रशासनातील या अधिकाऱ्यांच्या आडमुठ्या धोरणांमुळे समाजातील तरुणांना नाहक मनस्ताप सहन करावा लागत असून, सरकारी प्रक्रियेत जाणीवपूर्वक अडथळे निर्माण करून समाजाची दिशाभूल केली जात असल्याचे त्यांनी स्पष्ट केले. कारवाईकडे दुर्लक्ष आणि आंदोलनाचा इशारा अधिकाऱ्यांच्या या मनमानी कारभाराबाबत मुख्यमंत्री आणि उपमुख्यमंत्र्यांकडे वारंवार तक्रारी करूनही अद्याप कोणतीही ठोस कारवाई झालेली नाही, असा दावा पाटील यांनी केला. सरकारच्या या निष्क्रियतेवर बोट ठेवत, न्याय न मिळाल्यास मराठा समाजातील तरुणांना एकत्रित करून सरकारविरोधात तीव्र आंदोलन उभारण्याचा थेट इशारा त्यांनी दिला आहे.



Source link