भोंदूबाबा अशोक खरात प्रकरणात 23 दिवसांत शेकडो कॉल्स:हेल्पलाईनवर तक्रारींचा स्फोट; आज कोर्टात खरातची पुन्हा हजेरी

नाशिकमधील भोंदूबाबा अशोक खरात प्रकरणाने संपूर्ण महाराष्ट्र हादरवून सोडला असून, तपास जसजसा पुढे सरकत आहे तसतसे नवे आणि धक्कादायक तपशील समोर येत आहेत. या गंभीर प्रकरणाचा तपास करण्यासाठी विशेष तपास पथक (एसआयटी) नेमण्यात आले आहे. एवढेच नव्हे, तर या प्रकरणाचे गांभीर्य लक्षात घेता महाराष्ट्र पोलिस दलातील वरिष्ठ अधिकारी स्वतः तपासाचा रोज आढावा घेत असल्याची माहिती समोर आली आहे. त्यामुळे या प्रकरणात अधिक मोठे खुलासे होण्याची शक्यता वर्तवली जात आहे. सुरुवातीला काही व्हिडिओ व्हायरल झाल्यानंतरही अनेक महिला बदनामीच्या भीतीने पुढे येण्यास तयार नव्हत्या. मात्र, पोलिसांनी महिलांची ओळख गोपनीय ठेवण्याचे आश्वासन दिल्यानंतर परिस्थितीत मोठा बदल झाला आहे. आता महिलांनी धैर्याने पुढे येत तक्रारी नोंदवण्यास सुरुवात केली आहे. यासाठी सुरू करण्यात आलेल्या विशेष हेल्पलाईनवर दररोज 5 ते 6 कॉल येत असून, मागील 23 दिवसांत शेकडो तक्रारी प्राप्त झाल्या आहेत. या तक्रारींमध्ये महिलांचे प्रमाण अधिक असल्याचेही समोर आले आहे. या तक्रारींमध्ये केवळ फसवणूक किंवा विश्वासघातच नाही, तर दबाव टाकून गैरप्रकार केल्याचेही आरोप आहेत. त्यामुळे पोलिसांचा तपास अधिक व्यापक करण्यात आला आहे. आतापर्यंत अशोक खरातविरोधात विविध कलमांखाली 15 गुन्हे दाखल करण्यात आले असून, त्यापैकी 8 गुन्हे महिलांवरील अत्याचाराशी संबंधित असल्याची माहिती पोलिसांनी दिली आहे. हेल्पलाईनवर आलेल्या माहितीच्या आधारे पोलिसांनी 40 जणांचे जबाब साक्षीदार म्हणून नोंदवले आहेत, ज्यामुळे या प्रकरणात आणखी गुन्हे उघड होण्याची शक्यता आहे. दरम्यान, या प्रकरणामुळे अंधश्रद्धा निर्मूलन समितीही आक्रमक झाली आहे. श्याम मानव यांच्या नेतृत्वाखाली अकोला येथे बुवाबाजी संमेलन आयोजित करण्यात आले आहे. यासोबतच राज्यभर अशाच प्रकारच्या जनजागृती कार्यक्रमांचे आयोजन केले जाणार आहे. अंधश्रद्धेविरोधात कठोर कारवाई व्हावी आणि जादूटोणा विरोधी कायद्याची प्रभावी अंमलबजावणी व्हावी, यासाठी प्रयत्न सुरू असल्याचे अंनिसचे महासचिव हरीश देशमुख यांनी स्पष्ट केले आहे. आज न्यायालयात हजर केले जाणार अशोक खरातविरोधातील महिला अत्याचार प्रकरणातील चौथ्या गुन्ह्याची पोलिस कोठडी आज संपत असल्याने त्याला पुन्हा न्यायालयात हजर केले जाणार आहे. पोलिसांकडून आता पाचव्या गुन्ह्यात त्याचा ताबा घेण्याची शक्यता वर्तवली जात आहे. यामुळे न्यायालयीन प्रक्रियेत आणखी महत्त्वाचे टप्पे गाठले जाणार आहेत. सरकारी पक्षाकडून नवे मुद्दे मांडले जाण्याची शक्यता दरम्यान, अंमलबजावणी संचालनालय (ईडी) आणि एसआयटीने संयुक्त कारवाई करत खरातच्या कार्यालयावर छापा टाकला असून, महत्त्वाची कागदपत्रे जप्त करण्यात आली आहेत. या पुराव्यांच्या आधारे आजच्या सुनावणीत सरकारी पक्षाकडून नवे मुद्दे मांडले जाण्याची शक्यता आहे. त्यामुळे या प्रकरणातील पुढील घडामोडींकडे संपूर्ण राज्याचे लक्ष लागले आहे.



Source link