शिक्षकांनी विद्यार्थ्यांमध्ये सत्यनिष्ठा, देशप्रेम आणि वैज्ञानिक दृष्टिकोन रुजवावा:उपमुख्यमंत्री सुनेत्रा पवार यांचे पुणे येथे आदर्श शिक्षक सन्मान सोहळ्यात आवाहन

शिक्षण हे सर्वात मोठे शस्त्र आहे आणि शिक्षक हे राष्ट्राची खरी संपत्ती आहेत. विद्यार्थ्यांना योग्य दिशा देण्याची महत्त्वाची जबाबदारी शिक्षकांवर आहे. शिक्षकांनी विद्यार्थ्यांना फक्त पुस्तकी ज्ञान न देता त्यांच्यामध्ये सत्यनिष्ठा, देशप्रेम आणि वैज्ञानिक दृष्टिकोन रुजवावा, असे आवाहन उपमुख्यमंत्री आणि पुणे जिल्ह्याच्या पालकमंत्री सुनेत्रा अजित पवार यांनी केले. जिल्हा परिषदेने आदर्श शिक्षक पुरस्कार, अध्यक्ष चषक आणि शिष्यवृत्ती परीक्षेतील गुणवंत विद्यार्थ्यांसाठी सन्मान सोहळा आयोजित केला होता. या सोहळ्यात त्या बोलत होत्या. यावेळी जिल्हा परिषद अध्यक्ष वीरधवल जगदाळे, आमदार शंकर मांडेकर, बापूसाहेब पठारे, मुख्य कार्यकारी अधिकारी गजानन पाटील, अतिरिक्त मुख्य कार्यकारी अधिकारी चंद्रकांत वाघमारे आणि उपाध्यक्ष विवेक वळसे पाटील उपस्थित होते. तसेच, आदर्श शिक्षक, गुणवंत विद्यार्थी आणि त्यांचे पालकही उपस्थित होते. उपमुख्यमंत्री पवार म्हणाल्या की, पुणे ही शिक्षणाची पंढरी आहे. महात्मा ज्योतिबा फुले आणि क्रांतिज्योती सावित्रीबाई फुले यांनी याच भूमीत शिक्षणाची ज्योत पेटवली. या समृद्ध शैक्षणिक परंपरेत शिक्षकांची भूमिका खूप महत्त्वाची आहे. शिक्षक हे समाज आणि राष्ट्राचे खरे शिल्पकार आहेत. ते विद्यार्थ्यांच्या व्यक्तिमत्त्वाची घडण करतात. पुणे जिल्ह्यातील जिल्हा परिषद शाळांचे शिक्षण क्षेत्रातील योगदान मोठे आहे. या शाळांमध्ये शिकणारी मुले ही ग्रामीण महाराष्ट्राची खरी ताकद आहेत. त्यांच्या गुणवत्ता आणि क्षमतेला योग्य दिशा देण्याचे काम शिक्षकांनी करावे. महाराष्ट्र ही संत, समाजसुधारक आणि शिक्षणतज्ज्ञांची भूमी आहे. राज्यातील अनेक शिक्षकांनी आपल्या कामातून राष्ट्रीय तसेच आंतरराष्ट्रीय स्तरावर नाव कमावले आहे, असेही त्यांनी सांगितले. त्या पुढे म्हणाल्या की, राज्य शासनाने शिक्षण आणि शिक्षण क्षेत्राच्या विकासाला नेहमीच प्राधान्य दिले आहे. बदलत्या काळानुसार शिक्षकांनी नवीन तंत्रज्ञान शिकणे आवश्यक आहे. विद्यार्थ्यांना कौशल्यावर आधारित शिक्षणासोबतच समस्या सोडवणे, टीमवर्क आणि मूल्याधारित शिक्षण द्यावे. त्यांच्यामध्ये चांगले गुण रुजवावेत. स्पर्धेच्या युगात आत्मविश्वासाने परिस्थितीला सामोरे जाणारी मजबूत पिढी घडवण्याची जबाबदारी शिक्षकांची आहे. विद्यार्थ्यांनी वाचन करावे, विचार करावा, प्रश्न विचारावेत, स्वतःचे मत तयार करावे आणि अपयशाची भीती बाळगू नये, असा सल्लाही उपमुख्यमंत्री पवार यांनी दिला.



Source link