राज्यात आणखी एक परीक्षा रद्द:भंडाऱ्यात MPSC पूर्वतयारी प्रवेश परीक्षेदरम्यान वीज गेल्याने विद्यार्थ्यांचा संताप, गोंधळानंतर परीक्षा पुढे ढकलली; आता 24 सप्टेंबरला पुन्हा होणार परीक्षा

महाराष्ट्रात विविध स्पर्धा परीक्षांच्या आयोजनावरून गोंधळाच्या घटना समोर येत असताना आता भंडारा जिल्ह्यात एमपीएससी पूर्वतयारीसाठी घेण्यात आलेल्या प्रवेश परीक्षेतही मोठा गोंधळ झाल्याचे समोर आले आहे. परीक्षा सुरू असतानाच मुसळधार पावसामुळे परीक्षा केंद्रावरील वीजपुरवठा खंडित झाला. त्यात पर्यायी वीजव्यवस्थाही उपलब्ध नसल्याने परीक्षार्थींना मोठ्या अडचणींचा सामना करावा लागला. अखेर विद्यार्थ्यांच्या संतापानंतर ही परीक्षा रद्द करून नव्या तारखेला घेण्याचा निर्णय घेण्यात आला आहे. शासनाच्या बार्टी (BARTI), आर्टी (ARTI), सारथी (SARTHI) आणि अमृत या संस्थांच्या माध्यमातून एमपीएससी परीक्षेची पूर्वतयारी करणाऱ्या विद्यार्थ्यांना मोफत मार्गदर्शन उपलब्ध करून देण्यासाठी ऑनलाइन प्रवेश परीक्षा आयोजित करण्यात आली होती. या परीक्षेसाठी भंडारा जिल्ह्यातील भंडारा आणि साकोली येथे परीक्षा केंद्रे निश्चित करण्यात आली होती. मात्र, भंडारा शहरातील नूतन महाराष्ट्र विद्यालय येथील परीक्षा केंद्रावर परीक्षा सुरू झाल्यानंतर काही वेळातच परिस्थिती बिघडली. दुपारी साडेचारच्या सुमारास परीक्षा सुरू असताना भंडारा परिसरात मुसळधार पावसाला सुरुवात झाली. पावसाचा जोर वाढताच परीक्षा केंद्रातील वीजपुरवठा खंडित झाला. ऑनलाइन पद्धतीने परीक्षा सुरू असल्याने वीज गेल्यानंतर परीक्षेचे कामकाज ठप्प झाले. जनरेटरचीही व्यवस्था ठरली अपुरी परीक्षा केंद्रावर वीज गेल्यानंतर विद्यार्थ्यांना पर्यायी व्यवस्था उपलब्ध होईल, अशी अपेक्षा होती. मात्र, केंद्रावरील जनरेटरही सुरू नसल्याचे समोर आले. त्यामुळे ऑनलाइन परीक्षा देत असलेल्या विद्यार्थ्यांसमोर मोठी अडचण निर्माण झाली. परीक्षा देता येत नसल्याने विद्यार्थ्यांनी केंद्रावर नाराजी व्यक्त करण्यास सुरुवात केली. परीक्षेसाठी भंडारा जिल्ह्याबरोबरच गडचिरोली, चंद्रपूर, गोंदिया आणि इतर भागांतूनही विद्यार्थी आले होते. अनेक विद्यार्थी लांबचा प्रवास करून परीक्षा केंद्रावर पोहोचले होते. त्यामुळे परीक्षा अचानक विस्कळीत झाल्याने विद्यार्थ्यांचा संताप आणखी वाढला. विद्यार्थ्यांचा केंद्रावर गोंधळ वीजपुरवठा सुरळीत न झाल्याने आणि ऑनलाइन परीक्षा पुढे सुरू करणे शक्य नसल्याने परीक्षार्थींनी परीक्षा केंद्रावर गोंधळ घातला. विद्यार्थ्यांनी प्रशासनाच्या नियोजनावर प्रश्न उपस्थित करत नाराजी व्यक्त केली. दूरवरून आलेल्या विद्यार्थ्यांचा प्रवास, वेळ आणि झालेला आर्थिक खर्च यामुळे त्यांच्यात अस्वस्थता निर्माण झाली. परिस्थिती गंभीर होत असल्याचे लक्षात आल्यानंतर जिल्हा प्रशासन आणि पोलीस प्रशासनाने हस्तक्षेप केला. संबंधित अधिकाऱ्यांनी बार्टीच्या पुणे येथील मुख्यालयाशी संपर्क साधला. त्यानंतर परिस्थितीचा विचार करून नियोजित परीक्षा रद्द करण्याचा निर्णय घेण्यात आला. आता 24 सप्टेंबरला पुन्हा परीक्षा परीक्षा केंद्रावरील तांत्रिक अडचणी आणि वीजपुरवठा खंडित झाल्यामुळे रद्द करण्यात आलेली परीक्षा आता 24 सप्टेंबर रोजी पुन्हा घेण्यात येणार आहे. त्यामुळे विद्यार्थ्यांना पुन्हा परीक्षा देण्याची संधी मिळणार आहे. मात्र, परीक्षेसाठी आधीच लांबचा प्रवास करून आलेल्या विद्यार्थ्यांना पुन्हा परीक्षा केंद्रावर यावे लागणार असल्याने त्यांचा वेळ आणि प्रवासाचा अतिरिक्त खर्च वाढणार आहे. त्यामुळे परीक्षा केंद्रांवर ऑनलाइन परीक्षा घेण्यापूर्वी वीजपुरवठा, जनरेटरसह आवश्यक तांत्रिक सुविधा व्यवस्थित उपलब्ध आहेत की नाहीत, याची खात्री प्रशासनाने करावी, अशी अपेक्षा विद्यार्थ्यांकडून व्यक्त होत आहे. या प्रकारामुळे परीक्षा आयोजनातील नियोजन आणि तांत्रिक व्यवस्थेचा मुद्दा पुन्हा एकदा चर्चेत आला असून, 24 सप्टेंबर रोजी होणारी परीक्षा सुरळीत पार पडते का, याकडे विद्यार्थ्यांचे लक्ष लागले आहे. हेही वाचा… प्राथमिक दुष्काळ एक-दोन दिवसांत जाहीर होईल:DCM एकनाथ शिंदे यांची घोषणा, म्हणाले- शेतकऱ्यांची दिवाळी काळी होऊ देणार नाही आज झालेल्या मंत्रिमंडळाच्या बैठकीत प्रामुख्याने दुष्काळ परिस्थितीवर चर्चा करण्यात आली. राज्याच्या बहुतांश भागात पिके करपली असून पिण्याचे पाणी आणि जनावरांच्या चाऱ्याचा प्रश्न निर्माण झाला आहे. यावर उपाययोजना करण्यासाठी महसूलमंत्री चंद्रशेखर बावनकुळे यांच्या अध्यक्षतेखाली समिती स्थापन करण्यात आली असल्याची माहिती मुख्यमंत्री देवेंद्र फडणवीस यांनी दिली आहे. तसेच उपमुख्यमंत्री एकनाथ शिंदे यांनी देखील प्राथमिक दुष्काळ जो आहे तो एक-दोन दिवसात जाहीर होणार असल्याची माहिती दिली आहे. सविस्तर वाचा…



Source link