विधान परिषदेच्या शिक्षक मतदारसंघाची निवडणूक जाहीर झाल्यामुळे मंगळवार दुपारपासून अमरावतीसह विभागातील पाचही जिल्ह्यांमध्ये आदर्श आचारसंहिता लागू झाली आहे. यामुळे निवडणुकीचा निकाल लागेपर्यंत महिनाभर विकासकामांना ब्रेक लागणार आहे. शिक्षक मतदारसंघाच्या निवडणुकीची घोषणा मंगळवारी सकाळी झाली. २७ सप्टेंबरपासून उमेदवारी अर्ज दाखल करण्याची प्रक्रिया सुरू होईल. २३ ऑक्टोबरला मतदान होईल आणि २७ ऑक्टोबर रोजी निकाल जाहीर केला जाईल. या काळात कोणतीही नवीन कामे मंजूर केली जाणार नाहीत. लोकप्रतिनिधींच्या अधिकारांवरही मर्यादा येतील, त्यामुळे त्यांच्या सभा-बैठकांनाही थांबवले जाईल. नवीन विकासकामांची घोषणा करणे, भूमिपूजन किंवा उद्घाटन करण्यास पूर्णपणे बंदी आहे. मंत्री किंवा लोकप्रतिनिधी नवीन निधी मंजूर करू शकणार नाहीत किंवा आर्थिक सवलती देऊ शकणार नाहीत. निवडणुकीशी संबंधित अधिकारी किंवा प्रशासकीय अधिकाऱ्यांच्या बदल्यांवरही बंदी असेल. शासकीय वाहने, विश्रामगृहे किंवा इतर सरकारी साधनांचा निवडणूक प्रचारासाठी वापर करता येणार नाही. मात्र, आचारसंहिता लागू होण्यापूर्वी ज्या विकासकामांचे आदेश दिले गेले आहेत आणि ज्यांचे काम सुरू झाले आहे, ती कामे सुरूच राहतील. निवडणूक निर्णय अधिकारी तथा विभागीय आयुक्त नयना गुंडे यांनी पाचही जिल्ह्यांच्या जिल्हाधिकाऱ्यांना याबाबत सूचना दिल्या आहेत. निवडणूक कार्यक्रम जाहीर होताच, सर्व पाचही सहायक निवडणूक अधिकाऱ्यांची प्राथमिक बैठकही घेण्यात आली. आचारसंहितेच्या काळात नवीन कामांना मंजुरी देण्यावर किंवा निधी वाटप करण्यावर बंदी असली तरी, आपत्ती निवारणाशी संबंधित कोणतीही कामे थांबवली जाणार नाहीत. नैसर्गिक आपत्ती, आरोग्य सेवा किंवा आपत्कालीन परिस्थितीत मदतकार्य करण्यास कोणतीही अडचण येणार नाही. याशिवाय, जर एखादे तातडीचे काम करणे आवश्यक असेल, तर निवडणूक आयोगाची पूर्वपरवानगी घेऊन ते काम करता येईल.
Source link
जिल्ह्यातील विकासकामांना महिनाभराचा ब्रेक:विधान परिषदेच्या शिक्षक मतदारसंघाच्या आचारसंहितेमुळे लोकप्रतिनिधींचा हस्तक्षेपही थांबणार
