गोकुळमध्ये फोडाफोडीचे राजकारण करणार नाही:आम्ही विरोधातच बसणार, धनंजय महाडिकांची स्पष्टोक्ती; क्रॉस व्होटिंगचा अंदाज चुकला, पराभवाचे आत्मचिंतन करणार

गोकुळ दूध संघाच्या निवडणुकीत महायुतीला अपेक्षित यश मिळाले नसून, निवडणुकीत मोठ्या प्रमाणावर क्रॉस व्होटिंग झाल्याचे भाजपचे खासदार धनंजय महाडिक यांनी मान्य केले आहे. मतदारांपर्यंत पोहोचण्यात आणि महायुतीची भूमिका समजावून सांगण्यात आम्ही कुठेतरी कमी पडलो. त्यामुळे मतदारांनी दिलेला कौल आम्ही स्वीकारला आहे, असे त्यांनी स्पष्ट केले. गोकुळमध्ये सत्तेसाठी कोणाची फोडाफोडी करण्याचा आमचा विचार नाही. महायुतीचे 12 संचालक निवडून आले असून, आम्ही विरोधात बसणार आहोत. चांगल्या कामांना सहकार्य आणि चुकीच्या कामांना विरोध, अशी आमची भूमिका असेल, असेही महाडिक यांनी सांगितले. गोकुळ दूध संघाच्या निवडणुकीतील निकालानंतर धनंजय महाडिक यांनी माध्यमांशी संवाद साधला. या वेळी त्यांनी महायुतीच्या पराभवाची कारणे, क्रॉस व्होटिंग, शौमिका महाडिक यांचा पराभव, सतेज पाटील यांची प्रचार रणनीती आणि आगामी काळातील महायुतीची भूमिका यावर भाष्य केले. क्रॉस व्होटिंगचा अंदाज आला नाही गोकुळच्या निवडणुकीत एवढ्या मोठ्या प्रमाणावर क्रॉस व्होटिंग होईल, अशी अपेक्षा नव्हती. प्रत्यक्ष मैदानावरूनही त्याचा अंदाज आला नाही, असे महाडिक यांनी सांगितले. महायुतीतील सर्व पक्षांनी एकत्र येऊन पूर्वीचे संघर्ष संपवले असून, एकीच्या माध्यमातून मतदारांसमोर जाण्याचा प्रयत्न केला होता. मात्र, ही एकी मतदारांपर्यंत प्रभावीपणे पोहोचवण्यात आम्ही कमी पडलो असण्याची शक्यता आहे. काही गोष्टी मतदारांना पटल्या नसतील किंवा त्यांची समजूत घालण्यात आम्ही अपुरे पडलो असू, असे त्यांनी मान्य केले. या पराभवामागे एकच कारण नसून अनेक बाबींचा परिणाम झाला असण्याची शक्यता आहे. जुन्या आणि नव्या नेतृत्वातील मतभेद, उमेदवार निवडीबाबतची नाराजी आणि प्रचारासाठी मिळालेला अपुरा वेळ अशा विविध मुद्द्यांचे विश्लेषण करावे लागेल. महायुतीतील सर्व पक्ष एकत्र बसून नेमके कुठे चुकले, याचे आत्मपरीक्षण करणार असल्याचे महाडिक यांनी सांगितले. सत्तेसाठी फोडाफोडी करणार नाही गोकुळच्या निवडणुकीत महायुतीचे 12 संचालक निवडून आले असून, विरोधी बाजूचे 13 संचालक असल्याची चर्चा आहे. त्यामुळे सत्तेसाठी एखाद्या संचालकाला आपल्या बाजूने वळवण्याचे प्रयत्न होणार का, असा प्रश्न उपस्थित करण्यात आला. त्यावर महाडिक यांनी फोडाफोडीच्या चर्चेला स्पष्टपणे नकार दिला. ‘आमचे 12 संचालक निवडून आले आहेत. आम्ही विरोधात बसणार आहोत. चांगल्या कामाला सहकार्य आणि चुकीच्या कामाला विरोध, अशी भूमिका घेऊन पुढील पाच वर्षे काम करण्याचा निर्णय घेतला आहे,’ असे त्यांनी सांगितले. संचालकांना फोडण्याबाबत महायुतीची कोणतीही बैठक झालेली नाही. अशा प्रकारच्या अफवा किंवा चर्चांवर विश्वास ठेवण्याचे कारण नाही, असेही त्यांनी स्पष्ट केले. शौमिका महाडिक यांच्या पराभवाचे विश्लेषण करणार गोकुळच्या निवडणुकीत शौमिका महाडिक यांचा झालेला पराभव हा महायुतीसाठी धक्कादायक मानला जात आहे. गेल्या पाच वर्षांत त्यांनी विरोधी संचालक म्हणून काम करताना अनेक मुद्द्यांवर आक्रमक भूमिका घेतली होती. त्यांचा संघर्ष सर्वांनी पाहिला आहे. त्या स्पष्टवक्त्या आहेत आणि त्यांनी चांगले काम केले, असे धनंजय महाडिक यांनी सांगितले. महायुतीमध्ये एकी घडवून आणण्यासाठी बराच कालावधी लागला. पूर्वी एकमेकांवर टीका-टिप्पणी, आरोप-प्रत्यारोप आणि न्यायालयीन लढाया सुरू होत्या. त्यानंतर जिल्ह्यातील महायुतीच्या प्रमुख नेत्यांनी एकत्र बसून निवडणूक लढवण्याचा निर्णय घेतला. मात्र, जागावाटप आणि उमेदवार निश्चित करण्यासाठी शेवटपर्यंत वेळ लागला. माघारीच्या दिवसापर्यंत उमेदवारांची नावे निश्चित होत होती. दुसरीकडे विरोधकांचा प्रचार आधीच सुरू झाला होता. महायुतीला प्रचारासाठी पुरेसा वेळ मिळाला नाही. चार-पाच तालुक्यांमध्येच मेळावे घेता आले, तर इतर तालुक्यांपर्यंत पोहोचणे शक्य झाले नाही. या परिस्थितीचा निकालावर परिणाम झाला असण्याची शक्यता आहे. शौमिका महाडिक यांना चांगला पाठिंबा मिळेल, अशी अपेक्षा होती. मात्र, त्यांचा पराभव नेमका कशामुळे झाला, हे तालुकानिहाय आणि मतदान केंद्रनिहाय आकडेवारी तपासल्यानंतरच स्पष्ट होईल, असे महाडिक यांनी सांगितले. ’25-0’च्या अपेक्षेपासून 12 जागांपर्यंतचा प्रवास महायुतीकडून मोठ्या विजयाची अपेक्षा व्यक्त केली जात होती. मात्र, प्रत्यक्ष निकालात महायुतीला 12 जागांवर समाधान मानावे लागले. याबाबत विचारले असता महाडिक यांनी मतदारांचा कौल स्वीकारण्याची भूमिका मांडली. ‘मतदारांना किंवा ठरावधारकांना काही गोष्टी पटल्या नसतील. आम्ही त्यांना समजावून सांगण्यात कमी पडलो असू. जुन्या आणि नव्या लोकांमध्येही काही मुद्द्यांवर मतभेद होते. त्यामुळे एकाच कारणावर या पराभवाचे विश्लेषण करता येणार नाही,’ असे ते म्हणाले. हसन मुश्रीफ यांनी त्यांच्या मुलाचा ठरवून पराभव केल्याचे वक्तव्य केल्याबाबत विचारले असता, या संदर्भातील मतदानाच्या आकडेवारीचे अद्याप विश्लेषण झाले नसल्याचे महाडिक यांनी सांगितले. पदवीधर आणि शिक्षक मतदारसंघाच्या निवडणुकीच्या प्रक्रियेत व्यस्त असल्यामुळे गोकुळच्या निकालाचे सविस्तर विश्लेषण करता आलेले नाही. मतदान केंद्रनिहाय आकडे तपासल्यानंतरच याबाबत अधिक स्पष्टपणे बोलता येईल, असे त्यांनी नमूद केले. सतेज पाटील यांच्या प्रचाराला सुरुवातीपासून आघाडी गोकुळच्या निवडणुकीत सतेज पाटील यांची रणनीती यशस्वी ठरल्याचे महाडिक यांनी मान्य केले. सतेज पाटील यांनी सुरुवातीपासून प्रचारात आघाडी घेतली होती. त्यांनी मांडलेल्या काही भूमिकांचा आणि कथनांचा मतदारांवर प्रभाव पडला असण्याची शक्यता आहे, असे महाडिक म्हणाले. सर्व निर्णय मुंबईतून घेतले जातात, या सतेज पाटील यांच्या आरोपांवरही त्यांनी प्रतिक्रिया दिली. काँग्रेसकडून चुकीचे कथन पसरवले जात असल्याचा आरोप करत, गोकुळच्या कामकाजातील निर्णय स्थानिक पातळीवर संचालक मंडळ, अध्यक्ष आणि अधिकारी यांच्या माध्यमातून घेतले जातात, असे महाडिक यांनी सांगितले. गोकुळ ही गेल्या 40 ते 50 वर्षांपासून कार्यरत असलेली संस्था असून, तिचे निर्णय घेण्यासाठी प्रत्येक वेळी मुंबईला जाण्याची गरज नसते, असेही ते म्हणाले. शपथविधीच्या कार्यक्रमाचा परिणाम झाला नाही महायुतीच्या प्रचारादरम्यान घेण्यात आलेल्या शपथविधीच्या कार्यक्रमामुळे मतदारांमध्ये गैरसमज निर्माण झाला का, असा प्रश्नही महाडिक यांना विचारण्यात आला. मात्र, या कार्यक्रमाचा निवडणुकीवर परिणाम झाला, असे आपल्याला वाटत नसल्याचे त्यांनी स्पष्ट केले. निवडणूक, परीक्षा किंवा व्यवसायाच्या सुरुवातीला अनेक जण देवाचे स्मरण करतात आणि आशीर्वाद घेतात. त्याच भावनेतून असे कार्यक्रम केले जातात. ही पद्धत नवीन नसल्याचेही त्यांनी नमूद केले. शिक्षक आणि पदवीधर निवडणुकीत विजयाचा विश्वास पुणे पदवीधर आणि शिक्षक मतदारसंघाच्या निवडणुकीबाबत बोलताना महाडिक यांनी महायुतीच्या उमेदवारांच्या विजयाचा विश्वास व्यक्त केला. शिक्षक मतदारसंघात भाजपची पारंपरिक मतपेढी असून, पाच जिल्ह्यांमध्ये पक्षाचे प्रभावी संघटन आहे. राष्ट्रवादी काँग्रेसचीही अनेक जिल्ह्यांत चांगली ताकद असून, त्याचा फायदा महायुतीला होईल, असे ते म्हणाले. शिवसेनेने उमेदवारी उशिरा जाहीर केल्यामुळे काही प्रमाणात परिणाम होण्याची शक्यता असली, तरी त्याचा मोठा फटका बसेल असे वाटत नाही. शिक्षक आणि पदवीधर मतदारसंघातील दोन्ही उमेदवार चांगल्या मताधिक्याने निवडून येतील, असा विश्वास त्यांनी व्यक्त केला. 500 कोटींच्या आरोपावर बोलणे टाळले मनोज जरांगे यांनी भाजपकडून एकनाथ शिंदे यांना 500 कोटी रुपये दिल्याचा आरोप केल्याबाबत विचारले असता, महाडिक यांनी या विषयावर भाष्य करणे टाळले. ‘मी ते वक्तव्य ऐकलेले नाही. 500 कोटी रुपये एवढेच मला समजले; मात्र नेमके काय वक्तव्य आहे, याची माहिती नाही,’ असे त्यांनी सांगितले. पुढील पाच वर्षे विरोधकाची भूमिका गोकुळच्या निवडणुकीतील पराभव स्वीकारत महायुतीने आता विरोधी बाकांवर बसण्याचा निर्णय घेतला आहे. निकालामागील कारणांचा अभ्यास करून आगामी काळात संघटनात्मक पातळीवर सुधारणा करण्याचा प्रयत्न केला जाणार आहे. गोकुळच्या कामकाजात चांगल्या निर्णयांना पाठिंबा आणि चुकीच्या निर्णयांना विरोध करण्याची भूमिका महायुती घेणार असल्याचे धनंजय महाडिक यांनी स्पष्ट केले. त्यामुळे गोकुळमधील सत्तेसाठी संचालकांची फोडाफोडी करण्याच्या चर्चांना पूर्णविराम देत, महायुतीने विरोधी पक्षाची भूमिका बजावण्याचे संकेत दिले आहेत. हेही वाचा…. जिल्हा बँकेच्या निवडणुकीतून उदयनराजेंची माघार:म्हणाले, ‘का मीच पाहिजे सगळीकडे? सगळ्यांना संधी मिळाली पाहिजे’ सातारा जिल्हा मध्यवर्ती सहकारी बँकेच्या निवडणुकीत खासदार उदयनराजे भोसले यांनी आपला उमेदवारी अर्ज मागे घेतला आहे. सर्वोच्च न्यायालयाच्या निर्णयाचा दाखला देत त्यांनी ही माघार घेतल्याचे स्पष्ट केले. त्यांच्या माघारीमुळे जिल्हा बँकेच्या निवडणुकीतील राजकीय घडामोडींना वेग आला आहे. ‘सगळ्यांना संधी मिळाली पाहिजे. का मीच पाहिजे सगळीकडे?’ अशी भूमिका मांडत उदयनराजेंनी आपल्या निर्णयामागील भूमिका स्पष्ट केली. दरम्यान, बँक नागरी पतसंस्था मतदारसंघातून माजी खासदार रणजीतसिंह नाईक निंबाळकर यांचा बिनविरोध निवडीचा मार्ग मोकळा झाला असून, त्यांचा प्रथमच सातारा जिल्हा बँकेत प्रवेश होणार आहे. सविस्तर वाचा…



Source link