बागेश्वर धामचे धीरेंद्र कृष्ण शास्त्री यांच्या वक्तव्यावरून राज्यात नवीन वाद निर्माण झाला आहे. राष्ट्रवादी काँग्रेसच्या अजित पवार गटाचे नेते अमोल मिटकरी यांनी शास्त्रींवर जोरदार टीका करत त्यांच्या विधानांना चुकीचा इतिहास ठरवले आहे. शिवाजी महाराजांबद्
.
अमोल मिटकरी यांनी सोशल मीडियावर प्रतिक्रिया देताना स्पष्ट शब्दांत इशारा दिला. त्यांनी म्हटले की, बाहेरून येणाऱ्या व्यक्तींनी महाराष्ट्रात येऊन छत्रपती शिवाजी महाराज यांच्याबद्दल बोलणे ही चिंतेची बाब आहे. शिवरायांनी उभे केलेले स्वराज्य कुणाच्या झोळीत टाकले जाईल, असे चित्र रंगवणे हा इतिहासाचा अपमान असल्याचे त्यांनी म्हटले. अशा प्रकारच्या विधानांना महाराष्ट्र कधीही स्वीकारणार नाही, असेही त्यांनी ठामपणे सांगितले.
मिटकरी यांनी आपल्या टीकेत आणखी तीव्र शब्दांचा वापर केला. त्यांनी बागेश्वर बाबांना भोंदू म्हणत, त्यांना अशोक खरातसारख्या प्रकरणांप्रमाणेच उपचारासाठी पाठवावे, अशी टीका केली. तसेच, अशी हिंमत या लोकांमध्ये येते कुठून? असा सवाल उपस्थित करत त्यांनी संतप्त प्रतिक्रिया व्यक्त केली. आपल्या ट्विटमध्ये त्यांनी संत तुकारामांच्या अभंगातील ओळींचाही उल्लेख केला.
दरम्यान, हा वाद बागेश्वर महाराजांनी नागपूरमध्ये सांगितलेल्या एका कथेमुळे निर्माण झाला आहे. त्यांच्या कथनानुसार, युद्धांनी थकलेले शिवाजी महाराज समर्थ रामदास स्वामी यांच्याकडे गेले आणि राज्याची जबाबदारी सोपवण्याची इच्छा व्यक्त केली. त्यानंतर रामदास स्वामींनी गुरु-शिष्य नात्याचा संदर्भ देत पुन्हा राज्यकारभाराची जबाबदारी शिवरायांनाच दिली, असा प्रसंग त्यांनी मांडला.
राजकीय आणि सामाजिक पातळीवर चर्चा
या कथनावरूनच मिटकरी यांनी आक्षेप घेतला आहे. त्यांचे म्हणणे आहे की, अशा प्रकारे इतिहास मांडणे चुकीचे असून त्यातून समाजात चुकीचा संदेश जातो. शिवरायांच्या कार्याची व्याप्ती आणि त्यांचे योगदान याचा विपर्यास होत असल्याचे त्यांनी म्हटले. त्यामुळे या प्रकाराला विरोध करणे आवश्यक असल्याचेही त्यांनी अधोरेखित केले. या प्रकरणामुळे आता राजकीय आणि सामाजिक पातळीवर चर्चा रंगली आहे. एका बाजूला बागेश्वर महाराजांचे समर्थक त्यांच्या वक्तव्याचे समर्थन करत आहेत, तर दुसऱ्या बाजूला विरोधकांकडून तीव्र टीका केली जात आहे. या वादाचा पुढील काळात काय परिणाम होतो आणि या विषयावर आणखी प्रतिक्रिया येतात का, याकडे सर्वांचे लक्ष लागले आहे.
या संदर्भातील खालील बातमी देखील वाचा….
