आरोपींचा थेट कोर्टाच्या आवारातच राडा:बंदोबस्तावरील पोलिसांना धक्काबुक्की; शिवाजीनगर न्यायालयात गोंधळ घालणाऱ्या 9 जणांवर गुन्हा दाखल

पुण्यातील अत्यंत वर्दळीच्या शिवाजीनगर जिल्हा व सत्र न्यायालयाच्या आवारात बेकायदा जमाव जमवून प्रचंड गोंधळ घालणे, कर्तव्यावर असणाऱ्या पोलिसांना धक्काबुक्की करणे आणि सरकारी कामात थेट अडथळा आणल्याप्रकरणी शिवाजीनगर पोलिसांनी तब्बल 9 जणांविरुद्ध गंभीर स्वरूपाचा गुन्हा दाखल केला आहे. समर्थ पोलीस ठाण्यातील एका जुन्या गुन्ह्याच्या सुनावणीदरम्यान न्यायालयाने निकाल देण्याचे कामकाज सुरू असतानाच आरोपींनी हा राडा घातला. या धक्कादायक घटनेमुळे न्यायालय परिसरात उपस्थित वकील, पक्षकार आणि कर्मचाऱ्यांमध्ये काही काळ भीतीचे व तणावाचे वातावरण निर्माण झाले होते. या संपूर्ण प्रकरणी रिजवाना फिरोज गाजेखान (वय 54) यांनी शिवाजीनगर पोलीस ठाण्यात अधिकृत फिर्याद नोंदवली आहे. त्या तक्रारीच्या आधारे पोलिसांनी तात्काळ कारवाई करत संबंधित आरोपींवर कायदेशीर कारवाईचा बडगा उचलला आहे. पिंपरी-चिंचवड, लोणी काळभोर आणि बीडमधील 9 जणांवर गुन्हा पोलिसांनी दिलेल्या माहितीनुसार, या प्रकरणात गुन्हा दाखल करण्यात आलेल्या आरोपींमध्ये महिला आणि पुरुषांचा समावेश आहे. चिखली (पिंपरी-चिंचवड) येथील रहिवासी नामदेव उमाजी पवार (वय 59), प्रशांत नामदेव पवार (वय 32), शांता नामदेव पवार (वय 52) आणि सोपान विठ्ठल चव्हाण (वय 33, सर्व रा. मोरे वस्ती, चिखली). तसेच लोणी काळभोर येथील रहिवासी अमित विलास पवार (वय 32) आणि आशा गोरखनाथ चव्हाण (वय 31) आणि रामनगर तांडा (बीड) येथील रहिवासी सविता लहू चव्हाण (वय 38), लहू नारायण चव्हाण (वय 44) आणि प्रांजल लहू चव्हाण (वय 23, सर्व रा. रामनगर तांडा, माजलगाव, जि. बीड) या सर्व 9 जणांवर बेकायदा जमाव जमवणे, शांततेचा भंग करणे, कर्तव्यावरील पोलीस अंमलदारांना धक्काबुक्की करणे आणि सरकारी कामात अडथळा निर्माण केल्याप्रकरणी भारतीय न्याय संहितेच्या संबंधित कलमांन्वये गुन्हा नोंदवण्यात आला आहे. न्यायालयाचा आदेश सुरू असतानाच कोर्ट रूमबाहेर गोंधळ पोलिसांनी दिलेल्या माहितीनुसार, आरोपींवर समर्थ पोलीस ठाण्यात एका गुन्ह्याप्रकरणी खटला दाखल होता. या प्रकरणाची नियमित सुनावणी शिवाजीनगर न्यायालयात सुरू होती. न्यायाधीश संबंधित प्रकरणावर निकाल व न्यायालयीन आदेश देण्याचे कामकाज करत असताना, आरोपींनी कोर्ट रूमबाहेर आणि न्यायालयीन आवारात आरडाओरड करत गोंधळ घालण्यास सुरुवात केली. पोलिसांना धक्काबुक्की न्यायालयीन आवारात कर्तव्यावर तैनात असलेल्या पोलीस कर्मचाऱ्यांनी जमावाला शांत करण्याचा प्रयत्न केला. “न्यायालयीन कक्षाच्या बाहेर गोंधळ घालू नका, कोर्टाचे कामकाज सुरू आहे,” असे सांगत पोलिसांनी त्यांना समजावण्याचा प्रयत्न केला असता, आरोपी अधिकच आक्रमक झाले. त्यांनी पोलिसांच्या सूचना झुगारून देत बंदोबस्तावरील कर्मचाऱ्यांशी हुज्जत घातली आणि त्यांना थेट अंगावर धावून जात धक्काबुक्की केली. वरिष्ठ पोलीस अधिकाऱ्यांची घटनास्थळी धाव न्यायालयासारख्या अत्यंत सुरक्षित ठिकाणी पोलिसांवरच हात उचलल्याची माहिती मिळताच पोलीस यंत्रणा तात्काळ सतर्क झाली. शिवाजीनगर पोलीस ठाण्याचे वरिष्ठ पोलीस निरीक्षक गिरीशकुमार दिघावकर यांनी फौजफाट्यासह घटनास्थळी धाव घेतली आणि परिस्थिती नियंत्रणात आणली. आरोपी पोलिसांच्या ताब्यात पोलिसांनी आवारात राडा घालणाऱ्या सर्व संशयित आरोपींना तात्काळ ताब्यात घेतले आणि शिवाजीनगर पोलीस ठाण्यात आणून त्यांच्यावर अधिकृत गुन्हा दाखल केला. सध्या या प्रकरणाचा पुढील सखोल तपास शिवाजीनगर पोलीस ठाण्याचे पोलीस उपनिरीक्षक एन. फटांगरे करत आहेत. न्यायालय परिसरातील सीसीटीव्ही (CCTV) फुटेजच्या आधारे पोलीस अधिक पुरावे गोळा करत असून, न्यायालयात अशा प्रकारे कायदा हातात घेणाऱ्यांवर कडक कारवाई केली जाईल, असा इशारा पोलीस प्रशासनाने दिला आहे.



Source link