बालकांच्या संरक्षणासाठी पोक्सो कायद्याविषयी जनजागृती आवश्यक:सहाय्यक पोलिस निरीक्षक प्रेमलता जगताप, 'सुरक्षित बचपन अभियान' अंतर्गत कार्यक्रम

बालकांचे लैंगिक गुन्ह्यांपासून संरक्षण करण्यासाठी कायद्याविषयी जागरूकता, योग्य खबरदारी आणि गुन्ह्यांची निर्भयपणे तक्रार करणे आवश्यक आहे, असे प्रतिपादन भरोसा सेलच्या सहाय्य पोलिस निरीक्षक प्रेमलता जगताप यांनी रविवारी (ता. १) येथे केले. तालुका विधी सेवा समिती, हिंगोली यांच्या वतीने बालकांचे लैंगिक गुन्ह्यांपासून संरक्षण कायदा (पोक्सो), २०१२ अंतर्गत अखिल भारतीय शालेय जनजागृती मोहिमेचा भाग म्हणून कै. बाबुराव पाटील कनिष्ठ महाविद्यालयात ‘सुरक्षित बचपन अभियान’ राबविण्यात आले. यावेळी तालुका विधी सेवा समितीचे अध्यक्ष तथा प्रमुख जिल्हा न्यायाधीश श्रीकांत एल. आणेकर यांच्या मार्गदर्शनाखाली झालेल्या या कार्यक्रमाच्या अध्यक्षस्थानी सह दिवाणी न्यायाधीश, कनिष्ठ स्तर, डी. व्ही. भंडारी होत्या. प्रमुख मार्गदर्शक म्हणून सहाय्यक पोलिस निरीक्षक प्रेमलता जगताप, तर प्रमुख पाहुणे म्हणून जिल्हा वकील संघाचे अध्यक्ष अॅड. एस. आर. घुगे आणि महाविद्यालयाचे प्राचार्य डी. पी. इंगळे उपस्थित होते. यावेळी सहाय्यक पोलिस निरीक्षक प्रेमलता जगताप यांनी पोक्सो कायद्यातील विविध तरतुदी व कलमांची माहिती देत बालकांच्या लैंगिक शोषणाचे प्रकार, त्यामागील कारणे आणि प्रतिबंधात्मक उपाय स्पष्ट केले. नातेसंबंधातील अतिविश्वास, पालकांचे दुर्लक्ष, मोबाईलवरील समाजमाध्यमांचा गैरवापर आणि वाईट संगत यांमुळे बालकांच्या सुरक्षिततेला धोका निर्माण होऊ शकतो, असे त्यांनी सांगितले. अशा गुन्ह्यांचे परिणाम पीडित बालकासह संपूर्ण कुटुंबाला भोगावे लागतात, याकडेही त्यांनी लक्ष वेधले. लैंगिक गुन्ह्यांना बळी पडलेल्या बालकांची ओळख गोपनीय ठेवली जाते. त्यामुळे भीती न बाळगता अशा घटनांची तक्रार करावी, जेणेकरून पुढील अनर्थ टाळता येईल, असे आवाहन त्यांनी केले. तसेच, अशा गुन्ह्यांना प्रतिबंध करण्यासाठी घ्यावयाची काळजी आणि दामिनी पथकाच्या माध्यमातून शाळा महाविद्यालयांना दिल्या जाणाऱ्या भेटींबाबतही त्यांनी माहिती दिली. अध्यक्षीय समारोपात न्यायाधीश डी. व्ही. भंडारी यांनी ‘जागरूक बचपन, सशक्त भारत’या अभियानाच्या संकल्पनेचे महत्त्व विशद केले. बालकांच्या लैंगिक शोषणाच्या घटनांमध्ये जागरूकता आणि योग्य वेळी मदत मिळणे महत्त्वाचे असल्याचे सांगून त्यांनी तालुका ते राज्य स्तरापर्यंत विधी सेवा प्राधिकरणामार्फत उपलब्ध होणाऱ्या मदतीची माहिती दिली. तसेच, अशा गुन्ह्यांना बळी पडल्यास पीडितांनी पुढील कायदेशीर कार्यवाही कशी करावी, याबाबत मार्गदर्शन केले. इंटरनेटच्या माध्यमातून होणाऱ्या फसवणुकीच्या प्रकारांबाबतही त्यांनी विद्यार्थ्यांना सावध केले. कार्यक्रमाचे सूत्रसंचालन जिल्हा वकील संघाचे सचिव ॲड एम. ए. कांबळे यांनी केले.



Source link