![]()
जागतिक पुरुष दिनानिमित्त छत्रपती संभाजीनगरमधील पत्नी पीडित पुरुष आश्रमाच्या सदस्यांनी अनोख्या पद्धतीने आंदोलन करत आपल्या विविध मागण्यांकडे शासनाचे लक्ष वेधले. पत्नीच्या छळामुळे तसेच कौटुंबिक वादांशी संबंधित काही कायद्यांचा गैरवापर होत असल्याच्या तक्रारींमुळे त्रस्त असलेल्या पुरुषांनी करोडी शिवारातील आश्रम परिसरात हे आंदोलन केले. यावेळी सदस्यांनी चक्क शीर्षासन केले, तर काहींनी कोलांट्या उड्या मारत शासन आणि समाजाच्या भूमिकेचा निषेध नोंदवला. पुरुषांच्या समस्यांकडे गांभीर्याने पाहिले जात नसल्याचा आरोप करत त्यांनी समान न्यायाची मागणी केली. जागतिक पुरुष दिनाच्या पार्श्वभूमीवर आयोजित या आंदोलनातून पत्नी पीडित पुरुषांच्या प्रश्नांना सार्वजनिक व्यासपीठ मिळावे, हा उद्देश असल्याचे आश्रमाच्या सदस्यांनी सांगितले. महिलांच्या सुरक्षेसाठी आणि हक्कांसाठी विविध कायदे अस्तित्वात आहेत. मात्र, काही प्रकरणांमध्ये या कायद्यांचा गैरवापर करून पुरुषांना त्रास दिला जात असल्याचा दावा आंदोलकांनी केला. खोट्या तक्रारी, कौटुंबिक हिंसाचाराचे आरोप, पोटगीसंदर्भातील वाद आणि मुलांच्या ताब्याचा प्रश्न यामुळे अनेक पुरुषांना मानसिक आणि सामाजिक त्रासाला सामोरे जावे लागत असल्याचे त्यांनी नमूद केले. संविधानातील समानतेच्या अधिकाराचा दिला दाखला भारतीय संविधानातील कलम 14 नुसार कायद्यासमोर सर्व नागरिक समान आहेत, तर कलम 21 नुसार प्रत्येकाला जीवन आणि व्यक्तिगत स्वातंत्र्याचा अधिकार आहे. हे अधिकार स्त्री आणि पुरुष दोघांसाठीही समान असल्याचे आश्रमाच्या वतीने सांगण्यात आले. त्यामुळे कौटुंबिक वाद किंवा वैवाहिक संघर्षाच्या प्रकरणांमध्ये केवळ लिंगाच्या आधारावर भूमिका न घेता दोन्ही बाजूंचे म्हणणे ऐकून निष्पक्षपणे न्याय मिळायला हवा, अशी मागणी आंदोलकांनी केली. विवाहानंतर निर्माण होणारे वाद, न्यायालयीन प्रकरणे आणि दीर्घकाळ चालणाऱ्या कायदेशीर प्रक्रियेमुळे संबंधित पुरुषांच्या आयुष्यावर परिणाम होत असल्याचेही आश्रमाने निवेदनात म्हटले आहे. अशा प्रकरणांमध्ये निष्पक्ष चौकशी व्हावी आणि निरपराध व्यक्तींना विनाकारण त्रास सहन करावा लागू नये, अशी भूमिका यावेळी मांडण्यात आली. विवाहित पुरुषांच्या आत्महत्येच्या आकडेवारीकडे लक्ष वेधले राष्ट्रीय गुन्हे नोंद विभागाच्या (NCRB) अहवालातील विवाहित पुरुषांच्या आत्महत्येशी संबंधित आकडेवारीचा संदर्भ देत आश्रमाने पुरुषांच्या मानसिक आरोग्याचा आणि कौटुंबिक समस्यांचा मुद्दा उपस्थित केला. वैवाहिक वाद किंवा कौटुंबिक तणावातून निर्माण होणाऱ्या मानसिक समस्यांकडे समाजाने गांभीर्याने पाहण्याची गरज असल्याचे सदस्यांनी सांगितले. पुरुषांनाही मानसिक त्रास होतो, त्यांनाही अन्यायाविरोधात आवाज उठवण्याचा अधिकार आहे. मात्र, सामाजिक प्रतिष्ठा आणि बदनामीच्या भीतीमुळे अनेक जण आपल्या समस्या उघडपणे मांडत नसल्याची खंत त्यांनी व्यक्त केली. आतापर्यंत 11 हजार प्रकरणांची नोंद पत्नी पीडित पुरुष आश्रमाकडे आतापर्यंत सुमारे 11 हजार पुरुषांच्या समस्यांशी संबंधित प्रकरणांची नोंद झाल्याची माहिती यावेळी देण्यात आली. या आकडेवारीवरून वैवाहिक आणि कौटुंबिक संघर्षांमध्ये अडकलेल्या पुरुषांनाही मदतीची आवश्यकता असल्याचे आश्रमाच्या सदस्यांनी अधोरेखित केले. अशा पुरुषांना आपली बाजू मांडण्यासाठी व्यासपीठ मिळावे, त्यांना कायदेशीर मार्गदर्शन मिळावे आणि त्यांच्या तक्रारींची दखल घेतली जावी, अशी मागणी करण्यात आली. यावेळी ॲड. भारत फुलारे यांनी पीडित पुरुषांना अन्यायाविरोधात निर्भीडपणे पुढे येण्याचे आवाहन केले. “अन्याय सांगायला लाजू नका, कारण लाजला तो संपला!” असे म्हणत त्यांनी पुरुषांनी आपल्यावर होणारा अन्याय सहन न करता योग्य मार्गाने त्याविरोधात आवाज उठवावा, असे सांगितले. शासनाने पुरुषांच्या प्रश्नांकडे लक्ष द्यावे महिलांच्या हक्कांप्रमाणेच पुरुषांच्या हक्कांबाबतही चर्चा होणे आवश्यक आहे. कौटुंबिक वादांमधील दोन्ही बाजूंच्या तक्रारींची निष्पक्ष दखल घेणारी व्यवस्था असावी. तसेच पुरुषांच्या कौटुंबिक, मानसिक आणि कायदेशीर समस्यांसाठी स्वतंत्र मदत यंत्रणा उभी करण्याबाबत शासनाने विचार करावा, अशी भूमिका आश्रमाच्या वतीने मांडण्यात आली. शीर्षासन आणि कोलांट्या उड्यांच्या माध्यमातून करण्यात आलेल्या या अनोख्या आंदोलनातून पत्नी पीडित पुरुषांनी आपल्या प्रश्नांकडे शासनाचे लक्ष वेधण्याचा प्रयत्न केला. जागतिक पुरुष दिनाच्या निमित्ताने पुरुषांच्या हक्कांचा, मानसिक आरोग्याचा आणि कौटुंबिक समस्यांचा मुद्दा पुन्हा एकदा चर्चेत आला आहे. हेही वाचा…. पंढरपुरात एकनाथ शिंदेंच्या हेलिकॉप्टरमध्ये अचानक बिघाड:बॅटरी लो झाल्याने इंजिन सुरू होईना, अखेर कारने पुण्याकडे रवाना राज्याचे उपमुख्यमंत्री एकनाथ शिंदे यांच्या हेलिकॉप्टरमध्ये पंढरपुरात अचानक तांत्रिक बिघाड झाल्याची घटना घडली. कार्तिकी वारीच्या नियोजनाचा आढावा घेण्यासाठी एकनाथ शिंदे गुरुवारी पंढरपूर दौऱ्यावर आले होते. दौऱ्यातील कार्यक्रम आणि पाहणी पूर्ण करून ते मुंबईला परतण्यासाठी हेलिपॅडवर पोहोचले. मात्र, हेलिकॉप्टर सुरू करण्याचा प्रयत्न केला असता त्यामध्ये तांत्रिक अडचण निर्माण झाली. हेलिकॉप्टरची बॅटरी लो झाल्यामुळे त्याचे दुसरे इंजिन सुरू होत नसल्याची माहिती समोर आली आहे. त्यामुळे ऐनवेळी त्यांचा हेलिकॉप्टरने मुंबईला जाण्याचा नियोजित प्रवास रद्द करावा लागला. अखेर एकनाथ शिंदे यांनी कारने पुण्याकडे जाण्याचा निर्णय घेतला. पुणे विमानतळावरून विमानाने ते मुंबईला रवाना होणार आहेत. सविस्तर वाचा….
Source link
पुरुष दिनानिमित्त पत्नी पीडित पुरुषांचे अनोखे आंदोलन:शीर्षासन अन् कोलांट्या उड्या मारून शासनाचा निषेध