![]()
विवाहाला अवघे आठ महिने झाले असतानाच प्रेमसंबंधातून पतीची हत्या करण्यात आल्याचा धक्कादायक प्रकार धाराशिव जिल्ह्यात उघडकीस आला आहे. पत्नीचे दुसऱ्या तरुणासोबत प्रेमसंबंध असल्याने पती या नात्यात अडथळा ठरत होता. त्यातून पत्नीने प्रियकराच्या मदतीने पतीला संपवल्याचा गंभीर आरोप करण्यात आला आहे. धारदार शस्त्राने गळ्यावर वार करून आणि डोक्यात दगड घालून 27 वर्षीय तरुणाची हत्या करण्यात आल्याचे समोर आले आहे. या प्रकरणी मृत तरुणाची पत्नी आणि तिच्या कथित प्रियकराविरोधात वाशी पोलीस ठाण्यात खुनाचा गुन्हा दाखल करण्यात आला आहे. या घटनेमुळे परिसरात खळबळ उडाली आहे. कुंथलगिरीच्या डोंगरदरीत आढळला मृतदेह गोविंद शिवाजी कागदे (वय 27, रा. गोलेगाव, ता. वाशी) असे मृत तरुणाचे नाव आहे. गुरुवारी (19 नोव्हेंबर) दुपारी 12 ते 2 वाजण्याच्या दरम्यान वाशी तालुक्यातील रामकुंड शिवारात ही घटना घडल्याचे फिर्यादीत नमूद करण्यात आले आहे. सरमकुंडी ते भूम या मार्गालगत असलेल्या कुंथलगिरीच्या डोंगरदरीत गोविंद यांचा मृतदेह आढळून आला. घटनेची माहिती समोर आल्यानंतर परिसरात एकच खळबळ उडाली. गोविंद यांच्या शरीरावर गंभीर जखमा आढळल्या. त्यांच्या गळ्यावर धारदार शस्त्राने वार करण्यात आले होते. तसेच डोक्यात दगड घालून त्यांची हत्या करण्यात आल्याचा आरोप फिर्यादीत करण्यात आला आहे. हल्ल्याचे स्वरूप पाहता त्यांची अत्यंत क्रूरपणे हत्या करण्यात आल्याचे स्पष्ट होत आहे. आठ महिन्यांपूर्वी विवाह, पत्नीचे दुसऱ्या तरुणाशी प्रेमसंबंध या हत्येमागे विवाहबाह्य प्रेमसंबंध असल्याचा आरोप करण्यात आला आहे. गोविंद कागदे आणि अंजली यांचा अवघ्या आठ महिन्यांपूर्वी विवाह झाला होता. मात्र, अंजलीचा हा विवाह तिच्या इच्छेविरोधात झाल्याची माहिती फिर्यादीतून समोर आली आहे. विवाहानंतर अंजलीचे शुभम सुभाष खोसे याच्यासोबत प्रेमसंबंध असल्याचा आरोप आहे. या संबंधांची माहिती आणि त्यातून निर्माण झालेल्या परिस्थितीमुळे पती गोविंद हा दोघांच्या नात्यात अडथळा ठरत होता, असे फिर्यादीत म्हटले आहे. त्यामुळे गोविंद यांना बाजूला करण्यासाठी कट रचण्यात आल्याचा संशय व्यक्त करण्यात आला आहे. पत्नी आणि तिच्या कथित प्रियकराने संगनमत करून ही हत्या केल्याचा आरोप मृताच्या नातेवाइकांनी केला आहे. चुलत भावाच्या फिर्यादीवरून पत्नी आणि प्रियकराविरोधात गुन्हा गोविंद यांचे चुलत भाऊ ज्ञानेश्वर बाजीराव कागदे यांनी या प्रकरणी वाशी पोलीस ठाण्यात तक्रार दाखल केली आहे. त्यांच्या फिर्यादीनुसार, अंजली गोविंद कागदे आणि शुभम सुभाष खोसे या दोघांनी संगनमत करून गोविंद यांची हत्या केल्याचा आरोप करण्यात आला आहे. या तक्रारीच्या आधारे पोलिसांनी दोघांविरोधात भारतीय न्याय संहितेच्या कलम 103(1) आणि 3(5) अन्वये खुनाचा गुन्हा दाखल केला आहे. या घटनेमुळे गोलेगावसह वाशी तालुक्यात हळहळ व्यक्त होत आहे. अवघ्या आठ महिन्यांपूर्वी संसाराला सुरुवात झालेल्या तरुणाचा अशा प्रकारे अंत झाल्याने परिसरातून दुःख व्यक्त केले जात आहे. हत्येमागील नेमका कट काय? पोलिसांकडून तपास सुरू या प्रकरणाचा पुढील तपास पोलीस निरीक्षक शंकर शिंदे यांच्या मार्गदर्शनाखाली सुरू आहे. गोविंद यांची हत्या नेमकी कशा प्रकारे करण्यात आली, त्यासाठी कोणते नियोजन करण्यात आले होते आणि या घटनेत आणखी कोणाचा सहभाग आहे का, या सर्व बाबींचा पोलीस तपास करत आहेत. पत्नी आणि तिच्या कथित प्रियकराविरोधात दाखल झालेल्या गुन्ह्याच्या अनुषंगाने पुरावे गोळा करण्याचे काम सुरू आहे. दरम्यान, प्रेमसंबंधातून पतीची हत्या झाल्याचा आरोप असलेल्या या प्रकरणाने धाराशिव जिल्ह्यात मोठी खळबळ उडवली असून, पोलीस तपासातून हत्येमागील संपूर्ण घटनाक्रम स्पष्ट होणार आहे. हेही वाचा… राज्यातील आणखी 6 तालुके दुष्काळग्रस्त घोषित:शेतकऱ्यांना दिलासा, कर्जवसुलीला स्थगिती अन् वीजबिलात सवलत राज्यात अपुऱ्या पावसामुळे निर्माण झालेल्या दुष्काळी परिस्थितीच्या पार्श्वभूमीवर राज्य सरकारने महत्त्वाचा निर्णय घेतला आहे. यापूर्वी राज्यातील 304 तालुके दुष्काळग्रस्त म्हणून घोषित करण्यात आले होते. आता त्यामध्ये आणखी 6 तालुक्यांची भर पडली आहे. नाशिक, पालघर, रत्नागिरी आणि कोल्हापूर या चार जिल्ह्यांतील सहा तालुके दुष्काळग्रस्त घोषित करण्यास शासनाने मान्यता दिली आहे. या निर्णयामुळे संबंधित तालुक्यांतील शेतकरी, शेतमजूर आणि नागरिकांना विविध सवलती व उपाययोजनांचा लाभ मिळणार आहे. यामध्ये जमीन महसुलात सूट, पीककर्जाचे पुनर्गठन, शेतीशी संबंधित कर्जांच्या वसुलीला स्थगिती, कृषिपंपांच्या वीजबिलात सवलत तसेच विद्यार्थ्यांच्या परीक्षा शुल्कात माफी अशा महत्त्वाच्या निर्णयांचा समावेश आहे. सविस्तर वाचा…..
Source link
आठ महिन्यांपूर्वीच लग्न, तरी पत्नीचे शुभमसोबत प्रेमसंबंध:पती ठरत होता अडथळा, धाराशिवमध्ये गोविंदची निर्घृण हत्या