मुंबई1 मिनिटापूर्वी
- कॉपी लिंक
भारतातील सर्वाधिक लोकप्रिय, बहुप्रतीक्षित आणि प्रेक्षकांकडून प्रचंड कौतुक मिळवलेल्या ‘स्कॅम’ (Scam) या वेब सीरिज फ्रँचायझीचा पुढचा रोमांचक अध्याय आता अधिकृतपणे सुरू झाला आहे. ‘स्कॅम 1992’ आणि ‘स्कॅम 2003’ च्या अभूतपूर्व यशानंतर, आता ‘स्कॅम2010’ (Scam 2010) प्रेक्षकांच्या भेटीस येण्यासाठी सज्ज होत आहे.
सोनी लिव्ह (Sony LIV), बिर्ला स्टुडिओज आणि अपलॉज एंटरटेनमेंट यांनी राष्ट्रीय चित्रपट पुरस्कार विजेते प्रसिद्ध दिग्दर्शक हंसल मेहता यांच्या मार्गदर्शनाखाली या नव्या सीझनच्या निर्मितीकार्याला (Production) सुरुवात केली आहे.
काय असेल कथा?
हा नवा सीझन छोट्या बचत योजनांच्या (Small Savings Schemes) माध्यमातून उभारलेले एक अफाट आर्थिक साम्राज्य आणि त्यानंतर त्यावर झालेली सार्वजनिक चौकशी यावर आधारित असणार आहे. एका सामान्य वाटणाऱ्या कल्पनेतून पैशांचे साम्राज्य कसे उभे राहिले आणि नंतर कायद्याच्या कचाट्यात ते कसे अडकले, याचा एक अत्यंत आकर्षक आणि असामान्य प्रवास या मालिकेतून प्रेक्षकांना पाहायला मिळणार आहे.
दिग्दर्शक हंसल मेहता म्हणाले…
मालिकेबद्दल कमालीची उत्सुकता निर्माण करताना दिग्दर्शक हंसल मेहता म्हणाले, “स्कॅम २०१० ही केवळ एका घोटाळ्याची कथा नसून ती मानवी महत्त्वाकांक्षा, प्रभाव आणि त्यातून निर्माण होणाऱ्या अहंकाराची कथा आहे. विश्वासाच्या जोरावर भारतातील सर्वात मोठे व्यावसायिक साम्राज्य कसे उभे राहिले आणि जेव्हा तो विश्वास तुटला, तेव्हा काय परिस्थिती निर्माण झाली, हे यात दाखवले आहे. हे साम्राज्य उभे करणाऱ्या आणि स्वतःला अजेय समजणाऱ्या एका व्यक्तीची ही अत्यंत रोचक कहाणी आहे.”
प्रेक्षकांच्या अपेक्षा पूर्ण करण्याची मोठी जबाबदारी
अपलॉज एंटरटेनमेंटचे चीफ कंटेंट ऑफिसर दीपक सेगल यांनी सांगितले की, “‘स्कॅम’ ही आता आमच्यासाठी केवळ एक फ्रँचायझी राहिलेली नाही, तर ती एक मोठी जबाबदारी बनली आहे. ‘स्कॅम1992’ अशा वेळी आली जेव्हा भारतीय ओटीटी (Streaming) इंडस्ट्री स्वतःची ओळख निर्माण करत होती आणि ती मालिका प्रचंड यशस्वी ठरली. या यशाने आम्हाला अँथॉलॉजी (Anthology) मालिका तयार करण्याचा आत्मविश्वास दिला. ‘स्कॅम 2010’ मध्ये आम्ही हीच महत्त्वाकांक्षा पुढे नेत आहोत. या सीझनचे सर्वात मोठे आकर्षण म्हणजे हंसल मेहता पुन्हा एकदा दिग्दर्शनाची धुरा सांभाळत आहेत.”
सिद्धार्थ बोडके मुख्य भूमिकेत झळकणार!
या अत्यंत महत्त्वाच्या सीझनमध्ये मुख्य भूमिका साकारण्याची सुवर्णसंधी मराठमोळा अभिनेता सिद्धार्थ बोडके याला मिळाली आहे. आपल्या भूमिकेबद्दल उत्सुकता व्यक्त करताना सिद्धार्थ म्हणाला, “या पात्राच्या व्यक्तिमत्त्वातील गुंतागुंत आणि या शोचा भव्य स्केल मला खूप भावला. या पात्राची महत्त्वाकांक्षा, सत्ता, त्याचे दोष, उदय आणि शेवटी झालेला पतन हे सर्व पडद्यावर साकारणे एका अभिनेत्यासाठी खूप आव्हानात्मक आणि रोचक आहे. हंसल मेहता यांच्यासारख्या दिग्दर्शकासोबत काम करण्याचा हा अनुभव माझ्यासाठी अत्यंत रोमांचक आहे.”
बिर्ला स्टुडिओज आणि अपलॉज एंटरटेनमेंट यांची निर्मिती असलेली ‘स्कॅम २०१०’ सध्या प्रॉडक्शन प्रक्रियेत असून, ती लवकरच सोनी लिव्ह (Sony LIV) या ओटीटी प्लॅटफॉर्मवर स्ट्रीम होणार आहे. पैसा, सत्ता आणि मानवी स्वभावाचा हा नवा खेळ पाहण्यासाठी प्रेक्षक आतापासूनच उत्सुक आहेत.
