अमरावती स्थानिक स्वराज्य संस्था विधान परिषद निवडणुकीच्या पार्श्वभूमीवर महायुतीत फूट पडल्याचे चित्र समोर आले आहे. भाजपने प्रवीण पोटे यांना उमेदवारी दिली असताना, शिंदे गटाचे उपनेते गोपीकिशन बाजोरिया यांचे पुत्र विप्लव बाजोरिया यांनीही अपक्ष उमेदवारी अर्ज दाखल केला आहे. यामुळे महायुतीमधील मतभेद उघड झाले आहेत. प्रवीण पोटे यांच्या उमेदवारी अर्ज दाखल करण्याच्या वेळी महायुतीमधील घटक पक्ष युवा स्वाभिमान पार्टी (वायएसपी) अनुपस्थित होती. तर, शिंदे गटाचे आमदार बच्चू कडू आणि प्रीती बंड उपस्थित होते. वायएसपीच्या अनुपस्थितीमुळे राजकीय वर्तुळात अनेक चर्चांना उधाण आले आहे. उमेदवारी अर्ज दाखल करण्याचा सोमवार हा शेवटचा दिवस होता. दुपारी ३ वाजेपर्यंत जिल्हाधिकारी कार्यालयात उमेदवारांची आणि त्यांच्या समर्थकांची मोठी गर्दी होती. महायुतीमध्ये अमरावतीची जागा भाजपच्या वाट्याला आली असून, पक्षाने मागील आमदार प्रवीण पोटे यांना पुन्हा संधी दिली आहे. पोटे यांनी अर्ज दाखल केल्यानंतर काही वेळातच शिवसेनेचे (शिंदे गट) उपनेते गोपीकिशन बाजोरिया आणि त्यांचे पुत्र विप्लव बाजोरिया जिल्हाधिकारी कार्यालयात पोहोचले. उमेदवारी अर्ज दाखल करण्यासाठी केवळ अर्धा तास शिल्लक असताना, विप्लव बाजोरिया यांनी आपला अर्ज दाखल केला. विप्लव बाजोरिया हे विधान परिषदेत शिवसेनेचे प्रतोद होते आणि त्यांचा हिंगोली-परभणी मतदारसंघातील कार्यकाळ २०२४ मध्येच संपला आहे. त्यांना यावेळी त्या मतदारसंघातून तिकीट मिळाले नाही. त्यामुळे त्यांनी अमरावतीतून अपक्ष म्हणून अर्ज भरला आहे. बाजोरिया यांची उमेदवारी अपक्ष असली तरी, ते शिवसैनिक असल्याने आणि त्यांचे वडील सेनेचे उपनेते असल्याने त्यांना शिवसेनेचे छुपे पाठबळ मिळण्याची शक्यता वर्तवली जात आहे. उमेदवारी अर्ज मागे घेण्याची अंतिम तारीख ४ जून असल्याने, तोपर्यंत कोण माघार घेतो आणि कोण निवडणुकीच्या रिंगणात कायम राहतो, हे स्पष्ट होईल. मात्र, सद्यस्थितीत महायुतीत फूट पडल्याचे चित्र स्पष्ट झाले आहे.
Source link
अमरावती विधान परिषद:महायुतीत फूट, दोन उमेदवार रिंगणात; भाजपचे प्रवीण पोटे, शिंदे सेनेचे विप्लव बाजोरिया आमने-सामने
