कोलकाता मेडिकल कॉलेज आणि हॉस्पिटलमधील डॉक्टरांनी ६ वर्षांच्या मुलाच्या फुफ्फुसात अडकलेला चुंबक बाहेर काढून त्याचा जीव वाचवला. विशेष म्हणजे, हा चुंबक कोणत्याही महागड्या यंत्राच्या मदतीने नव्हे, तर माणिकतळा येथील एका स्थानिक वर्कशॉपमध्ये तयार केलेल्या खास चुंबकाच्या साहाय्याने बाहेर काढण्यात आला. मुलाचे नाव आराफात अली असून तो उत्तर २४ परगणा जिल्ह्यातील बादुडिया येथील रहिवासी आहे. मंगळवारी त्याची आई त्याला सतत खोकला आणि श्वास घेण्यास त्रास होत असल्याच्या तक्रारीसह रुग्णालयात घेऊन आली होती. चुंबक श्वासनलिकेतून पुढे जाऊन उजव्या ब्रॉन्कसमध्ये पोहोचला होता. सीटी स्कॅन आणि एक्स-रेमध्ये खेळण्यांमध्ये वापरल्या जाणाऱ्या ताईतासारख्या आकाराचा एक छोटा चुंबक त्याच्या फुफ्फुसात अडकलेला असल्याचे आढळले. त्यामुळे त्याच्या जीवाला गंभीर धोका निर्माण झाला होता. चुंबक काढण्याचे 12 वेळा प्रयत्न केले, मात्र अपयश आले डॉक्टरांनी मुलाला ईएनटी विभागात दाखल करून सुरुवातीला त्याची प्रकृती स्थिर केली. त्यानंतर बुधवारी ब्रॉन्कोस्कोपीद्वारे चुंबक काढण्याचा प्रयत्न करण्यात आला. सहयोगी प्राध्यापक डॉ. दिप्तांशु मुखोपाध्याय यांनी फोर्सेप्सच्या मदतीने चार वेळा चुंबक काढण्याचा प्रयत्न केला. मात्र प्रत्येक वेळी अपयश आले. डॉ. मुखोपाध्याय म्हणाले, “फोर्सेप्सने चुंबकावर व्यवस्थित पकड घेता येत नव्हती. व्होकल कॉर्डच्या दिशेने खेचताच ते प्रत्येक वेळी निसटत होते.” मुलाचा श्वासोच्छ्वास सुरळीत ठेवण्यासाठी डॉक्टरांनी ट्रॅकिओस्टॉमी (घशात छिद्र करून श्वास घेण्यासाठी मार्ग तयार करणे) केली. मात्र त्याचाही उपयोग झाला नाही. त्यानंतर डॉक्टरांनी थोराकोटॉमीचा विचार केला. यात छाती उघडून शस्त्रक्रिया केली जाते. मदतीसाठी SSKM रुग्णालयाशी संपर्क साधण्यात आला, मात्र गुरुवारी सकाळपर्यंत तेथे बालरुग्णांसाठी ICU बेड मिळू शकला नाही. स्थानिक वर्कशॉपमध्ये बनवला खास चुंबक सामान्य पद्धती अयशस्वी ठरल्यानंतर डॉक्टरांनी दुसरा चुंबक वापरून अडकलेला चुंबक बाहेर काढण्याचा विचार केला. डॉ. मुखोपाध्याय गुरुवारी सकाळी मध्य कोलकात्यातील माणिकतला येथील लेथ वर्कशॉपमध्ये पोहोचले. तेथे त्यांनी कर्मचारी प्रभाकर करार यांना मुलाचा एक्स-रे दाखवून समस्या समजावून सांगितली. हावडा येथील श्यामपूरचे रहिवासी असलेल्या करार यांनी एक्स-रे पाहून सांगितले की अडकलेला चुंबक तुलनेने कमकुवत आहे. ते म्हणाले की, हा खेळण्यांमध्ये वापरल्या जाणाऱ्या चुंबकासारखा आहे. करार यांनी सर्जिकल फोर्सेप्सच्या टोकावर बसवता येईल असा मजबूत आणि खास आकाराचा चुंबक बनवण्याची तयारी दर्शवली. करार म्हणाले, “मला विशिष्ट आकाराचा शक्तिशाली चुंबक बनवण्यास सांगितले होते. तो फोर्सेप्सवर लावून अडकलेल्या चुंबकापर्यंत नेणे अपेक्षित होते. डॉक्टरांनी सांगितलेल्या आकारानुसार मी तो तयार केला. माझ्या बनवलेल्या उपकरणामुळे मुलाचे प्राण वाचवण्यास मदत झाली, याचा मला आनंद आहे.” तीन दिवसांपासून अडकला होता चुंबक प्रोफेसर बंद्योपाध्याय यांच्या नेतृत्वाखाली 6 डॉक्टरांच्या पथकाने ही प्रक्रिया केली. खास तयार केलेल्या चुंबकाने अडकलेल्या चुंबकाला आपल्याकडे खेचून घेतले. तो मुलाच्या फुफ्फुसात तीन दिवसांपासून अडकला होता. डॉक्टरांनी ट्रॅकिओस्टॉमीच्या छिद्राचा वापर करून चुंबक बाहेर काढला. यावेळी वस्तू श्वसननलिकेत आणखी खाली घसरणार नाही, याची काळजी घेण्यात आली. पुढील उपचारांसाठी मुलाला ICU मध्ये हलवण्यात आले. आता त्याच्या दोन्ही फुफ्फुसांमध्ये हवा पोहोचत असून तो ICU मध्ये बरा होत आहे.
Source link
कोलकात्यात मुलाच्या फुफ्फुसात अडकला होता चुंबक:डॉक्टरांनी दुसऱ्या चुंबकाच्या मदतीने काढले; श्वास घेता यावा म्हणून घशात छिद्र केले
