जय हिंद इंडस्ट्रीजची 600 कोटींची गुंतवणूक:ई-व्हायकल्स अन् ॲल्युमिनियम कास्टिंगचे उत्पादन वाढणार

फिरोदिया समूहातील जय हिंद इंडस्ट्रीजने पुणे आणि चेन्नई येथील उत्पादन प्रकल्पांच्या विस्तारासाठी पुढील दोन वर्षांत 600 कोटी रुपयांची टप्प्याटप्प्याने गुंतवणूक करण्याची घोषणा केली आहे. ही गुंतवणूक आर्थिक वर्ष 2026-27 ते 2027-28 या कालावधीत केली जाईल. यापूर्वी जाहीर केलेल्या 200 कोटी रुपयांव्यतिरिक्त आता 400 कोटी रुपयांची भर पडल्याने एकूण नियोजित गुंतवणूक 600 कोटी रुपयांवर पोहोचली आहे. या विस्तारामुळे पुण्यातील वाहन उद्योगाशी संबंधित परिसंस्थेला मोठे बळ मिळण्याची अपेक्षा आहे. आकुर्डी आणि उर्से येथील प्रकल्पांमध्ये उत्पादन क्षमता, प्रिसिजन मशिनिंग आणि प्लांट पायाभूत सुविधांचा विस्तार केला जाईल. या अंतर्गत 1200 ते 3500 टन क्षमतेच्या 12 हून अधिक हाय प्रेशर डाय-कास्टिंग (एचपीडीसी) मशिन्स बसवण्यात येणार आहेत. चेन्नईमध्ये अत्याधुनिक नवीन उत्पादन सुविधा उभारली जाईल. येथे उष्मा उपचार (हीट ट्रीटमेंट), इम्प्रिग्नेशन आणि पावडर कोटिंग यांसारख्या अंतर्गत प्रक्रियांनाही बळकटी दिली जाणार आहे. स्वतंत्र पावडर कोटिंग सुविधेमुळे उत्पादनांच्या पृष्ठभागाचा दर्जा, गंजरोधक क्षमता आणि टिकाऊपणा सुधारण्यास मदत होईल. जय हिंद इंडस्ट्रीज ही हाय प्रेशर डाय-कास्टिंग आणि ग्रॅव्हिटी डाय-कास्टिंग क्षेत्रातील एक जागतिक पुरवठादार कंपनी आहे. कंपनीच्या मते, मोठ्या आणि अधिक गुंतागुंतीच्या ॲल्युमिनियम कास्टिंग्जची मागणी वाढत आहे. त्यामुळे ग्राहकांच्या आगामी गरजा पूर्ण करण्यासाठी उत्पादन क्षमता वाढवण्यावर भर दिला जात आहे. व्यवस्थापकीय संचालक प्रसन फिरोदिया यांनी सांगितले की, ही गुंतवणूक भारतातून जागतिक स्तरावर स्पर्धात्मक उत्पादन क्षमता निर्माण करण्याबरोबरच ‘मेक इन इंडिया’ दृष्टिकोनाला पूरक ठरेल. कंपनीकडे सध्या आकुर्डी, उर्से, चेन्नई आणि पीथमपूर येथे उत्पादन सुविधा आहेत. या विस्तारामुळे नवीन तांत्रिक व उत्पादनविषयक रोजगाराच्या संधी वाढण्याची, स्थानिक पुरवठादारांना काम मिळण्याची आणि पुण्याच्या ऑटोमोटिव्ह मूल्यसाखळीला चालना मिळण्याची अपेक्षा आहे. कंपनीच्या अधिकृत माहितीनुसार, जय हिंदकडे 160 ते 4400 टन क्षमतेच्या 45हून अधिक एचपीडीसी मशिन्स आहेत. कंपनी 5 ग्रॅमपासून 51 किलोपर्यंत वजनाचे घटक तयार करते. नव्या क्षमतेमुळे मोठ्या संरचनात्मक भागांसह इलेक्ट्रिक वाहनांसाठी आवश्यक ॲल्युमिनियम घटकांचे उत्पादन वाढण्याची शक्यता आहे.



Source link