मुख्य निवडणूक आयुक्त ज्ञानेश कुमार यांच्याविरोधात देशभरात वातावरण चांगलेच तापले असून, विरोधी पक्षांकडून त्यांच्यावर गंभीर आरोप करत राजीनाम्याची मागणी जोर धरत आहे. नुकताच 2 ऑक्टोबर रोजी कॉकरोच जनता पार्टीच्या वतीने शिवाजी पार्क, मुंबई येथे विविध राज्यांतील जेन-झी तरुणांच्या सहभागाने मोठा मोर्चा काढण्यात आला होता. त्यानंतर आज शिवसेना ठाकरे गट आणि महाराष्ट्र नवनिर्माण सेना यांच्या वतीने ज्ञानेश कुमार यांच्या राजीनाम्यासाठी संयुक्त ‘गर्जना मोर्चा’ काढण्यात आला. या मोर्चाला राष्ट्रवादी काँग्रेस शरद पवार गटासह इतर अनेक विरोधी पक्षांनीही आपला भक्कम पाठिंबा दर्शवला आहे. दरम्यान, या महामोर्चाबाबत एक मोठी बातमी समोर आली आहे. पोलिसांच्या माहितीनुसार, ठाकरे बंधूंनी काढलेल्या या गर्जना मोर्चाला प्रशासनाकडून परवानगीच देण्यात आलेली नव्हती. मुंबईत केवळ आझाद मैदान वगळता इतर कुठेही मोर्चा काढण्यास परवानगी नसल्याने, आता या मोर्चाच्या आयोजकांवर गुन्हे दाखल करण्याची तयारी पोलिसांनी सुरू केली आहे. बेकायदेशीरपणे जमाव जमवणे या कलमांतर्गत हे गुन्हे दाखल केले जातील, असे पोलिस प्रशासनाकडून स्पष्ट करण्यात आले आहे. उद्धव ठाकरेंचा मोदी सरकारवर घणाघात या मोर्चादरम्यान उद्धव ठाकरे यांनी निवडणूक आयोग आणि भाजपवर जोरदार शब्दांत टीका केली. मोर्चामध्ये उसळलेल्या अलोट जनसागराचे आणि पाठिंबा देणाऱ्या सर्व राजकीय पक्षांचे आभार मानत त्यांनी, “हा लढा आपल्या स्वातंत्र्याचा आहे,” असे नमूद केले. पंतप्रधान नरेंद्र मोदींच्या ‘मेक इन इंडिया’च्या घोषणेचा संदर्भ देत उद्धव ठाकरे म्हणाले की, “या माध्यमातून जर तुम्ही हुकूमशहा बनत असाल, तर ती हुकूमशाही आम्ही गाडून टाकू.” मतदार यादीतील वगळलेल्या नावांवरून सवाल आपल्या भाषणात उद्धव ठाकरे यांनी मतदार याद्यांतील घोळाचा मुद्दा प्रामुख्याने उपस्थित केला. देशभरातून तब्बल 13 कोटी लोकांची नावे मतदार यादीतून वगळण्यात आली असल्याचा गंभीर आरोप त्यांनी केला. या घटनेमुळे निवडणूक प्रक्रियेवरच प्रश्नचिन्ह निर्माण झाले असून, मतदारांच्या अधिकारांवर गदा येत असल्याचे त्यांनी ठणकावून सांगितले. निवडणूक आयुक्तांच्या नेमणुकीवर आक्षेप मुख्य निवडणूक आयुक्तांच्या नियुक्ती प्रक्रियेवरही उद्धव ठाकरे यांनी सडकून टीका केली. राष्ट्रपतींची जर निवडणूक होऊ शकते, तर मग निवडणूक आयुक्तांची निवडणूक का होत नाही? असा थेट सवाल उपस्थित करत त्यांनी ज्ञानेश कुमार यांच्या नियुक्ती प्रक्रियेवर आक्षेप नोंदवला. लोकशाही टिकवण्यासाठी ही प्रक्रिया पारदर्शक असणे अत्यंत गरजेचे असल्याचे मत त्यांनी यावेळी मांडले.
Source link
ठाकरे बंधूंच्या 'गर्जना मोर्चा'ला परवानगीच नव्हती:पोलिसांकडून गुन्हे दाखल करण्याची तयारी, आयोजकांच्या अंगलट येण्याची शक्यता
